ISAI 41 - PATHIEN LEKHABU THIENGTHO (BSI)

Israel kawma Pathien Thutiem

¹ Aw, tuikuol gamte haw, ka masangah thipkêi in um un! mitin in a hâtnau la thak u hen la, hun naih u henla, thu gen sak un; vaihawm dingin kinaih tuoh dii tiu.

² Suohlam apat a mi khat hun chawktho pa chuh kuo a? A chiehna lam chengah zawhna a pie sek a, lengte chungah vai a hawm seka; amau chuh leivui bangin chemzâm kawmah a pie a; buhsi huih mût lawn bangin a thalphel kawm achun a pie a.

³ Amah chun amau haw chuh a delh zui a, bit takin a chieh zel sek hi. Lei tuol tawh khalo khawpa hat in a chieh sek hi.

⁴ Ziehaw umsak chuh kuo ahi? Ana guonggalh chuh kuo ahi? Atûng apat khang tamtak hun samdawkpa chuh kuo ahi? Kei, Lalpa a masapen leh a nunung pên kawma um hin ka hih ahi.

⁵ “Tuikuol gama mite chun, ka thilhih chuh a muu a, a kithing u a, kâwlmawng tawppen le a kithing sek uh ahi. A hung u a, a tai khawm tau a.

⁶ Mitin in amau guolte chiet a panpih uh a, mitin in a suohpih teu kawmah, ‘Thamuong takin um in,’ a kiti tuoh u a.

⁷ Mi khutthiem te chun sana sekte kawmah, ‘Na hih phai,’ ti’n. Milim pathien seka khen zawl thiem te chun a châlmat te chuh a thamuon u a, ‘Apha khawp mai hi,’ tichun, milimte chuh tawilawk thei talo dingin thingkilhna’n a kilhden tau hi.

⁸ “Himahlele, nanguh Israel te, ka suok Jakob haw, ka mi tel, ka guolpa Abraham suonte na hiu a.

⁹ Kâwlmawng tâwp apat in ka hun puikhawm a, gam tawppen apat in ka hun sam khawm a, na kawm u ah, ‘Ka suokte na hiu a.’ Ka hun nawlh puoh a, ka hun tel zawk na hiu ui.

¹⁰ Lau kiu unla, na kawm u ah ka um zing hi! Na Pathien uh ka hi a, lungkie kiu inla, bangmân hun hihlau kihe’n. Hun suhat ing ka ting, ahi hun panpih ing ka.

¹¹ “Ngaitie, na chung u a lungna taphawtte chu zakcha takin um un au. Kuole, a hun do taphawt chuh thi tei un tin;

¹² Na chunga sietna bawl guote chu hawl in na tin, himahleh, mu zo ta puo’n na tin; nang hun dote chuh bangmah lo suok un au.

¹³ Kei hi Lalpa na Pathien uh ka hi a, ‘Hun panpih ding ka hi,’ ” ti’n na khut changlam u chuh tu ding ka hi ngâla.

¹⁴ Nang tangtel tawbang chauh Jakob, nang ganhing neu tawbang Israel, himahleh, lau kiu inla, hun panpih ding ka hi. Kei, Israel Pathien Thiengtho, a hun hukdawktu chuh ka hi ngâl a.

¹⁵ Buh hêkna khawl thak leh, ha hiem tak, bangin hun siem ing ka ting, Tangte chuh chilgawp in, sumangthai unlau; tichun, tângte chuh leivui bangin nêl dim diem ina.

¹⁶ Buh chil in chil in na tin, asi chuh huih in tawkmang vek intin, huihpi’n muntin ah thehzak intin: Tichun, nang u chuh Pathien achun kipâk un na tin uh, Israel Pathien Thiengtho hi lopina pie ta’n lau.

¹⁷ “Mi gimthei leh chagah te chun tui dâwn ding a hawl u a, dangchâk a a gawl uh a hul tieng leh, Kei, Lalpa hin ana dâwng ing ka ting, Kei, Israel Pathien hin amau haw hengilh ngei ta puo’ng ka.

¹⁸ Tang gawchakte a chun tui luon sak ing ka ting, phaicham achun luichate chuh luong intin; Gamgaw chuh dîl luitui suoh sak ing ka ting, gamgaw achun tuisam put sak ing ka.

¹⁹ Chun, gamgaw achun sidar kehsak ing ka ting, thinggi te, mui thing leh sidar thingte phut ing ka. Bangmah kehlohna gamte chuh gamgaw suok intin, Juniper thingte, tum thing leh theipi kungte’n dim ina.

²⁰ Chun, zie chuh mi’n a muh tieng u leh, Kei, Lalpa ngêi hin ka hih ahi tih he ta’n au. Tichun, Israel Pathien Thiengtho hin, zie chuh a hun umsak ngêi ahi tih hechien kei ta’n au.” ti’n.

Milim pathien te

²¹ Na thuu chuh hun gen tiem u leh, Lalpa’n a tii. Adik hi ti a na pansaknau chuh hun pawdawk un, Jakob Pathien chun a tii.

²² Zie hin hung paw khawm unla, thil hungtung dingte chuh ei hilh un. Thil chieh sa haw chuh bang ahim tih kei uh ei hilh tiem u le! tichun, a tun tieng leh hechien hi tingun, Vaihawmna In achun thil chiehsate chanchin chuh genchien unla; a umzie ei hilh tiem u le!

²³ pathien na hiu hi tih ka het theihna dingun, tunung a thil hungtung dingte chuh ei hilh un! Ka lauh u a, ka tizat theihna dingun, apha hi’n asie hileh hun bawl un.

²⁴ Ngaitiem u, bangmah na hi puou hi, na thilhih u le bangmah ahi diek puoi; nang haw hun hote chuh mi kihdak-um tak ahiu hi!

²⁵ “Mâllam apat in mi khat ka chawktho a, tichun, a hung ta a, ni suohna lam apat in amin in a sama. Amah chun vaihawmtute chuh buonthuok bang phetin a chil nawi a, bêldêngte’n tung a mêk bang phet un.

²⁶ ‘A thugen chuh a dik na e!’ ka tih theih dingin, na lak uh a thil hung tung ding kuo a gen dik le? Na lak u a kuoma’n a gen dik puou a, kuoma’n le na thugen uh a za kha diek puou hi!

²⁷ Keimah ngêi in Zion kawmah, ‘Entie, amau khu entie,’ ti masa’ng ka ting; Jerusalem kawm achun Chanchin Pha hun puo ding khat ka sawl a, (Ka mite chuh a hung tau a, In lam zuon in a hung ui!)

²⁸ Himahleh, ka vak et leh kuomah a um ta puou hi, a lak u achun lemguottu khatchale a um puou a, ka thil dawt ei dâwng thei khatchale a um diek puou ui!

²⁹ Ngaiun, kithepna maimai ahiu a; bangmah hihtheih a nei puou a, a milim pathiente chuh bangmahlo leh hawmngawn ahiu ui,” ti’n.