ISAI 34 - PATHIEN LEKHABU THIENGTHO (BSI)

Namte chunga Vaihawmna

¹ Nang haw, namtina mite haw, hung khawm un! Hung khawm unla, ngaithau un! aw mipite haw ngaithau un. Lei leh a sunga um chengcheng te hung khawm unla, ngaithau un!

² Lalpa chun nam tinte chung leh, a sepaihte cheng chung achun lungnatna a nei ngâl a. Amau haw chuh a sumangthai vek a, thah dingin a pie ta a.

³ A lak uh a thaha umte chuh paih dawkin um untin, a luong uh chuh uih vengvung intin, tânghaw chuh thisan in luong ina.

⁴ Nisate, thate leh aksite khu sukmang in um intin, van khu lehkhabu ziel bangin kiziel mang intin; a sunga um chengte chuh, grep nah kau a vuoi a, a pulh sek bangin leh, theipi gahhut a pulh sek bangin, vuoi zo untin, pulh vek un au.

⁵ Lalpa’n van ah chemzâm a guonggalh zo ta a, Edom leh a mipite sukmangthaina dinga mawh a chansakte chuh do ina.

⁶ Kithawihna belam leh kel thisan guolin, a chemzâm chuh, a thisan u leh a thauteu chun dim ina. Lalpa’n zie kithawihna chuh Bozrah khawpi ah a lân a, zie chun, Edom gam achun kithahna huoisie tak a umsak ta a.

⁷ Mipite chuh zangsiel chal haw le a kiguola satpuk in um un au, bâwngchal tuoi haw le bâwngchal haw tawh; a gam u chun thisan kham un tin, a leivui u chuh thauna a sukthau in um ina.

⁸ Zie chuh Lalpa’n, Zion hukdawk a, a melmate chunga phuba a lâkna ni chuh hi ding ahi.

⁹ Chun, Edom gama luinakte chuh lawngnai suok sak in um intin, a leivuite chule kât suok sak in um in tin; A gam chuh lawngnai bangin ka luoh luoh ina.

¹⁰ A sun a zan in mit ni um ta puo’n tin, a meikhu chuh kumlekhuo’n chieh to vutvut ina, A kum a kum in a gam chuh sie deuh deuh intin, kumlekhuo’n, kuoma’n, a gam chuh hawh ta puo’n au.

¹¹ Muthîl leh sakuhte’n zie gam chuh luoh untin; simbute leh vaakte zie tak achun um untin; thilsiem masang guolin a gam chuh bangmah gahsuoh lo in um ina.

¹² A miphateu chuh gamsung vaihawm dingin sam un tin, himahleh, zie tak achun sap ding kuomah um puo’n tin; a milien hawu chengcheng chuh bangmahlo hi’n au.

¹³ Chun, a leng In teu achun hamlingneite kek intin, a kulhpiu sunghaw achun thakhai leh lingte kek dim intin; si-âlte leh simbute a sunga chun cheng un au.

¹⁴ Chun, gamthip a gamsate chuh si-âlte tawh kituok untin, sakelte chuh kisam tuoh det dut untin, ahi, zan thil lauh-um te chuh chawlhna ding hawl in hung untin, kichawldam tan au.

¹⁵ Zie chun, simbute’n bu sieh untin, tuite thau untin, note nei in enkawl un au. Ahi, mulukawlhte le akawp kawp in zie tak achun um un au.

¹⁶ Lalpa lehkhabu ah hawl unla, sim unla, ziehaw lak achun khatchale kimlo um puo’n tin, khatchale kawppih neilo um puo’n a. Lalpa ngêi chun khuti ding chun thu a pie a, a thagau chun a puikhawm ahi.

¹⁷ Lalpa chun amah khut in a gam dinguh a hawp saka, a chan dinguh a pie chiet ta a. Kumlekhuo’n nei untin, suon um sung chengcheng in taka chun cheng un au.