ISAI 57 - PATHIEN LEKHABU THIENGTHO (BSI)

Milim Hote Mawhchansakna

¹ Mi diktat chuh a thi a, kuoma’n a ngaihtuoh puou a, Pathien ngaihsak te chule a thiu a, sietna lak apat lâkmang ahiu hi tih kuoma’n a ngaihtuoh puou hi.

² Amah chuh muonna a lut ahi a, a zâlkhun u a chawldam ahi zawu a; mi diktatte chuh lam dik ah a chieh sek ui.

³ Himahleh, nanguh mitvaidawite chapate, zawlsaite leh nawhchizuok chate haw, ei hun naih un.

⁴ Kuo a tawtbawlna a na mat sek uh? Kuo a kam lien tak tak ka a, lei na thâk dawk khum sek uh? Nang haw hi thil sukhielte cha, lepchieh gente suon hilo na hiu hi?

⁵ Gangpi bul tin leh thing hing nuoi tin ah na kipawlthanghuoi u a; phaicham leh suongpi kek kal haw achun na chateu kithawihna dingin na pie sek u a.

⁶ Phaicham a suong zawl deuh chuh na kilak u a, ziehaw chun vang na en sek u a; amau a ding chun dâwn ding thillat te na sung u a; na thillat teu chuh na hun puok sak u a. Ziehaw achun kipahna nei dingin nei gingchau em?

⁷ Tang sang leh lopite chung achun na kipawlthanghuoi u a, zie tak achun Molek kawmah na kithawi sek u a.

⁸ Na kawtpi bul leh kawtbieng haw achun na milim pathien teu chuh na tâk u a. Kei kawm hilo in midang kawmah na kisûtthau a, na va kalto a, na zâlkhun na sulien a, a mau chuh tawh thuthun na bawla, a mitmuh u achun a zâlkhun u chuh na lunggulh,

⁹ Chun, gimlim leh sathaute kinuh in, Molek pathien ho dingin na chieh u a, gam gamla tak ah mi na sawl u a, Sheol tieng hiel in a chieh sek a.

¹⁰ Nangmah ngêi le, na pathien ding hawl na’n na kimangzo sek a, na haihsan diek puoi. Na milim pathien chun hatna hun pie a, chau ngeilo dingin na kingaihtuoh a.

¹¹ “Kuo na lauh ziek leh na kihchak zieka lepchieh gena ei hezing lo a ei ngaihtuoh lo na hi? Hun sawttak ka hun thipsan ziekin nei limbawl talo ahi maw?

¹² Na thilhih leh na nungchang chuh hun taklang ing ka ting, ziehaw chun hun panpih thei hiel puo’n a.

¹³ Panpihna ngên a na kiko tieng leh, na pathienteu chun hun hukdam u hen! Amau chuh huih in tawk mang zo vek intin, hatkhat in pawmang zo hen. Himahlele, kuole, kei chunga ginna ngate chun gam hi luoh un tin, ka tâng thiengtho chuh luoh un au,”

Panpihna leh Sukdamna Thutiem

¹⁴ Lalpa chun, “Ka mite chuh ka kawmah hung vaikit tau hen. Lampi a a nangte cheng chuh ladawk unla! lampi siemphau un la, hih zang un.

¹⁵ “Chungnung pên Pathien lopi, chawihsân a um, kumlekhuo a hing zing Amin Thiengtho kiti chun hiti hin a gen hi: ‘Mun sang leh Mun Thiengtho achun ka chênga, kingainiemte leh lunggil kisik vulvul te hihhalh ding leh lungthim thasie te chuh suhalh dingin.’

¹⁶ Ka mite chuh mawhchansak in a chungu ah lungna zingzing ta puo’ng ka; thagau leh hinna ka siem sak chuh ka masang ahin sawlsam kha’n a. Hinna hi keia ahi a, mihingte hinna hu hile kei siem ahi.

¹⁷ A gitloh ziek u leh, a huoiham ziekun a chungu ah ka lungna a, ka gawt a, ka kiheisan ta a. Himahleh, genhak takin a um u a, amau lampi chiet ah a kiheimang tau hi.

¹⁸ “A lampi teu chuh ka mu a, amau haw chuh sudam ing ka ting; pui ing ka ting, thamuonna piekit ing ka ting, a lusûnteu kamsuok chuh thamuonna suoh sak ing ka.

¹⁹ Thamuonna, Thamuonna, mun gamla leh naia umte kawma achun thamuonna um hen; amau chuh sudam ing ka, Lalpa’n a tii.

²⁰ Himahlele, mi nunsie te chuh tuisuohgiet kinawk viel viel, um hiet hiet theilo tawbang ahiu a, a tui kinawkte chun ninpa leh buonthuok a nawhdawk sek hi, ti’n.

²¹ Mi gilote ding chun muonna himhim a um puoi,” Lalpa’n a tii.