ISAI 30 - PATHIEN LEKHABU THIENGTHO (BSI)

Aigupta chunga Kingak Muon-um lo

¹ Lalpa chun, “Cha, helchîngte chung chuh a gik hi! Ziete chun mi thu a dawng u a, kei chu vang ei dawng puou a; a gitlohna chung u a gitlohna behlapna dingin khuhna’n a khuh u a, ka thagau thu’n vang a khuh puoh ngâl u a.

² Aigupta leng Pharaoh lim bel dingin, Aigupta leng dawng dingin, Kei ei dawng lo in, Aigupta ah a chieh suk u a,

³ Aigupta leng chun amau haw panpih dingin hatna nei puo’n tin, Aigupta te lim na belh u chuh na zahhuoi nau hung hi’n a.

⁴ A gam palai teu chuh Aigupta khawpi Zoan ah a um u a, a palai teu chuh Hanesh ah um mahleu,

⁵ Mipite chuh nam kingakna tâk lo leh, panpih thei lote chunga a kingak ziek u chun muolpho un au.”

⁶ Ziehi simlam a gamsate chunga chunggik na hungtung ding chuh ahi: “Buoina leh lungzînna adim gam achun, sakeibaknei-nu leh sakeibaknei humham leh gûl gu nei leh gûl leng theite umna gam achun; A neih leh lam teu chuh a sabiltungteu a puok sak u a, a sangawngsau teu chuh a sana leh dangkate chuh a puok sak u a, amau haw panpih theilo namte kawma chun a chieh u a.

⁷ Aigupta te chun la bangmah panpih theihna a nei puou a. Zieziekchun, Aigupta min ding chuh, ‘Mi suna lo Gulpi,’ ka sa ta a,” ti’n.

⁸ Tuhin chieh inla, ziehaw chuh a masang u ah suongpek ah zik inla, lehkhabu ale zik in, zie chuh tunung a kumlekhuo a hetpihtu a pang ding ahi.

⁹ Ziehaw chuh mi kiphin chîngte, cha lepchiehte, Lalpa dân ngaitha nuom lote ahi ngâl u a.

¹⁰ Thiemgaute kawmah, “Thil dikte chuh ei hilhlawk kiu in, thil nuom lam ngen ka kawm u ah gen un, thepna thu genlawk un;

¹¹ Lampi hilo ah chieh un, lam sik ah pet un. Israel Mi thiengtho thu ka ngaitha nuom puou ui,” ti sekte ahi ngâl u a.

¹² Zieziekchun, Israel Pathien thiengtho chun hiti hin a gen a, “A thu hi na muhsit ziekun leh, nuoisiehna leh thukhelna na taksan u a, a chunga na kingak ziekun.

¹³ Zie manlohna hi, nang u dingin suong bang sangtak, a sietna chim vang vang, khi el-ul, thakhat a, mitphetlohkal a chim zieng ding tawbang hi’n a.

¹⁴ Tichun, bêldêngpa bel bangin, sit umlo hiela gawp in, a hal lak ah, thuk a mei lâkna ding ahim, tuikhuk a tui thalna ding natieng umlo khawp in sukêk ing ka,” ti’n.

¹⁵ Lalpa Pathien, Israel Mi thiengtho chun, “Vaikit un la, muong takin ei gingcha mai leu chun; hukdam in um in na tin un; thipkêi in ei gingcha mai leu chin hung hât un na tin, bit un lau,” a ti a. Himahlele, na nuom ngâl puou a.

¹⁶ “Nang u chun la, hilo e, sakawl chunga chu’n taimang ung kau,” na ti zaw ngâl u a, zieziekchun, zie chun taimang ngêi un na tin; chun, “Thil hattak chungah chu’ng kau,” na tiu a; zieziekchun, a hun delh dingte chu, nang haw sanga hât zaw hi’nau.

¹⁷ Mi khat lau in mi sang khat tai un na tin; mi nga lau in, a hawn in taisie dup dup unlau; a tâwp leh, tângsip a piel pak tak bang leh, muol chunga melchikna um bangin nutsieh in um unlau.

A Mite kawma Pathien Thutiem

¹⁸ Himahleh, Lalpa’n hun lungsiet in, hun ngak intin, nang haw hun lungsiet dingin a kisazo zing a, thil dik a hih sek ziekin; Lalpa chun diktaka vai a hawm sek ziekin amah ngakte cheng chuh mi hampha ahiu hi.

¹⁹ Zieziekchun, nang haw Jerusalem a cheng, Zion mipite chuh kap kit ta puo’n lau. Lalpa chuh mi lungsiet thei tak ahi a, panpihna ngên a na kiko tieng u leh hun dâwng ina.

²⁰ Lalpa chun lungkhamna an leh gimtheihna tui hun pie mahleh, nanguh hun sinsakpa chun hun kiselmang san ta puo’n tin, na mit un a hun Sinsak chuh mu zaw ta’n lau.

²¹ Chuleh, changlam ahim, veilam ahim a na petmang tieng u leh, na nung lam u a thu kigen na bil in za’n tin, “Zie lam hi lampi dik ahi, zui un” a tihna aw za zel un lau.

²² Zie tieng chuleh, dangka tui luon khuma na milim siem uh leh, sana tui luon khuma na milim sun uh chuh paihmang un na tin, a kawma chun, “Ka mit muh phâk loh uh ah chieh mang un,” ti’n lau.

²³ Tichun, amah chun, lei a na buh chi tuh teu a dingin guoh hun zuk sak ta’n tin, Chuleh, lei in gah ahun suohdawk chuh tamtak, lim tak tak hung hita’n a. Zie ni chuleh, na ganchateu chuh, hampa phatna mun lien tak achun ta hiet hiet ta’n au.

²⁴ Lokai a na mat uh bâwngchal leh sabiltung te chun le gancha an phapen leh tiengvang leh gawdala sêp ngimsa ne’n au.

²⁵ Chun, kithahna huoisie ni a, gâlven insangte a chip ni chun, tâng sang cheng leh muol sang cheng achun luipite leh luicha tui luong hum hum ina.

²⁶ Zielo chun le, Lalpa’n a mite liemna a tuom sak ni, a liemmateu a sukdam ni chun, tha chuh nisa guolin vak ta’ntin, nisa chuh a leh sagih in, ni sagih a kigawm bang hielin vak ta’n a.

Asuria chunga Lalpa Vaihawmna

²⁷ Ngaitie! Lalpa thilhih theihna leh a lungnat na mei khu kitung chuh gamla tak apat in a hung hi! A mûk chuh lung-awihlohna’n a dima, a lei chuh mei guola mi katum thei ahi.

²⁸ A hat git chuh luicha a kuong dima luong, ngâwng tieng chup a luong tawbang chuh ahi; namtinte chuh khen dawkna gawdal a sep in, mite’n a puihmang na dingun a kaihheina bulh ta’n au.

²⁹ Himahlele, nang haw, Pathien mite chuh, zan a kut thiengtho Kut guolin kipâk takin la sa’n lau. Israel humbitpa, Lalpa Ho-In a thil githeite leh châmngaite tawh chieh guolin kipâk un lau.

³⁰ Khutichun, Lalpa chun a aw lopi tak chuh zak sak ta’n tin, a lungnatna thilhih theihna huoisie tak tawh, Mei kuong leh vangi te, guohpi huihpi leh giel in a khutthak dân chuh sulang in.

³¹ Lalpa aw a zak tieng u leh Asuria te chuh lau un tin, a gawtna khauh dân chuh he ta’n au.

³² Lalpa’n amau haw a zêp zui chun, a mite chun thil githei leh khuong khen in zui un au. Pathien ngêi chun Asuria te chuh do ding ahi ngâl a.

³³ Tuma lam apat in Asuria leng meia hâlna ding chuh guonggalh khawlsa a hi ta ngâl a. Thuk tak leh lien tak leh, thing kisieh vum velvul a hi a. Lalpa’n zie hâlna ding chun a kawm apat in mei thahdawk in a.