ISAI 27 - PATHIEN LEKHABU THIENGTHO (BSI)

Israel Hukdawkna leh Puihkhawmna

¹ Zie ni chuleh Lalpa chun, a chemzâm hiem hawih tak, lopi tak leh thilhih thei tak chun Leviathan gulpi hattak leh, Leviathan gulpi kiviel ngeungo chuh gawt intin, tuipi a dragon chule that ina.

² Zie ni chuleh grep huon hawih tak limbawl in la sau un:

³ “Kei Lalpa hi a enkawlpa chuh ka hi a, mitphetkal tinin tui ka buok zing a, Kuoma’n a khawih lohna dingun a sun a zan in veng ing ka.

⁴ Grepte chung achun lungna ta puo’ng ka ting, ling leh hamlingneite’n ei hun do u chun amau haw do dingin chieh ing ka ting, mun khat ah hâl tum ding ka hi.

⁵ Khutichu ahih loh chun, ei tuzing u henla, ka humbitna a deih u chun, ka angsung ah hung puklut u henla; ahi, ei kichampih u hen.”

⁶ Hun hungtung ding achun, Jakob chun zung kai untin; Israel chuh hung mûm in, a pak hung um un au. Tichun, lei chung hi gah in sudim un au.

⁷ Amah zêpte a zêp bangtak in, Israel te chuh a gawt em? Ahihloh leh, amau thatte chuh a thah vek bangin amau chuh a that sek em?

⁸ Lalpa’n mipite a gawtna chuh sala a sawl a a nawhdawk chuh ahi a. Saklam huih chun amau chuh a puimang ta a.

⁹ Zieziekchun, Jakob te manlohna chuh zie hin sawp thien hi’n tin, ziehi a gitloh nau gah ngen ahi, Asher leh nisa limte chuh thokit talo ding khawp in, maichâm suong chengcheng chuh phel lemlum a bawl ahiu ui. (Himahlele, milim pathien maichâmte chuh, leia suongnip banga suknel leh, gimlim hâlna maichâm ahim, Asher pathien lim melchiknate chuh suksiet a hih ma’n, Israel te gitlohna chuh ngaihdam hi puo’n a.)

¹⁰ Khawpi kulh neite chuh a chim tha zo ta a. Gamgaw guola nutsieh leh thawmhau in a um a. Ganchate dinga kuolna mun leh hampa pehna mun chauh ahi tai.

¹¹ Thing bawkte chuh hung vuoi tha’n tin, bawng intin, tichun, numeite’n meia tih dingin chawm khawm un au. Mipite chun bangmah het theihna mawng mawng a nei puou a, a siempau Pathien in lungsietna leh a chung u a zahngaihna himhim latsak ta puo’n a.

¹² Zie ni chuleh, Euphrates luipi apat in, Aigupta luipi tiengin, Lalpa’n buhchil in hun chil ina, Aw Israel mipite haw, khat khata puihkhawm a um ding na hiu.

¹³ Zie ni chuleh, Asuria leh Aigupta gama nawhdawka umte sap khawm kitna dingin, pengkun lopi tak chuh mût untin, tichun, hung khawm un tin, Jerusalem a Tang Thiengtho achun Lalpa chuh ho ta’n au.