ISAI 56 - PATHIEN LEKHABU THIENGTHO (BSI)

Hukdamna Deihte Thu zawp ding

¹ Lalpa chun hiti hin a tii, “Diktak in vaihawm unla, thil dik hih un, ka hukdam na chuh hungtung pai ding ahi ta a; ka hun hukdawkna chuh hung kilang pai ding ahi ta ngâl a.

² Kuole ka thugen tuchak zinga, subuok lo a Sabbath nit zingte leh thil diklo hihna ding a a khut vengbitte chuh mi vangpha ahiu.”

³ Chun, gamdang mi Lalpa mite tawh kizawmte chun, “Lalpa’n, a mite tawh ei khenchuom ina,” ti kihen la; Mikiget chun le, Entie, thing gaw tawbang ka hi, ti diek kihen.

⁴ “Ka Chawlhni te nit a, ka kipahna lam thilte tel a, thugawlh pawm chak kêi pa mikiget chungchâng thu achun Lalpa’n hiti hin a tii.

⁵ Ka Ho-In leh ka kulh sunghaw a chun chanu leh chapa sanga phazaw hetzingna leh min phazaw pie’ng ka ting; kumlekhuo a amin dinguh sukmangthai tâk loh ding chuh pie ding ka hi,” a ti ngâla.

⁶ Chuleh, gamdang mite Lalpa tawh kizawpna neite; amah nasem ding leh Lalpa min ngainate leh amah nasem nuomte, sabbath nit zingte leh subuok lo te cheng leh ka thuthun tuchak te chuh,

⁷ “Amau haw ngêi chuh ka tâng Thiengtho Zion achun pui ing ka ting, Ka pauchamna In achun kipâk takin um un au; hâlmanga a thillat teu leh, a kithawihnateu chuh, ka maichâm achun ana pawm ing ka; Ka In chuh mitin a dingin pauchamna In tih hi ding ahi ngâl a,” ti’n.

⁸ Lalpa Pathien chun hitihin a tii, “Israel nawhdawk a umte cheng chuh puikhawm kit ing ka ting, puihkhawm sate bân achun midang dang le puikhawm ding ka hi” a ti a.

Israel Puitute Demna

⁹ Gam laka gamsa cheng chengte haw, ahi, nanguh gammânga gamsa um chengcheng te haw hung un la, ne zo vek un!

¹⁰ A gâlvengteu chuh mitdûk ahiu a, hetna neilo ahiu a; amau chuh uicha bengngawng gâlveng, bangmah hap theilo tawbang ahiu a, a kuol hiet hiet u a, ipmu a mang nei tawbang ahiu hi.

¹¹ Ahi, uicha chuh a gawlsan a, ahun tai tih himhim a nei puou a; zie chuh belampu hetna neilote chuh ahiu a. amau lampi chiet ah a kihei u a; abawn un, amau lawkna ding chiet a kingaihtuoh ui.

¹² “Amau chun, hung unla, uain va lai tingun, dâwn kham hitiu! I bawn un zu chîk tak dâwn in kisukham hitiu; zing khu tuni tawbang tho hi’n tin, nuom zaw nalai bawn ding ahi ngâla,” a ti chiet sek ui.