ISAI 5 - PATHIEN LEKHABU THIENGTHO (BSI)

Grep lêm Tehkalna La

¹ Ka deihtak a ding in lasa’ng ka ting, a grep huon chungchâng thu chuh la’n sa’ng ka. Ka lungsiet mah mah chun tânggam lei phatna mun ah grep huon a nei a.

² A lei a laichuop a, suonghaw chuh a hawm ngim a; grep kek phapente a phut a, huon lailung achun venbuk a sa a, zie chun grep thawkna khuk le a lai a grep tak gah dingin a kinem a, himahleh, grep lêm ngen a hung gah zaw ta a.

³ Tuhin, Aw Jerusalem leh Juda mite haw kei leh ka grep huon kal thu hih ei ngaihtuoh sak tiem u!

⁴ Ka grep huon a hin ka hihsa tihloh banga hih beh naklai ding? Grep gah phatak gah dinga ka kinep mai zên tawh, bang zieka grep lêm ngen hung gah mai ahi ta?

⁵ “Tuhin, ka grep huon chunga ka hih ding chuh hun hilh ing ka; a ling dai chuh lamang ing ka ting, nek zawhin um in tin, a suong pal chuh suchim ing ka ting, gamsate tawhden in um ina.

⁶ Susie vek ing ka ting, sat-hah in um puo’n tin, laihchuop in le um diek puo’n a; ling leh hamlingneite kek dim zaw’na; a chunga guoh a zuk loh na dingin meipi thu pie’ng ka,” ti’n.

⁷ Sepaihte Lalpa grep huon chuh Israel Inkuon hi ahi a, Juda mipite hi a grep phuhte chuh ahiu hi. Thu dik a kineppih a, himahleh thisan suohna’n a dim a; diktatna kineppih mahleh lungkham taka kiko aw zak ahi tai!

Mite Thil Gilo hih

⁸ Gam lailung taka amau haw mai a um theihna ding u a, mun âwng mawng mawng a um lohna dinga In leh In kimata sa a, lo leh lo kizawp sakte chung chuh a gik hi!

⁹ Sepaihte haw Lalpa chun ka zak ah hiti hin a ti: “In tamtak lien tak takte, hawihtak takte chuh a luoh ding um lo a hung sie ngêi ngêi ding ahi.

¹⁰ Grep huon tîn sawm mun ah bath khat chauh hung pieng intin, buhchi homer khat tuhin ephah khat chauh ladawk ding ahi ngâl a,” ti’n.

¹¹ E he, nanguh zing zu dâwn dinga vaima taka tho a, uain in a kâkkham kêi masanga zan sawttak tak chu sekte.

¹² Kingkang leh pekgitte, khuong leh châmngaite tawh uain a a guolvaknau a um sekte; Lalpa thilhih ngaihsak sek lote leh a khut nasep mu thei sek lote chung chuh a gik hi.

¹³ Zieziekchun, ka mite chuh hetna a neih loh ziekun sala puih in a um tau a. A mi zahumteu chuh a gil uh a kiel a, a mipiteu chuh dangchâk in a dang uh a gaw zo tai.

¹⁴ Zieziekchun, thihna khawvel chun a an duhna chuh a na supung a, a kam chuh teh theih loh khawp in a na ka ta a. Tichun, Jerusalem a miliente leh a mi lopite, a mipite leh a masanga khawhelo khawpa thawm pha leh a laku a a kiletsakpih teu cheng chuh a lut suk sausau tau hi.

¹⁵ Mipi haw chuh hihkun in a um u a, mi chapote chuh sukniem in a um u a, mi ki-uongte chuh hihniem a um tau hi.

¹⁶ Himahlele, Sepaihte Lalpa chun diktatna chuh thil dik hih in etsak intin, a thienthona chuh a mipite vaihawm sak ni achun a sulang tai.

¹⁷ Zie phat chuleh belam note chuh a tatna mun u a ta guolin ta dip dip un tin, belam thaute leh a no haw chun thilsie lak achun hampa pet un au.

¹⁸ Lepchiehna khauhuol a manlohna kai a, kangtalai kaihna banga gitlohna luoi sekte!

¹⁹ “Hung kinawh hen la, a hih ding chuh hih hen la; vak kimu ngâl leh aw! Israel Mi Thiengtho chuh I het theih na dingun, a thil guonggalh chuh hun hih zo kin leh,” tite haw na chunguh a gik hi.

²⁰ Thilpha chuh thilpha lo a ngaia, thil phalo chuh thilpha a ngai a, vak chuh thima ngai a, thim chuh vaka ngai sekte. Thilthum chuh thilkha a ngaia, thilkha chuh thilthum a ngai sekte chung chuh a gik hi!

²¹ Amah mitmuh a ching kisate leh amah mitmuh a pil kisate chuh a chunguh a gik hi!

²² Aw nanguh zu dâwn hatte, zu hel tuok thiemte, na chung uh a gik hi!

²³ Gawlhgukna sum a nek zieka migilo thiemchan sak seka, hihkhelh neilote dikna lâksak sekte haw ngêi chu tawh.

²⁴ Zieziekchun, meikuong in buhpawl a kâktum duok duok sek bang leh, hampa gaw chuh meikuong a a tum zungzung sek bangin, a zung haw chuh muot intin, a pak haw chuh leivui bangin lengto lak lak ina; sepaihte Lalpa dân chuh a deihloh u a, Israel Mi thiengtho thu chuh a ngaihdau ziekun.

²⁵ Zieziekchun, Lalpa lungnatna chuh a mite chungah a kuong dawk a, gawt dingin a khut chuh a chungu ah a tha a, amau haw chuh a zêp a, tichun, tângte chuh a kilîng dul dul a, a thi luongteu chuh khawlai dung vel achun ninpa bangin a um lemlum a. Khuti khawpa a bawlsa chun le, a lungnat chuh a hai diek puoh a, a khut a tha tei tei nalai hi.

²⁶ Gamla taka namte a dingin melchikna takdawk intin, kâwl mawng tawpa umte chuh saisilit in sam in tin. Tichun, ngaitie, amau haw chuh chan-gang tak leh hât takin hung khawm un au.

²⁷ A lak uh a kuomah châwl puou un tin, suih le kisui puo’n au; kuomah vuong puou un tin, ip le ipmu diek puo’n au. A kâwnggak uh phel kawl in um puo’n tin, a kengtawbek khau hawu le tan diek puo’n a.

²⁸ A thalteu chuh a hiem a, a thalpiteu cheng chuh kausa’n a um khepkhup a, a sakawl tinteu chuh meisuong bang mai ahi a, a kangtalai kengteu chule chinpei bang hiela hât ahi.

²⁹ A thawm u chuh sakeibaknei hâm bang mai hi’n tin, sakeibaknei vanglai in a sa mat ding a ngîk a a mat bangin; amau chuh chieh mang pih untin, kuoma’n hukdawk puo’n au.

³⁰ Zie ni chuleh tuisuohgiet gi hum hum bangin a chung u ah gi hum hum un au. Tichun, mi’n gam chuh a vak et u chun, thimna leh lungzînna ngenin dim intin, vak chule meipi’n lieh thim ina.