ISAI 4 - PATHIEN LEKHABU THIENGTHO (BSI)

Lalgam hung um ding Muh lawkna

¹ Zie ni chuleh numei sagih in pasal khat tuu untin, Ka nek dinguh kihawl ing ka tingun, ka silhlechen dinguh kingaihtuoh ing ka tingun; na min mai nei putsak inla, ka minsietnau hi ei khuh sak in, ti’n gen un au.

Tunung a Zion Lopi na ding

² Zie ni chuleh Lalpa bâk chuh hawih tak leh lopi tak hung hi ta’n tin, a gam gahte chuh Israel chate laka suokcha ana umsunte a dinga kithang-at pih leh a lopinau hung hi ta’n a.

³ Khutichun, Zion a nutsieh a um nalaite leh Jerusalem a a damsung u a um dinga guotte chuh, “Mi thiengtho” tih hi’n au.

⁴ Lalpa’n vaihawmna thagau leh kâkthienna thagau a Zion chanute buokna a silngim a, Jerusalem a thisan suohna zieka buokna cheng a sawpngim tâk ziekin Zion a umte leh Jerusalem a umte chuh “Thiengtho” tih hita’n au.

⁵ Tichun, Lalpa’n, Zion tâng leh a kikhawmte chung achun, sun in meikhu, zan leh meikuong vak sawl sak ina, Pathien lopina chun khawpi sung chengcheng chuh khuh in vengbit ding ahi ngâl a.

⁶ Sun a nisa lum in a kâk loh na ding leh, guohpi-huihpi laka kihumbitna ding leh kisêlna dingin a lopina chuh bukcha guolin um ta’n a.