ISAI 51 - PATHIEN LEKHABU THIENGTHO (BSI)

Jerusalem Lungmuonna Thu

¹ Nang haw suohchakna ngên a ka kawma hungte leh hukdamna hawlte haw, ei ngaithau in! Na hung kipatnau suongpi chuh en unla, suong lâkna muna na kilaihdawknau khah ngaihtuoh un!

² Na pileputeu, Abraham leh Sarah nanguh hun suonte khah ngaihtuoh un. Abraham ka sap lai khan cha a nei puoh a, himahlele, ka vangsak a, cha tamtak leh suon tamtak nei in ka siem ta a.

³ Zion chuh thamuon ing ka ting, a hawma taihsan a a umna mun cheng achun A gamgaw chuh Eden bangin siem ing ka ting, Lalpa huon bangin siem ing ka ting; zie tak achun ka kawma kipah thugenna te, pahchakna la te, lawpna leh kipahna thawmte um ta’n a.

⁴ Aw ka mite haw, ei ngaithau inla, ka thu hi ngai un! Namte kawma ka thu sinsak chuh hun pie’ng ka ting, kei apat in dân pawtdawk intin, dikna chun mitin salhvak dingin ka vaihawmna chuh chawlhsak ing ka, tuikuol haw achun ei ngak untin, ka bân hi muong un au.

⁵ Ka hukdawkna chuh kin takin hung nai intin; ka hukdamna chuh ka sawldawk ta a, amau haw chuh hukdam ing ka. Ka guolzawhna ni chuh a nai ta ngâl a. Keimah ngêi hin namte chungah vaihawm ing ka ting; Tuisuohgiet panga chêngte chun ka hung ding ngak in, ka vaihawmna chuh kinem takin a ngak ngâl u a.

⁶ Chunglam akhun na mit hak to unla; chun, nuoi lama lei chuh en un! Vante khu meikhu guolin hung beimang intin; lei chuh puon banga lui in sie’n tin, a sunga chêngte chuh tho bangin thi vek un au. Himahleh, ka hukdamna chuh kumlekhuo’n um intin; ka zawhna chun tawp ni nei puo’n a.

⁷ Nang haw thil dik hete leh, ka dân thu lungthima vawpte haw, ngaithau in! Mite’n a hun musit uh a, a hun gaih tieng u leh lau kiu in;

⁸ Amau chuh nget in puon a nêk siet guolin beimang un tin; himahleh, ka hukdamna chuh kumlekhuo a ding hin ti’n; Ka zawhna chuh suon chengcheng tiengin um zing in a.

⁹ Aw Lalpa tho in, tho in! Na khut in ei panpih in; malai nite bang khan na thilhih theihna mang in keihaw ei hukdam in! Nang chuh Rahab satnelpa Dragon sunpa kha hilo na him?

¹⁰ Tuisuohgiet thuk tak leh lien takte hih kang a, Hukdam sate chieh galkaihna dinga, tui laka lampi siempa kha nang hilo na hi?

¹¹ Tichun, Lalpa tatsa te chuh kipâk takin vaikit untin; lasa kawmin Zion achun lut un au; Lungkham leh dahna um ta puo’n tin, kipahna leh lawpna chang tau intin; kumsawt kipahna chuh a lu chung u ah um ta’n a.

¹² Kei hi nangmau haw hun lungmuonpa chuh ka hi a, mihing thi kit pai zieng ding hampa bang phet hi bang zieka lau na hiu a?

¹³ Kei Lalpa hi nangmau hun siempa, vante zak palh a, lei kingakna phumpa chuh ka hi tih hengilh na hi tau em leh? Bangti dana nangmau hun nuoi sieh nuomte lungnat lau a um zing na hiu em?

¹⁴ Sala puih a umte chuh kintaka pawtsak in um un tin, sawttak dam un tin, nek ding tasam diek ta puo’n au.

¹⁵ “Himahleh, kei hi Lalpa na Pathien, tuipi kinawk gi zungzung te sukhenpa chuh ka hi ngâl a. Ka min chuh Bangakai hihthei Lalpa ahi.

¹⁶ Chun, vante khu ka kaimalh a, leisiet kingakna ka phum a, Zion kawm achun, ‘ka mite na hiu! ka thu sinsakte ka hun pie a, ka khut in ka hun liehkhuh na hiu hi,’” ka ti a.

Jerusalem Thuokna Tawpna

¹⁷ Aw Jerusalem, tho dawkin! Nangmah kipan inla; ding dawk in! Lalpa’n a lungnatna khawn dâwn ding a hun piek chuh na dâwn zo ta a, Na dâwn zo a, a hun sulawn duoi duoi a.

¹⁸ A hun puihuoi ding kuomah a um ta puoh a, a hinsa, a chate lak ah khuta tu ding a um ta puou hi.

¹⁹ Buoina thuoh nih in a hun tunkhum ta a, na gam u chuh kidona a suksiet in a um ta a; Na mite chuh gilkiel in a chautha zo tau ui! Kuon ahun thamuon ta die? Sukgamna, kiel leh chemzâm, kuo manga nang hun thamuon ding ka him?

²⁰ Na chapateu chuh a chautha zo tau a, sazuk thânga âwk bang mai in khawlai ning tin a chun a kital lemlum zieng tau hi; Pathien lungnatna chun a dim u a! Pathien hansie a thuok tau hi!

²¹ Zieziekchun, nang haw liemna thuok, Jerusalem a gimtheihna thuokte haw, uain dâwn kham hisâm lo a lawn duoi duoi te haw, zie hi heu in!

²² Na Lalpa, Jehovah, na Pathien a mipite en sek pa chun hiti hin a tii, “Ka lungnat na khawn chuh na khut a kipatin ka la mang ta a, ka lungnatna khawn chuh dâwn kit ta hiel puo’n lau.

²³ Tichun, nangmah hun sugimtheite khut achun kawih ing ka; amau chun na hinna kawmah, ‘Na chung ka hawh theih na dingin tuol ah bawk ah,’ a tiu kha! tichun, nangin na chung hawhte kawm achun na nungzang chuh lei bang leh khawlai bang mai in na dawh kha” ti’n.