ISAI 31 - PATHIEN LEKHABU THIENGTHO (BSI)

Pathien in Jerusalem Humbit ina

¹ Aigupta panpihna hawla chieh te! Aigupta sepaih hatna leh sakawl leh a kangtalai te leh, sepaihte chunga kingate, Lalpa Israel Pathien thiengtho chunga kinga lote chuh a chung uh a gik hi!

² Amah chuh a pil a, sietna a tun sak sek a; a thugen chuh a zukkik ngei puoh a, mahleh, thil phalo hihte chuh hun do ngêi ngêi intin; thil phalo lama mi ana panpihte chuh gawt ngêi ngêi ding ahi.

³ Aigupta mite chuh Pathien ahi puou a, mihing mai ahiu hi; a sakawlteu chuh thagau ahi puoh a, phehlevo mai ahi ngâl a; tichun Lalpa’n a khut a thâk tieng leh, namte chuh puksieu un tin, a panpihte chule puk untin; a bawn u chun beimang khawm un au!

⁴ Lalpa chun hiti hin a tii, “Sakeibaknei ahim, sakeibaknei vanglai in a sa nek lai a humham khuma, belamchingte tamtak amah suol dingin sap dawkin um mahleh, a kiko u chuh lau lo a, a thawm ziek u a a kitim diek loh bang in, Sepaihte Lalpa chuh Zion tâng hukbit dingin hungsuk ding ahi.

⁵ Vacha a bu chung sang taka lenga, a note venbit guolin, Sepaihte Lalpa chun Jerusalem veng in humbit ding ahi ngâla, vengbit in hukdawk in tin, hing hawih in humbit ding ahi.”

⁶ “Aw Israel mipite haw, nasatak in amah ana do ta mahleu chun, a kawmah hung kileh kit tau in.

⁷ Zie ni chuleh, mitin in sana leh dangkaguo milimte, na gitlohna khutsuok te chuh hun paihmang ding na hi ngâl u a.

⁸ Asuria te chuh mihing thilhih theihna hilo a, chemzâma sukmangthai in um un au. Asuria te chuh kidona ah taisieu un tin, a tangvalteu chuh nasem a pawnggawih in um un au.

⁹ Chun, a kulhpiu chuh lau in taimang intin; a milienteu chuh tiemtehna ziekin lungzîng tan au,” ti’n, Lalpa’n a mei Zion a um leh a hâltuina mei Jerusalem a um chun a tii.