ISAI 29 - PATHIEN LEKHABU THIENGTHO (BSI)

Jerusalem Sietna ding

¹ Ehe, Ariel, Ariel! David chênna khawpi! Na chung a gik hi! Kum khat hung beiin, kum dang hungtung zelin, Kut nite mang zel mahleh chin,

² Ahih ziekin, Ariel chuh subuoi ding ka hi; Zie tak achun kahna leh mauna um intin, Jerusalem chuh keia dingin Ariel tawbang hung hi’n a.

³ David guolin hun ûmkimvel ing ka ting, nang hun dona dingin gâlven bûkte sang ka ting; hun buluh ding ka hi.

⁴ Tichun, na aw chuh leinuoi thuk tak apat in pawt intin, na pau chuh leivui lak a mithi aw tawbang hi ta’n tin, tichun, na pau git chuh thagau aw tawbang in leivui apat in hung pawt chieu chieu ta’n a.

⁵ Himahleh, na melmate hawpi chu vang, leivui nêl tak bangin um untin; mi kihchak-um, mipite chuh buhsi lengmang sekte bang hin um un au, ahi, zie chuh mitphetlohkal in hungtung phut ina.

⁶ Van gite, inling te, thawm nasatak te, chinpei te, huihpi te, leh thil katum sek meikuong te mang in Sepaihte Lalpa’n hun gawt ding ahi.

⁷ Tichun, Ariel hun do, nam chengcheng mipite, amah leh a kulh dote chengcheng leh amah sulungkham chengcheng mipite chuh, zan mang bang phetin leh zan a lunggel bang chauh in beimang un au.

⁸ Mi gilkiel in mang a neih leh an ana ne seka, himahleh, a hung khanglo a, a sung chuh ana hawm zing bang hi hi’n a; a hihloh leh, mi dangchâk in mang a neih tieng tui ana dâwn seka, himahleh, a hung khanglo a, ana chauh a, tui a duhchak zing bang hi hi’n a; Zion tâng do nam cheng chengte haw chuh zie tawbang chuh hi’n au.

Vaulawkna Ngaihsaklo

⁹ Ding zing unla, maksau un! kimuhmawh sak unla, mitdûk in um den un! a kham u a, himahlele, uain ziek ahi puoi; a lawn a lawn u a, mahleh, zu dâwn ziek ahi puoi.

¹⁰ Lalpa chun, ihmut suokna thagau chuh na chunguh ah a sung tha a, na thiemgaute chuh mipite mit ahiu a, himahlele, nanguh thil mulawk theite, na mit uh ahun sukdûk sak ta a.

¹¹ Tichun, kilâkna thu hungtung ding cheng chuh, nang u dingin thu kiselgu leh, lehkhabu thu kiziel chak kêi bang ahi tai. Zie chuh a sim thei leh a hete kawmah, “Lungsiet takin ziehi sim ah,” ti’n pie mahleh, amah chun, “Ka sim thei puoi, a kichâl khum ahi ngâla,” ti’na.

¹² Chuleh, a sim thei lote chule pieu inla, a kawmah, “Lungsiet takin ziehi sim in,” ti’n pie lele, amah chun, “Ka sim thei puou,” ti zel ina.

¹³ Lalpa chun, “Zie te haw hin, a kam un ei naih u a; a mûk un ei limbawl u a, himahlele, a lunggil un la ei gamlat ngâl u a, ei ho sek u hi mihiem thupiek a a sinsak maimai bang uh ahi.

¹⁴ Zieziekchun ngaitie, zie mite chunga hin thil lamdang leh mak tak hih ka ting, lungthawng leh thilmak tak mai chuh: tichun a michingteu chitna chu mangthai ta’n tin, a mipil teu hetna chuh bangmahlo suok ina,” ti’n.

Malam a Kinepna

¹⁵ A lemguotteu Lalpa apat a thuk taka selte chung chuh a gik hi! A thilhih teu chuh a gûkin, kuomah muh loh dinga hih in, kuoma’n ei mu puoi ti’n a ngaihtuoh sek uh a.

¹⁶ Thil cheng hi na lehbulh vek u a, bêldêngpa chuh bellei tung bang a ngaih in a um dinga ahim? Thilsiem chun a siempa chuh, “Nang nei siem ka hi puoi,” a ti ngei em? “Ahihloh leh bel chun bel dengpa kawmah, Bangmah na he puoi,” a ti dinga ahim?

¹⁷ Chawmkhat sung mai hilo ahim Lebanon chuh lei pha gahsuoh a chansak a hih a, lei phatak mun chuh gammânga suok sak kit, ti a gen guolin.

¹⁸ Zie ni chuleh, bengngawngte chun lehkhabu kisim chuh a bil un za tau intin, mitdûk mit chun le thimnuoi leh thim lak apat chun mu ta’n au.

¹⁹ Mi kingainiem te chun Lalpa a kipahna thak chuh nei kit un tin; chun, mi chagahte chuh Israel mi thiengtho achun limbawl in um tan au.

²⁰ Minunsie te chuh um ta puou in tin, mi musitte chule sukmangthai in um un tin, thil phalo hih dinga chânggu zingte chule satthak hita’n au.

²¹ Mi themte leh mi gilote gawtna ding dal a, lepchieh gen a, mi dik thiemloh chansak te chuh Pathien in sumangthai vek ina.

²² Zieziekchun, Lalpa, Abraham hukdawkpa chun, Jakob insung thu achun hiti hin a tii “Jakob chuh zahhuoi in um ta puou un tin, a mai chuh le zakcha’n dângtha diek ta puo’n a.

²³ Ka khutsuok, a chateu chuh a lak uh a a muh tieng u leh, ka min chuh limbawl tau untin; maksa takin ka masangah dingun tin, Jakob Pathien hi kihcha ta’n au.

²⁴ Thagau a hihkhielte chun le hun hethiem tau untin, chun, mi phunchiekte chun le sinsakna chuh pawm ta’n au,” ti’n.