ISAI 40 - PATHIEN LEKHABU THIENGTHO (BSI)

Pathien Mite Thamuonna

¹ “Thamuon unla, ahi, ka mite hi thamuon un, a Pathien un a tii.

² Jerusalem kawmah thamuonna thu gen unla, a kidonau chuh a kichai ta ngâl a, a gitlohnau chule ngaihdam ahi tai, a thil hihkhelh teu cheng ziekin gawtna bukim in ka gawt ta ngâl a,” ti’n.

Baptist Johan Nasepna

³ Aw khat hung gi chun, “Lalpa lamlien lai unla, gamgaw achun I Pathien uh lamlien chuh hei zang un.

⁴ Guom tin chuh sun dim hi’n tin, tâng tin muol tin le sukniem hi’n a; lam kawite chuh sukzang in um intin, lam kiguol lohna haw chuh sukguol hi’n a.

⁵ Tichun, Lalpa lopina chuh suklat hi’n tin, mi chengcheng in zie chuh mu chiet un au; Lalpa kam ngêi in zie chuh a gen ta ngâl a,” a ti a.

⁶ Chun, Aw chun, “Kiko dawk ah,” a ti a. “Bang thu a ka kiko pih ding?” ka ti a. “Mi chengcheng hampa tawbang ahiu a, a lopina cheng cheng u le hampa pak bang ahi;

⁷ Lalpa hu chun a mût tieng leh, hampa chuh a vuoi a, a pak chuh a pulh sek a: mihing te chuh hampa tawbang chuh ahi him ui.

⁸ Hampa chuh a vuoi a, a pak chuh a pulh seka; himahleh, I Pathien thuu vang chuh kumlekhuo’n um zing ina, ti’n” a ti a.

⁹ “Aw Zion, tâng sangte achun va kalto inla, Chanchin Pha hi va gen in! Aw Jerusalem, Chanchin Pha chuh phuong in ngeih tak in kiko in la! Lau ki’n. Juda khawpite kawm achun, Na Pathien chuh zie hin a um hi,” ti’n hilh in.

¹⁰ “Entie, Lalpa Pathien chuh thilhih theihna a vaihawm dingin a hung a, a bân chun a sik in vaihawm intin, entiem u, a kipahman chuh a kawmah a um hi; a ditna chule a masangah um ina.

¹¹ Amah chun belam chingpa bangin, a belamte chuh veng intin; belam note chuh a khut nih in pawm intin, a ângsung ah kawih in tin, chun, a pi-nokaite chuh awlcha cha’n chiehpih dên dên ina.”

Israel Pathien tawbang Umlo

¹² Kuo ahi tuite chuh a khutpêk kuok a kawih a, van khu khâp a teh a, leia leivui hi lawh a teh a, tângte gikdan chuh teh a, muol haw chuh bûkna a bûk thei ding?

¹³ Kuo ahi Lalpa Thagau chuh a lampi hilh a, a hihloh leh kuo ahi a lemguot a pang thei ding?

¹⁴ Amah chun kuo a a dawt, kuo ahim amah chuh thudik hetsak a panga, a vaihawmna lampi sinsak a, a thilhih dân ding lampi etsak kha?

¹⁵ Ngaitie, Lalpa ding chun, namtin chuh tui vat khat bang phet ahiu a, bûkna a thil ne’n neucha bang pheta ngaih ahiu a; Amah chun tuikuol gam haw chuh thil neucha lâk bangin a la sek hi.

¹⁶ Lebanon chuh thinga tih dingin kidaih puo’n tin, gamsate cheng chule, I Pathien kawm u a hâlmanga kithawihna kham ahi puoh ngâl a.

¹⁷ Namtin chengte chuh amah dingin bangmahlo ahiu a; amah ding chun bangmahlo sanga tawm zaw, beingawn tawbang mai ahiu hi.

¹⁸ Aleh, Pathien chuh kuo tawh na tehkal ta dingu? a hihloh leh, bang tawbang lim tawh na tehkal ding u?

¹⁹ Milim pathien tawh maw? Mi khutthiem te khutsuok sanati a luon khum u a, sana khi a awhsak hawu bang hi ahi puoi.

²⁰ Sana leh dangkathîk nei zo lote chun, thing muot theilo chi chuh a tel sek ui. Milim pathien kichawn lo ding, amah a dinga siem sak dingin mi khutthiem a hawl sek ui.

²¹ Na lunggil un na he kha nai puou maw? Na bil un na za ngei puou em? A tunga pat khan a hun hilh puou maw? Lei kisiem tûng apat khan na hethiem puou maw?

²² Amah chuh lei kuolkhumna chunga chu pa chuh ahi a, a mitmuh chun lei chung a umte chuh khaupe bang phet ahiu a; Amah chun van khu puon-In chung banga zakmalh in, puon-In umna dingin a zak a.

²³ Amah chun leng chate, leichung a vaihawmte chuh a luoi tha a, bangmahlo in a siem sek a.

²⁴ Ahi, a phuh ahi puou a; ahi, a tuh ahi puou hi, a kung achun lei ah zung a khawh puou; zielo chule amah chun amau haw chuh a mût a, a vuoi u a, chinpei in buhsi a tawhmang guolin a tawkmang sek hi.

²⁵ Pathien Thiengtho chuh kuo tawh ahim, tehkal theih ding? Amah bang hi kuo a um?

²⁶ Chunglam a khun na mitteu hak to unla en un! Aksite khu kuo siem ahim! Amah chun sepaihte chuh kizawm zelin a puidawk sek a a min un a sam chiet sek a; A hatna nasat ziekin leh, thilhih theihna lama a hât ziekin, khatchale kimlo a um ngei puoi.

²⁷ “Ka buoina hi Lalpa’n hepha puo’n a, ka chung thu hi ka Pathien in a ngaihsak ta puoi” Bang dinga Jakob in ti thei a, zie tawbang chuh Israel in bang ti a gen thei na hiu em?

²⁸ Na lunggil un na he ngei puou hi? Na bil un na za kha puou hi? Lalpa chuh kumlekhuo Pathien, kâwlmawng tâwp tieng siempa chuh ahi ngâl a. Amah chuh a chau ngei puoh a, châwl le a châwl ngei puoh a; A chitna chuh hawldawk zawh guol ahi puoi.

²⁹ Chaute kawm achun hatna a pie sek a; hatna himhim nei lote kawm achun hatna a pie sek hi.

³⁰ Khangdawng laite nasan le chau in puk un tin uh, tangval thahat laite le puktha kêi un au:

³¹ Himahleh, Lalpa ngakte chun vang, a hâtnau chuh la thak kit untin; mupi bangin tha’n leng to untin; tai un tin, mahleh, châwl puou untin; chau lo in keng in chieh un au, ti’n.