ISAI 22 - PATHIEN LEKHABU THIENGTHO (BSI)

Jerusalem Chungchâng Thu

¹ Ziehi kilâkna guoma tunung thil kigen chuh ahi: Bang thil a hungtung a ahi ta’m? Bang zieka khawpi a mi chengcheng In chung a kalto na hiu hi?

² Khawpi sung chuh puok vengvung in husa leh lînglauhna’n a dim a. Na mi, gâla thite chuh, kidona a thah a hi puou a, chemzâm a thah le ahi puou hi.

³ Na milienteu chuh a taimang vek u a, meichang khat a kâp dawk mau in, mat in a um u a.

⁴ Zieziekchun, ei thahthau inla, ka mite thihna chunga chun thasie takin kap ing ka; ka mite haw chanu gâllâk a lak ahih thuu achun ei lungmuon guo se kiu in, ka ti a.

⁵ Kilâkna guom achun, Lalpa sepaihte Lalpa apat chun, buoina leh tawhden a umna ni leh, lungkhamna ni ahi ngâl a, kulhpi bang hihsietna leh, tâng te kawma panpih ngetna ni tunsak ding ahi.

⁶ Tichun, Elam gama sepaihte chuh, thalpi leh thalchang a kithuom in sakawl chungah a hung u a; Kir chun a gâlvan a dawk sak a.

⁷ Juda gama luiphai lei phatna pente chuh sakawlkangtalai in a dim a; sepaih sakawl chung chuong te chuh Jerusalem kawtkhak mai achun a ding dim tau hi.

⁸ Chun, Juda mite kisêlna pên chuh hâwkdawk ahi ta a. Zie ni chuh a hungtun phetin, gâlvan kawihkhawmna apat gâlvante na ladawk a.

⁹ Aw David khawpi sietna haw chule na mu a, Jerusalem a In cheng chuh na en viel a, tichun, kulhpi bâng siemphatna dinga suong lâkna dingin mun khenkhat chuh na susieu a.

¹⁰ Dil lui apat tui lâksuk kawih khawmna dingin, kulh bângte nih kikal achun tuikuong na kawih a.

¹¹ Khawpi sung ah tui kawihna na siem a. Himahlele, ziehaw a na guonggalhpa leh, malai apat a zie thilte hun tun sakpa Pathien lam chuh na ngaihsak puou hi.

¹² Zie ni chun, Lalpa Sepaihte Lalpa chun kap ding leh âwm kichup ding leh, sam met muih a saidippuon silh dingin a hun sama.

¹³ Himahlele, kipahna leh, lawpna te, bâwng thahna leh belam thahna te, zu leh sa nekna na nei zawu a, “Nêi tingun dâwn hitiu, zing leh thi ding I hi ngâl u a,” na tiu a.

¹⁴ Tichun, Sepaihte Lalpa chun ka kawmah thu a hun gen a, “Zie gitlohna na hihteu hi, na thih macheng un ngaihdam hita puo’n lau. Sepaih te Lalpa chun a tii,” ti’n.

Shebna Vaulawkna Thu

¹⁵ Lalpa, Sepaihte Lalpa chun hiti hin a tii; Chieh inla, leng insung a sum enkawlpa Shebna kawm achun va chieh inla,

¹⁶ Chun, a kawmah hiti hin gen ah, “Zie hin bang thuneihna na nei a, inkuon bang tawbang na nei a, zie tâng panga hi na thân ding na kilaih a, suongpi a chênna ding na kivihkuok ahi?

¹⁷ Ngaitie, Lalpa chun thakhat a hun la dawkin hun paih ding ahi; ahi, hun tuchak kêi ding ahi.

¹⁸ Amah chun thil lûm guolin hun paih intin, gam âwng lien tak ah hun paih lut ina. Zie tak achun na kisuonpih mah mah, sakawlkangtalai sîk a chun thi’n na tin, na pu In sunga dinga zahchâk um tak na hi ngâl a.

¹⁹ Na nasep na apat hun nawhdawk ing ka ting, na lawiupa hihna apat lawih thâk a um ding na hi,” ti’n

²⁰ Lalpa’n Shebna kawm achun, “Zie ni chuleh hiti hi hi’n tin, ka suok Eliakim, Hilkiah chapa chuh sam ing ka ting;

²¹ Amah chuh na puon-âk chuol hi âksak ing ka ting, na kâwnggak hin gâk ing ka ting, na vaihawmna hi a khut ah pie’ng ka ting; tichun, amah chuh Jerusalem a chêngte leh Judate dingin pa hi’n a.

²² Tichun, David chabi chuh a khut ah kawih ing ka ting, amah chun hawng intin, kuoma’n khâk puo’n tin; chun, khâk intin, kuoma’n hawng puo’n au.

²³ Amah chuh thikkilhna dettaka kilhchak a um bangin, sudet kêi ing ka ting, tichun, amah chuh a pilepute dingin limbawlna lalchutphah hi’n a.

²⁴ Chun, amah achun a pa Inkuonte lopina chengcheng chuh kikhai vek intin, a chate leh a suonte, ûmlebel neu tincheng, belhbu ûmlebel apat a tui kawihna ûmlebel chengcheng tiengin.

²⁵ Zie ni a hungtun tieng chuleh, thikkilh dettaka kikhen chuh hung lawng intin, satthak a um in, kie tha’n tin, a chunga thil gik um chengcheng chuh sukmangthai in um ta’n a”; Lalpa’n zie chuh a gen ta ngâla.