ISAI 37 - PATHIEN LEKHABU THIENGTHO (BSI)

Leng Hezekia’n Isai a Dawtna

¹ Chun, hiti hi ahi a, leng Hezekia chun a thugenteu chuh a zak phetin, a puonte a bawtthêk a, saidippuon a kikhuh a, Lalpa Ho-In sunga chun a lut a.

² A insung a lawiupa Eliakim leh lehkhazikpa Shebnah leh, thiempute upahaw chuh kawlladip puon kikhuh in, Amoz chapa thiemgau Isai kawmah a sawl ta a.

³ Chun, Hezekia chun hiti hin a thuthak a, “Tuni hi, gimtheih thawkna ni ahi a, gawt leh sukzahchak in ka um u a. Numei nau neih phat hita a, himahleh, nau nei dinga hatna neilo tawbang ka hiu.

⁴ Asuria Leng chun a milien Rabshakeh chuh Pathien hing gensie dingin a hun sawl a. Lalpa Pathien in a gensietnau chuh a za ta a; a thugen dungzui chun gawt tei hen. Zieziekchun, nutsieh a um mipite ding hin Pathien kawmah paucham sak in,” a ti a.

⁵ Khutichun, Leng Hezekia suokte chuh Isai kawmah a chieh u a,

⁶ Isai chun a kawm u ah, Na puu kawma chuh hiti ahih na gen dinguh ahi: “Lalpa chun hiti hin a tii, ‘Asuria leng suokte apat na thu zak a hun gensietnau kha na lauh loh ding ahi.

⁷ Ngaitiem u, amah achun thagau kawih ing ka ting, khutichun, bang thuthang ahim za’n tin, zie chun a gam lam ah chieh sak ding ahi a; a gam u achun chemzâm a that ding ka hi!’ a tii” ti’n.

Hezekia kawma Senacherib Thugen

⁸ Tichun, Rabshakeh chuh a vaikit a, Leng in Lakish a nusieh a, a kimvel khawpi naih, Libnah a do lai tak ahi tih a he a, tichun, amah hopih dingin tak achun a chieh ta a.

⁹ Chun, Ethiopia leng, Tirhakah chun, Aigupta sepaihte pui in, Asuria te do dingin a hung hi tih thu chuh Asuria te kawm a hungtung ta a. Leng in zie thu chuh a zak phetin, Juda Leng Hezekia kawm achun hiti hin lehkha a thâk a:

¹⁰ “Pathien, na kimuonpih chun, Jerusalem chuh ka khuta piek hi puo’n a ti’n a hun hilh a, himahlele, zie chun hun thêm zo kihen;

¹¹ Ngaitie, Asuria leng in sukmangthai ding a tih takphawt, nasa taka a suksiet dante kha na he ta a; zieziekchun, suokcha dingin na kigingcha a ahim?

¹² Ka pileputeu chun Gozan khawpite, Haran te, leh Rezeph te hihsie’n, Telassar gama Bethedana chêngte a na that u a, a pathienteu khatcha’n le a hukdawk thei puou hi.

¹³ Hamath lengte, Arphad lengte Sepharvaim khawpi lengte, Hena lengte, Ivah leng te, khah khawitak ah a um tau hi?” ti’n.

Hezekia Pauchamna

¹⁴ Tichun, Hezekia chun palaite khut apat chun lehkha chuh a la a, a vak sim a; tichun, Hezekia chuh Lalpa Ho-In achun a va chieh to a, Lalpa masang achun a phah ta a.

¹⁵ Tichun, Hezekia chuh Lalpa kawmah a paucham ta a:

¹⁶ “Bangkim hihthei Lalpa Pathien, Israel Pathien, Cherub te chunga chu, Nang hi, nang mai hi, lei chung luoh gam chengcheng Pathien chuh na hi a; nang chun lei leh van hi na siem ahi.

¹⁷ Tuhin, aw Lalpa, ei hun ngaitha’n la, ka chung u a thiltungte hi en tie! Nangmah, Pathien hing hun gensietna dinga Senacherib thugente chengcheng hi a na ngaitha’n la.

¹⁸ Lalpa, Asuria Leng chun, nam tamtak te sumangthai in, a gamteu a hihsie a;

¹⁹ a pathienteu, pathien tak hilo, mihing khuta, thing leh suong a siemte chuh a hâltum sek hi tih hi thudik ahi a.

²⁰ Tuhin, aw Lalpa Pathien, Asuria te khut apat hin ei hukdawk tei in, khutia chuh, khawvel a nam chengcheng in, nangmah mai hi Pathien na hi tih a het theihna dingun,” a ti a.

Isai manga Lalpa Dawnna

²¹ Zielai chun, Amoz chapa Isai chun Hezekia kawmah mi a sawl a, “Lalpa Israel Pathien chun hiti hin a tii: Asuria Leng Senacherib chungthu a ka kawma na paucham tâk ziekin,

²² A chungchâng thu Lalpa’n a gen chuh ziehi ahi: Zion chanu, nungak thiengtho chun nang a hun musit a, a hun nuihsan a, Jerusalem chanu chun na nung lam apat in a luchang a hun thinkhum hi.

²³ Kuo ahi na sukminsiet a na gensiet chuh? Kuo chungah ahim na aw na suksan a na mit na chung hah? Israel Pathien Thiengtho chung ngêi ah ahi.

²⁴ Na suokte mang in Lalpa chuh na suminsie a, a tâng sip achun ka kangtalai simsenloh tawh hung kalto in, Lebanon tâng tiengin ka hung to ta a; a sidar thing sang takte leh, a châk thing pha chite hi phuk ka ting, a tâng sip sangpen a kaldawk in, gammâng lei phatna mun achun lut ding ka hi.

²⁵ Tuilaihdawk ka lai a, tui ka dâwn sek a; Aigupta lui chengcheng chuh ka kêngpêk in tawh kang ing ka,” na ti a.

²⁶ “Keimah ngêi hin, malai apat a ziehaw chuh ka guot ahi a, malai pek a pata ziehaw chuh ka guonggalh ahi tih na he puo maw? Kulh nei khuote suchim dinga ka hun tih ahi.

²⁷ Zieziekchun, a sunga umte chuh, thahatna bei ahi tau a, a lungkieu a, a beidawng tau kha; phul hampa leh, in chunga hampa kek, a pitit masanga sak lam huih in a mût mang tawbang ahiu kha.

²⁸ “Kei chun chuh na kipatdawk laite, na chut hiet hiet laite, na lut leh na pawt te, ka chunga na lung-awihloh dante hi ka he suok vek hi!

²⁹ Ka chunga na lungnat ziek leh, na husa chuh ka bil a a hung lut tâk ziekin, ka ngakuoi chuh na nak ah vawh ing ka ting, thik bah chule na mûk ah vawh ka ting, na hungna lampi mah a khan hun leh kaih ding ka hi,” ti’n.

³⁰ Chun, Ziehi nang dingin melchikna ding hi’n a: tu kum hin buhsang sen un na tin uh, chun, a kum nihna ale alikek sen un na tin, chun, a kum thumna chun buh tuh un na tin uh, ât un na tin, grep huonte bawl in, a gah ne ta’n lau.

³¹ Chun, Juda insung mite laka a suokcha umsun te chuh, a suka zung khawh in, chunglam zuon in gah hun suoh kit ta’n au.

³² A suokcha umsunte chuh Jerusalem apat chun chiehdawk untin, chun, Zion tâng achun a suokcha te chuh cheng un au; Bangkim hihthei Lalpa phatchuom ngaihna chun zie chuh hih ding ahi ngâla.

³³ “Zieziekchun, Lalpa chun Asuria leng chungchâng thu ah, hiti hin a gen hi: ‘Amah chuh zie khawpi sung ahin hunglut puo’n tin; zie tak a hin thalpi chang khat le kap diek puo’n tin, a dona dingin lei kulh le siem diek puo’n au.

³⁴ A hungna lampi mah achun vaikit intin, zie khawpi hi hunglut puo’n a, Lalpa’n a tii.

³⁵ Keimah ziek leh ka suok David ziekin, zie khawpi hi hukbit in, hum ding ka hi,’ ti’n” a ti a.

Senacherib Thihna

³⁶ Tichun, Lalpa vânsâwlchâk chuh a va pawt a, Asuria te giehmun achun mi nuoikhat leh singgiet leh sangnga a that a, zingkal khuo a vak phet chun, ngaitie, mithi luong ngen cha a na um ta a.

³⁷ Khutichun, Asuria leng Senacherib chuh a pawt a, a In lam ah a vaikit ta a, Ninevi khuo achun a um zing ta a.

³⁸ Chun, a pathien, Nisrok a ho lai chun, a chapa Adramalek leh Sharezer te chun chemzâm in a sat lum u a, tichun, Ararat gam achun a taimang tau a. Tichun, a chapa, Esar-haddon chun, a thasang in vai a hawm ta a.