ISAI 24 - PATHIEN LEKHABU THIENGTHO (BSI)

Lei chunga Lalpa Vaihawmna

¹ Ngaitie, Lalpa chun lei hi suhawm intin, susie ding ahi. Leichung hi thing intin, a luohte chuh sudalh vek ding ahi.

² Mi vantâng te chunga a um bangin, thiempute chunga le um ina, suokpa chunga a um bangin, a pu chunga le um ina, suoknu chunga a um bangin, a pi chunga le um ina, palâksakpa chunga a um bangin, a palâkpa chunga le um ina, a lawk hawla palâksakpa chunga a um bangin, a kawma a lawk piepa chunga le um ina.

³ Lei pumpi hi thehdalh in um intin, suksiet in um ina. Zie thu chuh Lalpa’n a gen ta a, hih in um ina.

⁴ Lei hi a gaw a, a chul ta a; khawvel hi a chau in, a tuoi a, van sang haw chule a chau tau hi.

⁵ Lei hi a chunga chêngte ziekin a pawlhcheh zo ta a; Pathien danhaw chuh a bawhsieu a, kumlekhuo a thugawlh chuh a bawhsiet tâk ziek un.

⁶ Zieziekchun, lei hi Pathien in hansie a buok khum ta a, a luohte thilhih ziek ngeia thiemloh chansakin a um tai. Zieziekchun, atawm deuh deuh u a, mi tawmcha mai nutsieh in a um tau hi.

⁷ Grep gui chuh a chau a, uain thak chuh a put ta puoh a; lungthima kipâk chengte chuh mauna’n a dim tai.

⁸ Khuongneu haw git chuh a châwl a, kipahna thawm chuh a thip ta a, kingkang pek a kipâk git chuh a dai ta a.

⁹ La sa kawmin uain dâwn ta puou untin, zu chuh a dawnte dingin kha tak hi’n a.

¹⁰ Khawpi chuh buoina’n a dim ta a; kuomah a lut leh pawt a um lohna dingun in cheng chuh khak in a um tai.

¹¹ Uain duhchak ziekin kawtthêl achun kah thawm a um a, kipahna cheng chuh sukthip in a um a, zie gama kipahna chuh a bei tai.

¹² Khawpi chuh a hawma nutsieh in a um a, chun, kulh kawtkhak chuh khet siet in a um tai.

Juda a na Umsunte

¹³ Lei chunga mi chengcheng chungah, hiti bang hin hung um ding ahi ngâl a, olive thing khet nunga a gah a na um sek bang leh, grep lawh nunga muh khelh a na um sek bang hi hi’n a.

¹⁴ Amau chun kipâk in aw suoh un tin, tum lama mite chun Lalpa lopi zie chuh gen untin; chun, suohlam gama mite chun pakcha’nau.

¹⁵ Zie ziek chun, ni suohna lam a chêngte chun Lalpa pakchau in tin; tuipi panga chêngte chun Lalpa min chuh lopina pie’n au, Israel Pathien chuh!

¹⁶ Kâwlmawng tâwp apat chun, DIKTATNA PATHIEN pahchakna la chuh zak in a um a. Himahlele, kei dingin kinepna a um diek puoi! Ka gawng deuh deuh a! Mi themte chun ei thêm zing u a, a chalaknau chuh a nasa deuh deuh ngâl a.

¹⁷ Leichung a chêngte a ding in, Thil tizat-um te, Khuksekuo leh thângte’n a hun ngak hi!

¹⁸ Tichun hiti hi hi’n tin, thil tizat-um thawm zieka taite chuh kawkhuk ah kieu untin, kawkhuk a pawtdawkte chuh thâng ah âwk un au. Van apat in guohpi nasa takin hung zu’n tin, lei kingakna hi suklîng in um ina.

¹⁹ Lei hi suksiet dimdem ahi ta a, lei hi a kithehdalh ta a; lei hi nasa takin a kilîng a.

²⁰ Lei hi zukham bangin lawn duoi duoi intin, huihpi’n bukcha a sawih bangin kisawi zawk zawk ina. Khawvel hi a gitlohna’n delh chim intin; tichun, tho kit ta puo’n a.

Jentel Thuneihna Suksietna

²¹ Chun, zie ni chuleh hiti hi hi’n tin, Lalpa chun chunglama mi chungnung haw lawi lien tak tak chuh gawt intin, lei a leng haw cheng tawh.

²² Chun, amau haw chuh suongkultâng bangin kawkhuk ah khum khawm intin, a gawtna ding ni a tun ma cheng chuh khâk khum intin; ni sawttak nung leh gawt ina.

²³ Zie tieng chuleh, tha chuh hung thim intin, nisa le vak diek ta puo’n a, Sepaihte Lalpa chuh Zion tâng leh Jerusalem achun leng a um ding ahi ngâla; tichun, a upate masang a chun a lopina latsak ding ahi ngâla.