ISAI 23 - PATHIEN LEKHABU THIENGTHO (BSI)

Tura leh Sidon Sietna

¹ Tura chung a tunung a thil hungtung ding chuh ziehi ahi: Tarshis lawngpute haw, lungkham in kiko un; Tura a na lawng chawlhna mun teu chuh a hawm in a um ta a; a inte leh a lawng chawlhna munte chuh a sie zo tai! Kupra apat a na lawng uh a hungkit phetin, zie thu chuh na za tau a.

² Aw luipi panga chêngte haw, thipkêi in um un; Sidon a sumkawlveite haw, na thu pawte chun tuisuohgiet a kân u a;

³ Luipi lien tak chungah a um u a, Na sumnak chuh Shihor buhte leh Nile luia buh kilakhawmte chuh ahiu hi.

⁴ Aw Sidon, zakcha’n, tuipi chun thu a gen ta a; tuipi a kulhbangte chun a gen u a “Nauvei in ka na kha puoh a, hin le ka hing kha puoi. Chanu ahim, chapa ahim le ka vak lien kha puoi,” ti’n.

⁵ Aigupta te nasan le, Tura sietna a zak tieng u leh, lungthawng in, mak sa’nau.

⁶ Tarshis-ah va galkai unla, lui panga chêngte haw, mitthi thiek a kap in kiko chuoi chuoi un!

⁷ Ziehi Tura khawpi, tuma lama kipâk mah mah, kha maw ahih! Ziehi maw khawpi, a mite Tuipi gala cheng dinga sawl sek kha a hih!

⁸ Leng vaihawmna khawpi, Tura chunga hin, ziehaw hi hungtung dinga kuo a guot? Zie taka sumkawlveite chuh leng chate ahiu a, zie taka sumkawlveite chuh leia mi zahumte ahi ngâl u a.

⁹ Sepaihte Lalpa chun a uonna chuh bangmahlo suoh sak ding leh, leia mi zahumte chengcheng muhsit um taka umsak dingin a guot ahi.

¹⁰ Aw Tarshis lawng liente, na gam lam u achun galkai un! Zie hi lawngchawlhna mun hitalo ahi.

¹¹ Lalpa’n tuipi chungah a khut a zak a, lalgam te chuh a susie vek ta a. Kanaan te kulhpi chuh suksiet vek dingin thu a pie tai.

¹² Chun, amah chun, “Aw Zidon chanu nungak thiengtho, nuoisieha um, chawihsân in um kit ngei ta puo’n la; tho inla, Kittim gam ah galkai in; zie tak achun le chawlhna mawngmawng mu diek puo’n la,” a ti a.

¹³ Kaldai te gam hi entie! Zie hi a mipite chuh ahi a; Asuria mite chun gamthip a gamsate dingin a mudawk tai; gâlven bûk sangte a sau a, zie a leng In te chuh a phieu a, a susie tau hi.

¹⁴ Aw Tarshis lawngpute haw, lungkham in kiko un! na kulhpi teu chuh suksiet ahi ta ngâl a.

¹⁵ Zie ni chun hiti hi hi’n tin, Tura khuo chuh kum sawmsagih, leng khat damsung chuh hetngilh in um ina; kum sawmsagih beih nung leh nawhchizuokte la a a gen bangun, Tura chunga chun hungtung ina.

¹⁶ Na kingkang chawi inla, khawpi kimvelin, nang nawhchizuok, hetngilh a um. Hetzing na hih theihna dingin ngaihnawp um takin la sa kit in.

¹⁷ Chun hiti hi hung hi’n tin, kum sawmsagih beih nung leh, Lalpa’n Tura chuh vehtha kit intin, tichun, a kiveina mun lui ah chieh kitin, lei chung a lalgam cheng kawm achun kizuokthang kit ta’n a.

¹⁸ A sum muhdawk leh a lawhte chuh Lalpa kienga piek thiengtho hi’n a; a lawk chuh khawlkhawm ahim, kawihkhâwm ahim hi diek puo’n a; a sum muhdawk chuh Lalpa masanga chêngte a ding ahi a, nieng taka a nek ding u leh, silhlechen hawih tak a neih theihna ding u a mat hi’n a.