ISAI 50 - PATHIEN LEKHABU THIENGTHO (BSI)

Mi Thiengtho Kingaihniemna

¹ Lalpa chun, “Mi’n a zi a mâk a a sawlmang guolin ka mite ka sawlmang a ahim? Khuti ahih chun ka mâkna lehkha chuh khawitaka um ahim? Mi’n a chate suok a a zuok bangun, salin ka hun sawl a ahim? Hilo e, na gitloh ziek u a sala puih in na um u a; Na thilhih gitloh ziek u a sawlmang a um na hi zawu hi.

² “Ka mite hukdawk dinga ka chieh laia kha bang zieka ei ngaihsak loh uh a? Ka sap laia kha bang zieka ei dâwnglo ahiu u? Amau haw hukdawk theilo dingin ka bân hi sukchawm in a um a ahim? Ahihloh leh, hukbit dingin hihtheihna ka nei puoh a ahim? Ngaitie, thupiek chauh in tuipite ka sukang a, tuipite thalek ka suok saka, khutichun, tui um loh ziekin a sunga nga chengcheng chuh dangchâk in a thiu a; a uih zo vek tau hi.

³ Thihna chunga lusûn bangin, van khu a kikhuhna dingin kawlladip ka siem sak sek hi,” ti’n.

Suok in Lalpa thu a Zawpna

⁴ Lalpa Pathien chun, hatlote chuh ka sukhat theihna dingin ka thugen dingte chuh ei sinsak a. Zingkal chengin ei phawng halh a, ka nakhang ahin ei suhalh seka, A sinsakna te chuh ka hethiem deuh deuh a.

⁵ Lalpa Pathien chun ka nakhang ei sukhawn sak a, kei chuh ka genhak ngei puoh a, amah apat in le ka taimang ngei diek puoi.

⁶ Ei zêpte kawm achun ka tingzang ka dawh a, ei sukzahchak lai u leh, ka sam ei lawih pulh sak lai un le, ka maichang a chil ei sietkhum lai un le bangmah ka gen diek puoi.

⁷ Lalpa Pathien in ei panpih ziekin muolpho in ka um puoh a, zieziekchun ka maichang hi meisuong bangin ka dawh a; tichun, zahhuoi a umlo ding ka hi tih ka hêi.

⁸ Pathien chuh a nai a, ka thiemna thu chun hun sulang intin; kuo a kei ei do thei ding? Ei kimaituohpih u hen la! Ei hêkna thuu chuh hun gen u hen!

⁹ Ngaitie, Lalpa Pathien chun ei panpih intin; kuo a thiem loh ei chansak ding? Amau haw chuh puon banga ziel in um un tin; nget in puon a nêk siet guolin nek zawhin um un au.

¹⁰ Na lak uh a kuo a Lalpa kihcha a, a suok thugen zawp a, thim laka chieh a, khutisa a chule Lalpa min gingcha a, a Pathien chunga kinga chuh?

¹¹ Himahleh, nangmau meisel kidet a, thal kuong thei chawite haw, na thal kuong thei vak uh a chun khawsa himhim tiem u, Lalpa khut na thuok ding u chuh gim-um leh huoisie tak hiding ahi.