ISAI 53 - PATHIEN LEKHABU THIENGTHO (BSI)

¹ “Ka thugen uh kuo a gingcha? chuleh, Lalpa khut chuh kuo chungah ahim suklata a um?

² Amah chuh lei gaw tak apat a thil zung kek guola, a suok khan dawk chuh Lalpa phasak lam ahi ngâla. Pienken phatna leh mel hawihna himhim a nei puoh a; amah I muh u a I deih na dingun hawihna himhim a nei puoi!

³ Amah chuh mite muhsit leh deihloh in a um a, lungkham leh natna he mi ahi a, mite chun kihetmawh sak in a mai uh a sel u a; amah chuh muhsit in a uma bangmah lo a ngaih in a um a.

⁴ “Diktakin amah chun I lungkhamna teu chuh a puoh a, I natna teu chuh a puo ngeia; himahlele, ei u chun la a gimtheih thawkna cheng chengte chuh, Pathien zêp leh sukgimtheih in I ngai u a.

⁵ Himahleh, amah chuh I bawhsietna teu zieka sukliem a um in; I mantheihlohna teu ziekin zêp thidup in a um a. I thamuonna ding un zêpna mawlh chuh a chungah a chu a; a liemna pawn haw a chuh sukdam a um I hi tau hi.

⁶ I bawn un belam guolin I vakmang u a; mitin eimau lampi chiet ah I kihei tau a; himahleh, I gitlohnau chuh Lalpa’n amah chungah a nga a, I thuok sik un a thuok ta a.

⁷ “Amah chuh muhsit leh êngbawl in a um a; himahleh, kingainiem in a kam a ka puoi. Belamno thah dinga puih a um leh; belam a mulmetpa ma a thip kêi guolin, ama’n le a kam a ka puoi.

⁸ Thudik a vaihawmna chuh heikawi in, thah dingin amah chuh a pui u a; himahleh, a tunung thu ding kuo a ngaihtuoh sak? Mihing gam apat in satthak in a um a; I miteu gitlohna zieka sukliem a um ahi ngâla.

⁹ Chun, a thihna achun mi gilote leh mi hausate kawm lam achun a thân chuh a um sak a, chun, nunsie taka thilhih in, a kam achun lepchieh thu a gen ngei puoi.”

¹⁰ Himahlele, zêp thidup a a um chuh Lalpa phasak lam ahi a, suknat in a um ta ngeia, a hinna chuh gitloh ngaihdamna dinga kithawihna ahi ngâl a, a mah chite chuh hun mu’n tin; a nite chuh suksau sak in tin, tichun, Lalpa deihlam chuh amah achun sukbukim in um ina.

¹¹ A thuokgimna a beih tieng chuleh, kipahna hun nei intin, lung-awi ta’n tin, A thuokna chuh a thâwn ahi puoi tih hun he ta’n au. Ka suok diktak, a chunga ka kipahna mah mah pa chun mi tamtak dingin thuok intin, Amah min ziekin amau haw chuh ngaidam ing ka.

¹² Zieziekchun, amah chuh miliente chanvo bang hawm ing ka ting, amah chun mihatte tawh gâllâk sumte chuh hawm ina; a hinna chuh thi khawp hiela a sunbuok a, migilote laka simtel a a um ziekin; ahi, mi tamtak te gitlohna chuh puo a, migilote chuh ngaihdam a a um theih na dingun a paucham sak hi.