ISAI 39 - PATHIEN LEKHABU THIENGTHO (BSI)

Babulon apat a Enthate

¹ Zielai chun, Babulon Leng, Baladan chapa, Merodak-baladan chun, Leng Hezekia damlo hung dam kit thu a het ziekin, lehkha leh thilpiekte a thâk a.

² Tichun, Hezekia chuh a chungah a kipâk a. A kawm u ah thil mantam tak kawihna inte, dangka te, sana te, thil gimlim te, sathau mantam takte, a gâlvan kawihna In sung chengcheng te, a go pha laka um chengcheng te chuh a na etsak ta a. A insung a thil leh a gamsung a thil chengcheng chuh, Hezekia chun a etsak loh thil mawngmawng a um puoi.

³ Zielai chun thiemgau Isai chuh Hezekia kawmah a chieh a, a kawmah, “Na kawma hungte kha khawitak apat a hung ahiu hi? Banga a hung gen uh?” a ti a. Hezekia chun, “Gam gamla tak, Babulon apat a ka kawma hung ahiu hi,” a ti a.

⁴ Tichun, amah chun, “Na In a khan banga muu hi?” a ti a. Hezekia chun, “Ka In sunga um chengcheng hi a mu suok vek u a; ka go kawih khawmna thil ka etsak loh bangmah a um puoi.” ti’n a dâwng a.

⁵ Tichun, Isai chun, leng kawm achun, “Sepaihte Lalpa chun hiti hin a gen hi:

⁶ ‘Ngaitie, na In sunga um chengcheng leh, tuni tienga na pute’n a khawl khawmteu chuh Babulon lam ah puok mang in um intin; bangmah nutsieh um puo’n a. Khutibang nite chuh hungtung ina,’ Lalpa’n a tii.

⁷ Na chapa, nangmah gil a gah ngêi, khenkhat chuh pawmang untin, Babulon Leng In achun mitilgeh in hung um un au, a tii,” ti’n.

⁸ Tichun, leng Hezekia chun zie chuh, amah damsung a muonna leh bitna um ngêi ding ahi tih gena a ngaiin, a kawmah, “Lalpa apat a thu nei hilh hi a pha ie,” a ti a.