ISAI 26 - PATHIEN LEKHABU THIENGTHO (BSI)

Juda Guolzawhna La

¹ Zie ni chuleh Juda gama chun zie la hi sa’nau: Khawpi dettak I nei u a; Pathien ngêi chun Hukdamna chuh kulhpi bangin a tungdawk a!

² A ginnau tuchak zing nam diktat te chuh a lut theihna dingin, a kawtpi te chuh hawng un!

³ Lalpa, na chunga lungthim ngate chuh, nangmah a hun ginchak ziekin, lungmuong taka um dingin veng in la.

⁴ Lalpa chuh kumlekhuo’n muong un: Lalpa, Jehovah ahi a; kumsawt suongpi ahi.

⁵ Amah chun chapo taka umte chuh a suniem ta ngâl a, khawpi dettak leh sang tak a sunga chêngte chu tawh a kulh bângte chuh leivui a suok sak ta a.

⁶ Kenga tawh den in um intin, gimtheite keng leh chagahte kalsuon ngêi chun.

⁷ Mi diktat lampi chuh dikna ahi a, nang lunggil diktak pu chun; mi diktat lampi chuh na hihzang sek hi.

⁸ Ahi, aw Lalpa, na vaihawmna lampi achun ka hun ngak zing u a, ka hinnau in a deihlam chuh na min lawh leh nangmah hetzingna gendawk hi ahi.

⁹ Zan lai in ka hinna’n a hun thangaih a, Ahi, ka sunga ka thagau hin tihtak zetin zingkal matak in hun hawl ing ka; leichung a vai na hawm tieng leh, leichung a umte chun diktatna chuh a zil sek ngâl u a.

¹⁰ Minunsie chuh deihsak in um mahleh, thil dik sin diek puo’n a: dikna gam achun diklo takin hih intin, Lalpa lopina chuh mu diek puo’n a.

¹¹ Aw Lalpa, na khut chuh na dawmsang a, himahleh a mu ngâl puou a; amahvang chuh, mite dinga na phatchuomngaihna chuh muu untin, zakcha ta’n au; ahi, nang hun dote chuh mei in kângtum ina.

¹² Aw Lalpa, nangin chamna ei guotsak in na tin, ka nasep dawk chengcheng le, nangmah ziek ahi ngâl a.

¹³ Aw Lalpa, ka Pathien uh, nang tih loh mi dangte’n ka chung u ah vaihawm mahleu, kei un vang nang min mai chuh ka hedawk zing ui.

¹⁴ Amau haw chuh a thi tau a, hingkit ta puo’n au; a bei tau a, thokit ta puo’n au; a ziek chuh, nangin amau haw chuh a tawpna dingun, na gawt in, na sumangthai ta a.

¹⁵ Himahleh, Aw Lalpa, namte chuh na supung a, ka namteu chuh na supung ta a, nang chuh lopina piek in na um ta a, gamgite cheng chuh na keklien ta a.

¹⁶ Aw Lalpa, a lungdawn lai un a hun hawl u a, na mite chuh na thunun tieng leh na masang ah a paucham sek ui;

¹⁷ Numei nauvawp, hinthak hun nai ta chuh a na seka, nauhanat a kiu luoiluoi tawbang bang hin, Aw Lalpa kei u le na ma ah ka um sek u kha!

¹⁸ Nau ka vawp u a, himahleh, ka nauvawp u chuh huih bangmai ahi a; leichung ahin guolzawhna ka nei puou a; chun, khawvel luoh ding in kuomah a pieng puou hi.

¹⁹ Na mithi te chuh hung hing kit untin, a luongteu chuh hung tho kit ina. Aw nang haw leivui a ipmute haw, hung tho unla, kipahna la sau in. Na dâichîm chuh thaichi dâichîm bang ahi a, hun sawt taka ana thite chuh lei hin hun paih dawk ding ahi ngâl a, tih hi.

Vaihawmna leh Tundawk kitna

²⁰ Aw ka mite haw, hung unla, na indan sung u ah lut un, na kawtteu chuh kikhakkhum un; lungnatna hi a beih ma chengin hun chawmchah mai va kisel un.

²¹ Ngaitiem u! Lalpa chuh leichung a mite gitloh ziek a gawt dingin, a umna apat in hung pawt ding ahi. A gûka thisan a suoh teu chuh lei in sulang ta’n tin, lei hin a mi thahteu chuh sel ta puo’n a.