ISAI 54 - PATHIEN LEKHABU THIENGTHO (BSI)

Lalpa ’n Israel a Lungsietna

¹ Aw chîng, nang cha hing khalo! himahleh, tuhin kipâk takin la sa’n kiko in! Pasal neinu chate sang chun, thawmhau nu chate chuh a tam zaw ngâl u a! Lalpa’n a tii.

² Na puon-In mun chuh keklien inla, na umna puon zak te chuh zak palh in, kilen ki’n la, a henna khaute chuh hih sau inla; a khuomte chuh sudet in.

³ Na gamgi ning tin chuh keklien in na tin; tichun, na suonte chun namdangte gam chuh hun luoh un tin, na mite chun gam chuh hun la kit ding ahiu a. Khawpi hawmsa nung chuh mipi a hung dim kit ding ahi.

⁴ Lau ki’n la, sukzahhuoi a um kit lo ding na hi a; lungkie ki’n, muolpho in um kit diek ta puo’n la; Na ngaklak lai zahchâkna cheng kha hengilh ta’n na tin, meithai chansie tak guola na umna chuh hengilh ta’n la.

⁵ Nang hun Siempa chuh na pasal hi’n tin; A min chuh Bangakai hihthei Lalpa ahi ngâl a! Israel Pathien Thiengtho chuh na Hukdampa ahi, Amah chuh khawvel pumpi Pathien ahi ngâl a.

⁶ Vanglai zi ngaihsakloh a um, lunggil a thasie, sapkit guol in ka hun sam kit hi, Lalpa’n a tii!

⁷ “Mitphetkal sung cha ka hun taihsan a; himahleh, lungsietna lien tak pum in hun puikit ing ka.

⁸ Ka lungnat so let in mitphetkal nang apat in ka mai ka sel a; himahleh, ka hun lungsietna chuh kumlekhuo’n na chungah latsak ing ka,” ti’n. Lalpa nangmah hun Tanpa chun a tii.

⁹ “Ziehi keia dingin Noah hun lai tawbang ahi, Noah hun khan tui let kit talo dingin ka kipautiem a; Tuhin, na chunga lungna kit ta lo dingin ka kipautiem ta a; hun gawt ngêi talo ding ka hi.

¹⁰ Tangte chuh tawlmang a um in, muol te chuh a hung kichawn mai thei a; himahleh, ka hun lungsiet na chun tâwp nei ta puo’n tin; Thamuonna thu ka tiem chuh kumlekhuo’n tuzing ing ka,” nang hun lainat Lalpa chun a tii.

Jerusalem Thak

¹¹ Aw nang sukgimtheih a um, huihpi’n a mût lumlet; thamuontu bei! na suongte kha a zem hawih takin hun siem sak ing ka ting, na In suongphum ding chuh sapphire suongmantam in hun lemtoh sak ing ka.

¹² Ngaitie, na In sipzum ding chuh rubi suongmantam in siem hi’n tin, Na kulh kawtkhakte chuh karbangkal suongmantam vak silsel in siem ing ka ting; na kulh bângte chuh suongmantam chi chuom chuom in siem ing ka.

¹³ Na chate cheng chuh Lalpa’n sinsak intin, na chate hauhsakna chuh lopi tak hung hi’n a.

¹⁴ Diktatna a phuhdet hi’n na tin; Sukgimtheihna leh lauhna apat chun bit takin um in na tin; tizatna chuh gamla tak ah um ta’n tin, hun naih talo ding ahi.

¹⁵ Ngaitie, nang hun do dinga kipan a um chun, zie chuh keia kipan hi puo’n tin; kuole, nang hun do dinga kikhawm taphawt chuh nangmah ziekin kipuk un au!

¹⁶ Ngaitie, mei tik a, gâlvan siemte hi kei siem ahiu a, sepaihte leh mi thahna dinga gâlvan chawite chule kei siem ahiu a; chuleh, phuba la a hihsie dingte chule kei guot ahi.

¹⁷ Himahleh, bang tawbang gâlvan matchâkte’n le hun suna thei puo’n tin, vaihawmna muna thiem loh hun chan guo phawt chuh niel tha zel in na ti’n; Zie chuh Lalpa suokte gochan ahi a, a diktatnau chuh keia kipan ahi, Lalpa’n a tii.