ISAI 21 - PATHIEN LEKHABU THIENGTHO (BSI)Babulon Puksietna ding 1 Ziehi Babulon chungchâng thu a thuchah chuh ahi: Simlam a chinpei a chiehpai bangin, gamgaw apat in, nam lauh-um tak apat chun a hung hi. 2 Kilâkna lungkham um tak ka kawma het sak ahi tai; lepchieh taka hihpa chun, lepchieh takin a hih a, hihsie sekte chun a hihsieu hi. Elam sepaihte chun a do u a! Media sepaihte chun khawpi chuh a sim tau a! Babulon te’n gimtheihna a bawlteu chengcheng chuh ka suhai vek tai. 3 Zieziekchun, ka kawngte hi natna nasa takin a dima, numei nauhanat guolin natna’n ei man ta a; bil a khuo za theilo khawp in natna ka thuok a, khaw mu theilo khawp in ka lungzîng a. 4 Ka lung a vai a, lau in ka kithing ta a. Nitâk ni nêm ka ngaklah sek kha kei dingin kithinna a hung suok ta a. 5 Kilâkna ka muhna achun, guolvakna a guonggalh zo tau a; puon phah chuh malzinte chutna dingin a kiphah a. A neu in, a chau a, hatkhat in thupiek a hun gen dawk u a: “Miliente haw, na phawteu guonggalh vak un,” a tiu a. 6 Lalpa chun ka kawmah hiti hin a gen a, “Chieh inla, gâlvengpa kawih in; amah chun a thilmuh chuh hun gen hen. 7 Sepaih hawnte, sakawl chung chuong, a kawp kawpa chiehte, sabiltung hawnte, sangawngsau hawnte, a muh chun guntaka et phat ding ahi,” ti’n. 8 Chun, amah chuh sakeibaknei guolin a kiko a: “Hepu, sun leh gâlven bûk chunga hin ka ding zing a, zan khuovak vakin ka venna muna hin ka um zing sek a. 9 Ngaitie! thakhat in, mihing hawn, sakawl chung chuong, a kawp kawpa chieh a hung ui,” ti’n. Amah chun, “Babulon khawpi chuh a chim tai! A chim tai; a pathien uh, milim siemkawmte chengcheng chuh lei ah suknel in a um tai,” ti’n a dawng a. 10 Ka mi Israel te haw, buh guola thehzak in na um u a, himahlele tuhin, Israel Pathien, sepaihte Lalpa apat a ka chanchin pha het chuh na kawm u ah a hun phuong tai! Edom Puokgik 11 Edom chungchâng thu chuh: Mi’n Edom tâng apat in ei sama, “Gâlvengpa, zan hi bangtik leh a bei die? Gâlvengpa, zan hi a bei vak ta die, ei hilh in,” ti’n. 12 Gâlvengpa chun, “Zingkal hi ding ahi tai, himahlele, zan hungtung kit ding ahi. Na dawt kit nawp u chun, hungkit unla, dâwng un,” ti’n. Arabia Puokgik 13 Ziehi, Arabia chungchâng thu chuh ahi: Aw Dedan te sangawngsau te haw, Arabia gama gamnuoi a giekte haw! 14 Dangchâkte kawm achun tui pieu inla. Tema gama umte a an un gâltaite chuh ana dâwn u a. 15 Chemzâm apat chun a taimang u a, chemzâm zûk dawksa apat ngêi chun, chun, thalpi zuk salsa apat leh kidona nasatak apat a taimang ahi ngâl u a. 16 Lalpa chun hiti hin ka kawmah a gen a, “Kithalawh kum sima kum khat sungin Kedar lopina chengcheng chuh mang zo intin. 17 Kedar mi hangsan, thalkap thiem umsunte chule tawmcha hung hi’n au, Lalpa Israel Pathien chun zie chuh a gen ta ngâl a,” ti’n. |
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
Bible Society of India