ISAI 32 - PATHIEN LEKHABU THIENGTHO (BSI)

Diktatna Lalgam

¹ Ngaitie, leng khat chuh diktat takin vaihawm in chu’n tin, a miliente chun vaihawmna diktak in vaihawm un au.

² Amah chu huihpi laka kisêlna, guohpi laka kisêlna mun bang hi’n tin; thalek gama luicha tui luong leh, gam haksa a suongpi lim tawbang hi’n a.

³ Zie tieng chuleh, muh theih na mit neite chuh sukthim hi puo’n tin, chun, zakna dinga bil neite chun le ngaitha ta’n au.

⁴ Ngaklah takin thil mawk hih phut ta puo’n tin uh, hethiem takin hih untin, a tih u chuh chientakin gen dawk un au.

⁵ Mingawl chu mi thupi ti kit ta puou un tin, mi lelo chule mi zahum ti kit diek ta puo’n au.

⁶ Mingawl chun ngawl takin thu gen dawk intin, thil phalo hih ding chu guonggalh khawl ina. Lalpa sukmuolpho na ding lam ngen gen in, gilkielte chuh an a pie ngei puou a, dangchâkte kawm ale dâwn ding a pie diek puou hi.

⁷ Mi gukhah chu phalo tak ahi a, mi chagahte chu zuou thu a hihsie ding in, thil gilo a sawmdawk u a, chagahte le a diknau ale a nang chak kêi sek hi.

⁸ Himahleh, mi zah-um chun diktakin hih intin, thudik achun ding det ina.

Jerusalem Numeite Hilhna

⁹ Numei, kinawptelte haw, dingdawk unla, ka thugen hi ngaitha tiem u; chanu ngaihsamte haw, ka thugen ahin bil dawh un.

¹⁰ Numei ngaihsamte haw! ka aw hi ngaithau in; tuhin lungkim takin na um nau a, tu a pat kum khat nung leh grep lâkkhâwm ding um talo ding ahih ziekin beidawng a kithing ding na hiu ui.

¹¹ Hindan nuom takin na hing u a, lungkhamna neilo hielin, himahleh tuhin, lau in kithing un! Kisuohthau unla, sangawn in um unla, na kâwng u ah kawlladip puon chengun!

¹² Lungkham in na âwm uh kichup un, lo pha tak tak leh grep huonte chu suksiet zawh ahi ta ngâl a.

¹³ Ka mite gama chun hamlingnei leh khau a kek dim zaw tau hi. Ahi, kipâk taka na um seknau Inhaw leh, mihing a dim sek khawpi ziek chun kap un!

¹⁴ Leng In chuh taihsan a um in, mipi a dim sek khawpi ngêi chu nutsieh ahi ta a, In lopi tak tak leh a gâlven bûkte chu gamsate chênna mun hung hi’n tin; gam sabiltung leh belam hawnte chuh muong takin ta ta’n au.

¹⁵ Himahleh, khatvei chuh, Pathien in a Thagau chuh hun sungtha kit intin, gam chulnung chuh lei pha hung chang kit intin, Lote chun gah hun suoh kit ina.

Chamna Pathien Vaihawmna

¹⁶ Zie ni chuleh, gam thip achun thudika vaihawmna chuh um ta’n tin, muntin ah diktatna um zing ta’n a.

¹⁷ Tichun, diktatna gah chuh kichamna hi’n tin, chun, diktatna apat chun muonna leh kumlekhuo a taksan umna um zing ta’n a.

¹⁸ Ka mipite ding chun lungkhamna um ta puo’n tin, a mite chuh bit tak leh muong takin um ta’n au.

¹⁹ Himahleh, gammâng chuh bei vek ta’n tin, chun, khawpi chule tawhniem in um ta’n a.

²⁰ Lui pang mun tina thaichi chîngte leh, ganhawn leh sabiltungte tatna dinga hampa phatna mun neite chuh bang tieng a mi kipâk ahi ta ding um!