ISAI 36 - PATHIEN LEKHABU THIENGTHO (BSI)

Senacherib in Jerusalem a Vauna

¹ Chun, leng Hezekia vaihawm kum sawm leh kum li kum chun hiti hi ahi a. Asuria Leng Senacherib chun Juda gama khuo, kulhpi nei chengcheng chu a do a, a la vek ta a.

² Asuria Leng chun Rabshakeh chuh sepaih tamtak pui in, Lakish apat in Jerusalem a leng Hezekia kawm achun a sawl a. Sepaihte chun, dîl chungnung zaw apat a tui lâkna kawma puon sawpte nasepna muna, lamlien cheng chuh a luoh dim tau a.

³ Khutichun, leng inkawte chunga lawiupa Hilkiah chapa Eliakim te, lehkhazikpa Shabnah te, chanchin zikpa Asaph chapa Joah te chuh a kawmah a hung suk u a.

Rabshakeh, Vauna Thu

⁴ Tichun, Rabshakeh chun a kawm u ah, “Hezekia kawmah hiti hin gen un, Leng lopitak Asuria Leng chun hiti hin, a tii, na ginna na ngakna hi bang ahim?

⁵ Thu maimai a lemguotna hi galdona dinga thahatna hiding in na gingcha? Kuo chunga kinga a ka chunga kiphin na hi ta’m?

⁶ Ngaitie! zie luongkung kihek bawng Aigupta haw hi, na ginchak ahi hi, zie chuh mi’n luongkung kingaihna a a mat a, a khut a sût sak bang chauh ahi; Aigupta Leng Pharaoh chuh amah gingchate chung achun khutibang chuh ahi sek hi!”

⁷ “Himahleh, ka kawmah, ‘Lalpa ka Pathien u chuh ahi ka ginchak uh na tih uh chun, Amah chuh Hezekia’n Judate leh Jerusalem te kawmah,’ Zie maichâm masanga hi na ho dinguh ahi, ti’n, a munsangte leh a maichâmte a lâkmang sak kha hilo ahim?

⁸ Khutichun, hung inla ka pu Asuria leng kawma chun thu tiem inla, tichun, ken sakawl sangnih hun pie’ng ka, a chunga chu ding mi na neih theih ding phawt chun.

⁹ Aigupta te kangtalai leh a sakawlteu kisuonpih maimai in, ka pu siehmangte laka a neupen suokte hile nawhkit zo dinga kigingcha na him?

¹⁰ Zielo chun, Zie gam chuh do a susie dingin Lalpa tello a hung kuon a nei ngaihtuoh uh ahim? Lalpa chun ka kawmah, va chieh to inla zie gam hi susie dingin va do ah,” ei tih ahi ngâla.

¹¹ Chun, Eliakim leh Shebna leh Joah te chun, Rabshakeh kawm achun, “Lungsiet takin na suokte hi Aramaic pau in ei hopih in; zie chuh ka he thei ngâl u a; Hebrai pau in gen ki’n, kulh bâng chunga mi chengcheng in a na ngaithau ahi,” a tiu a.

¹² Himahlele Rabshakeh chun, “Ka pu chun na puu kawm leh nang haw kawm maia hin thugen dingin ei sawl ka hi a ahim? Kulh bang chunga chute, nangmau mah mah tawh êk hun ne ding leh, nangmau zun hun dâwn dingte kawma hin ei sawl zawk ka hi,” a ti a.

¹³ Chun, Rabshakeh chuh a ding dawka, Hebrai pau in aw ngeih tak in a kiko a, “Leng lopitak Asuria leng thu hi ngaithau in!

¹⁴ Leng chun hiti hin a tii, ‘Hezekia thep in um kiu in; amah chun nanguh hun hukdam theilo ding ahi ngâl a’:

¹⁵ Hezekia chun, ‘Thawnlo in Lalpa’n ei hukbit intin; zie khawpi hi Asuria Leng khut ah piek in um puo’n a,’ ti’n gen mahleh, Hezekia gen ziekin Lalpa chuh gingcha nuom diek kiu in.

¹⁶ Hezekia thu chuh ngaitha kiu in; Asuria Leng chun hiti hin a gen ngâl a, hung kipieu inla, kichamna siem in ka kawma hin hung suk un. Chun, ka hunga, mitin in amau grep gui chiet apat leh mitin in nangmau theipi kung apat in ne chiet un la, mitin in nangmau tuikhuk dâwn chiet un.

¹⁷ Ka hunga nangmau gam banga buh leh uain umna gam chângthâk leh grep huon haw umna gam a ka hun puihmang masang chun,

¹⁸ ‘Lalpa’n ei hukdawk ina,’ ti a Hezekia’n ahun thep khâk leh chingthei un, Namte pathien apat mawng mawng in a gam u chuh Asuria lengpa apat in a hukdam kha ngei uh a ahim?

¹⁹ Hamath leh Arphad pathiente kha khawitak ah a um tau hi? Sepharvaim pathiente kha khawitak ah a um tau hi? Samari khuo kha ka khut apat in a hukdawk uh a ahim?

²⁰ Zie gam haw pathiente chengcheng lak achun, a gam uh ka khut apat kuo a hukdawk kha ta? Lalpa chun Jerusalem hi kei apat in a hukdawk laizang ding ahim? ti’n” a ti a.

²¹ Leng Hezekia’n a hilh guolin, mipite chuh thipkêi in a um u a, kam khat cha’n le a dâwng puou hi.

²² Khutichun, leng insung a lawiupa Hilkiah chapa Eliakim te, lehkhazikpa Shebna te, chanchin zikpa Asaph chapa Joah te chuh lungkham a, van sie taka kivan in, Hezekia kawm achun a hungtung u a, Rabshakeh thugente chuh a hilh tau a.