ISAI 28 - PATHIEN LEKHABU THIENGTHO (BSI)

Puitu, Thiempu, Thiemgau Thanghuoite

¹ E khai! Ephraim haw zukham hât leh kiletsakna lallukhuk chung leh a lopi nau pakcha tuoi zing lai, uain in a zawh sate chung chuh a gik hi.

² Ngaitie, Lalpa chun mihat, thilhih thei tak a nei a; amah chuh giel nasatak kie zungzung, huihpi thil susie gei gui bang leh, tuilien nasatak, let zuoh zuoh bang mai in, lei ah paih tha’na.

³ Ephraim te zukham chîng, uonna lukhuk chuh tawhden in um intin;

⁴ A hawihnau lopi chuh, pakcha pak vuoi lai tak, luiphai hausa taka um, nipi ma a theipi min masa, mi’n a muh muh a a khuta a lawh a, a nek zawh zieng bang chuh hi’n a.

⁵ Zie ni chun, a mipi ana umsunte ding chun Sepaihte Lalpa chuh, lopina lallukhuk bang leh hawihna lukhuk tawbang hi’n a.

⁶ Vaihawm a pang te dingin, vaihawmna dik hetna, kulh kawtkhak hun dote na lehnawh kitna dingin hatna hi’n a.

Jerusalem Suksietna ding Thu

⁷ Himahlele, amau haw chun uain ziekin a sukhiel tau a, khamtheih ziekin a lawn chui chui u a, thiempu te leh thiemgaute chule zukham in a lawn duoi duoi u a, uain valh zawhin a um u a, zu ziekin a hâwi duoi-duoi u a, kilâkna chuh a he thei ta puou hi; vaihawmna thu ale a kipalpai tau hi.

⁸ Mun thieng mawng mawng umlo khawp in, a dawhkhâng cheng u chuh luok leh thil ni’n in a dim zo a.

⁹ “Hetna lam chuh kuo’n a sinsak ta die? Thu vaithak chuh kuo hih a a hetsak ding? Nausen nawichep hai pan phet te leh nawichep lai kikaithate a ding ahi die?

¹⁰ Etsakna apat a etsakna, tatmuhna chunga tatmuh na; a tien a tien leh a bung a bung in, zie hin neuchah, zie khun neukhat,” tih ngen ahi ngâla.

¹¹ Ahi, mûk danglam pu mite mang in, pau chuom in zie mite kawm ahin thugen zaw ta’n a.

¹² “Zie tak hi chawlhdamna mun ahi, thachawlte chuh chawlhdam sak un; zie tak hi kisukhalhna mun” ti’n a kawm u ah gen mahleh, a ngaihsak nuom puou hi.

¹³ Zieziekchun Lalpa’n, a mal mal leh a tien a tien in leh, a bung a bung a hun sinsak a guot tak chuh! Tichun, na kalsuon tin uh achun kisuipai un na tin, sukliem in um un na tin, mat in um un na tin uh, tichun, sala puih in um un lau.

Zion a dinga a Ning a Suong

¹⁴ Zieziekchun, mi musitte haw, zie mi Jerusalem a umte, vaihawm sakte haw, Lalpa thu hi ngaithau in:

¹⁵ “Thihna kawmah thu na gawlh tau a, thihna khawvel tawh thu na tiem tau hi! Manthaina tui lien let chuh a luon pai tâk lele, keihaw tiengin hung luong puo’n a; lepchieh thute ka kihumbitna dingun ka mang u a, lepchieh nuoi ah ka kisel ta ngâl u a,” na tih ziekun.

¹⁶ Zieziekchun, Lalpa Pathien chun, “Ngaitiem u, Zion achun a ning a suong lul tak leh to tak ka lem hi, a ning achun suong detdo tak ka kawih a, a chung achun, ‘Amah gingcha taphawt chuh muolpho puo’n au,’ tih kizik chuh.

¹⁷ Chun, diktatna chuh a tehna khau in mang ing ka ting, ginumna chuh a etzawnna’n mang ing ka,” ti’n. Lepchieh thu kihumbitna a neite chuh giel in sep mang kêi intin, a kisêlna mun hawu chuh tui haw chun chup mang vek ina.

¹⁸ Zie tieng chuleh, thihna tawh na thugawlh u chuh bangmahlo hi’n tin, Sheol tawh na kihocham nau chule mattheih hita puo’n tin. Sietna tuilien a luon pai tieng chuleh zawhin um unlau.

¹⁹ A luon pai cheng leh hun tawk zel intin; zingkal tin leh sun chengin luong zing ding ahi ngâl a. Sun leh zan in zie chuh thuok zing unlau. thuthak hung pawt cheng chun lauhna thak hun tun khum zel ina.

²⁰ Zalkhun chuh kithuon na dingin chawm taluo’n tin, puon chule kikhuh dingin chawm taluo’n a.

²¹ A nasep, nasep lamdang chuh a sep theihna dingin leh, a thilhih, a thilhih makte chuh a muolsuoh theihna dingin, Lalpa chuh Perazim tânga a dindawk bang khan ding dawk intin, Gibeon guoma a lungnat bang khan lungna ding ahi ngâl a.

²² Vaulawkna thu ka hun piek hi nuihsan mai kiu in! Na nuihsan maimai u chun, nang haw dingin suohchak chuh hung haksa deuh deuh ding ahi. Sepaihte Lalpa’n, gam pumpi suksietna dinga, a thupukna siem chuh ka he ngâl a.

Pathien Chitna

²³ Na bil uh ana dawh unla, ka aw hi zau in; ngaithau inla, ka thugen hi zau in.

²⁴ Leilet pa chun chi thehna dingin lei a let zing dinga ahim? A leikalh leh a khetnel chuh a bawl zing dem?

²⁵ A chung chuh a chawhguol zawh tieng leh lengmasel leh pathikhawmte chuh a theh a. Buhte chuh a tien in, buhmante le a mun ding tak ah, mîm buhte le a ning zul ah a tuh sek hi.

²⁶ A Pathien in amah chuh diktak in a thunun in a sinsak sek ngâl a.

²⁷ Pathikhawm mu lâkna dingin buhphuol ah a chil khel khel puou a, zira mute lâkna dingin kangtalai keng a gawt ahi diek puoh a, mawlh a mang zaw sek ui.

²⁸ Buh chuh chângthâk dinga suknel ahi sek, himahleh, kuoma’n a chil thawh ngei puou a, sakawlkangtalai a chil sak u a, himahleh, a gawt nêl diek puoi.

²⁹ Zie tawbanga chitna cheng chuh sepaihte Lalpa apat ahi ngâl a. A lemguot chuh a mak a, a chitna le a chungchuong hi.