ISAI 42 - PATHIEN LEKHABU THIENGTHO (BSI)

Lalpa Suok

¹ “Ka suokpa, ka tundawk, hattak a ka siem a, ka teldawkpa, a chunga ka kipahna mah mah pa a um hi! Amah chuh ka thagau in ka hihdim a, namtin chungah vai hun hawm ding ahi.

² Kiko puo’n tin, a aw le suoh diek puo’n a; kawtthêl ah a aw chuh suoh diek puo’n a.

³ Luong kihek gawpsa chuh hekbawng pai puo’n tin, phita kuong liek liek chule sumit diek puo’n a; Thudik chuh ginum takin puodawk ina.

⁴ Leichung a thutanna dik phuhdet a a um masang sieh chuh chau puo’n tin, a lung le kie diek puo’n a; tuikuol gamte chun a dân thu chuh ngaklah takin a um ngâl u a,” ti’n.

⁵ Lalpa, Pathien vante siem a, a zak palh a; lei hi kaimalh a, a sunga um chengcheng te hinna piepa; a sunga vakvielte thagau pie pa chun hiti hin a gen hi.

⁶ Tichun, kei Lalpa chuh ka hi a, diktatna’n ka hun sama, thilhih theihna ka hun pie a; na khut in hun tu’ng ka ting, hun vengbit ing ka ting; Mite thuthun ding leh Jentel te salhvak dinga ka hun guot ahi.

⁷ Mitdûkte mit sukvak sak ding leh; Suongkul tângte pawtsak ding leh, thimnuoi a chute puidawk ding in,

⁸ “Kei hi Lalpa na Pathien ka hi a, Pathien dang mawng mawng in ka lopina hi chang puo’n au, Pahchak a ka umna hi milim pathiente kawmah pie diek puo’ng ka.

⁹ Ngaitiem u, ka thugen lawk te chuh tuhin a hung dik ta a, tuhin, thil thak hun hih ing ka, a hung tun ding kipat ma pek a pat in, ka hun hilh na hiu hi.”

Pahchakna La

¹⁰ Tuisuohgiet a va chieh te leh, a sung a um cheng chengte leh, tuikuol gam leh a sunga um chengcheng te haw Lalpa chawiân in la thak sau in la, kâwlmawng apat inle amah chawih-atna la sau in.

¹¹ Gamgaw leh a khawpiteu chun Pathien pakchau he’n; Kedar te umna khuote chun leh, Sela khuo a umte chun, kipâk takin la sau henla, tâng sip apat haw chun kiko u hen.

¹² Lopina chuh Lalpa pieu hen la, tuikuol gama chêngte chun Lalpa pahchakna thu gen u hen!

¹³ Lalpa chuh sepaih hattak guolin, galdo dingin a pawt a; kido dinga kisazo leh ngaklah takin, kidona aw leh, gâl thawmte suohdawk in, a melmate chunga chun a thilhih theihna a latsak ta a.

A Mite Panpih ding Thutiem

¹⁴ Hun sawttak chuh thipkêi in ka um a; kei leh kei ka kitim a; Himahleh, tuhin dîp chunga hat la’n hun bawl ding ka hi, Numei nauhanat bangin kiko ing ka.

¹⁵ Muol leh tângte chuh suchai ing ka ting, thing leh hampa chengcheng te chuh sugaw vek ing ka; Luite chuh gamgaw’n siem ing ka ting, dîl tuite chuh hihkang ing ka.

¹⁶ Mitdûkte chuh a chieh khâkloh nau lam ah pui ing ka ting; a het khâkloh uh lampi haw achun pui ing ka; Amau achun thim chuh vakin siem ing ka ting, lampi kuok lemlum te chule sucham ing ka. Ziehaw hi ka hih ding chuh ahi a, hengilh lo ding ka hi.

¹⁷ Milim siemkawmte taksang a, milim sunte kawma, “Ka pathien uh na hiu hi,” tite chuleh ngat sak in um un tin, nasa takin zahhuoi un au,

Israel te Hetna Taksapna

¹⁸ Bengngawngte haw, ngaithau un, mitdûkte haw, na muh theihna dingun, en un!

¹⁹ Ka suokte sanga mitdûk zaw leh, a misawlte sanga bengngawng zaw a um u? Ka mi tel chuom guola mitdûk leh Lalpa suokte sanga mitdûk zaw a um u?

²⁰ Aw Israel, tamtak na mu ta a; nanga dingin a umzie banga? Zakna dingin bil na nei a, himahleh banga na het mawng mawng le?

²¹ Lalpa chuh mi hukdam kal ngaklah Pathien a hi a, zieziekchun, a dante leh a thu sinsakte a chawisâng sek hi; a mite le ziehaw limbawl ding chun a deih hi.

²² Himahlele, a mite chuh suoma um leh, guom sunga kie tha a hi vek uh a, suongkul a sel mang in a um u a; lâksak leh puok mang in a um u a; a panpih ding khat chale a um puou hi.

²³ Na laku ah ziehaw lama bil dawh ding chuh kuo a um? Hun hungtung ding ngaihtuoh a ana entha zing ding kuo na um u?

²⁴ Kuo a Jakob te galhing mata mat dinga pie a, Israel te gucha kawma pie chuh? A chungah gilo takin I hih sek uh a Lalpa ngêi chuh ahi ngâl a; Amah deih bangin a hing puou a, a thu ei sinsakte le I zawp diek puou hi.

²⁵ Zieziekchun, a lungnatna thilhih theihna chuh I chungu ah a um ta a; Kidona tizat-um tak I thuok tau a; A lungnatna chuh Israel te lak ah mei guolin a hung kuong zak ta a, himahleh, bang ahim tih le I he puou a; bangmah le I het dawk lawh diek puou hi.