ISAI 2 - PATHIEN LEKHABU THIENGTHO (BSI)

Kumlekhuo a Chamna

¹ Amos chapa Isai in Judate leh Jerusalem chungchâng thu a muh chuh ziehi ahi:

² Ni nunung haw achun hiti hi hung hi’n tin, Lalpa Ho-In dinna tâng chuh tâng lien chung haw a sukdet hi’n tin, tâng dang cheng sanga sangpen hung hi’n tin, Nam tamtak a sung ah lut un au.

³ Tichun, mi tamtak te chuh hung un tin, “Hung tiem u, Lalpa tângah, Jakob Pathien In achun chiehto hitiu, tichun, a lampite I zuih theih na dingun amah chun ei sinsak ina; Zion apat in dân hung pawt in tin; Jerusalem apat in Lalpa thu hung pawt ding ahi ngâl a,” ti’n.

⁴ Chun, amah chun namte kal ah vaihawm intin, a chemzâmteu chuh lei lehna dingin sêk un tin, a tiengchateu chuh theikung vathahna chemcha dingin sêk un au. Nam khatin nam khat do dingin chemzâm pan ta puo’n tin uh galdo dân le zil diek ta puo’n au.

⁵ Aw Jakob suonte haw, hung un la, Lalpa vak achun leng hitiu.

Mi chapote Sukmangthaina

⁶ Suohlam dawi thilhih dante, Philistia dawite a chîng u a, gamdang mite tawh a kikhutzawp tâk ziekun na mi, Jakob insung chuh na nawlh ta a.

⁷ A gam u chuh dangka leh sana’n a dima, hauhsakna lam achun huntawk a nei puou hi. A gam u chuh sakawl in a dima a kangtalai teu chuh simsen guol ahi puoi.

⁸ A gam u chuh milim pathien in a dima, amau haw khutsuok masang achun a bawkkhup sek uh a.

⁹ Khutichun, mitin chuh sukniem leh sukmuolpho in a um u a, zieziekchun, Lalpa amau haw chuh ngaidam ki’n.

¹⁰ Lalpa lauh-um na apat leh a lopina lak apat kisêlna dingin, suongpi hawm achun lut unla, leivui lak ah kisel un.

¹¹ Zie ni chuleh mi kingaisangte chuh sukniem in um untin, mi chapote chuh tawh niemin um in au; Lalpa chauh chuh chawihsân in um ina.

¹² Sepaihte Lalpa chun mi chapote, kingaisangte leh mite chunga kikawih sang te chengcheng do na ding ni a guot tai.

¹³ Lebanon tânga sidar thing lopi leh sangtak, chawihsâna um chengcheng leh Bashan gama gangpi thing chengcheng te chuh sumangthai vek ina.

¹⁴ Tang lien sang tak chung haw leh tâng neu chawihsâna um chengcheng chung haw ah;

¹⁵ Insawng sang haw leh, kulh bâng sang takte haw le hihguol vek ina.

¹⁶ Tarshis lawng lien chengcheng leh, lawng neu hawihtak tak haw le hung tum ina.

¹⁷ Mihing kideihnate chuh suktawp hi’n tin, mite chapona haw chuh sukmangthai in um ina. Zie ni chuleh Lalpa chauh chuh chawihsân in um intin;

¹⁸ Chun, milim pathiente chuh kichien takin mangthai ta’n au.

¹⁹ Tichun, lei hi nasa taka sulîng dinga a hung kipat tieng chuleh, Lalpa lauh umna lak apat leh, thilhih theihna lopina lak apat chun mite chuh suongpi leh kâwlhâwm haw leh lei hawm haw a chun kisel un au.

²⁰ Zie ni chuleh mite’n a dangkaguo milimteu leh a sana milimteu, ho dinga a siem sekteu chuh buihaw leh bâkhaw kawmah paih un au.

²¹ Lei hi nasa taka sulîng dinga a kipat tieng leh, Lalpa lauh umna lak apat leh thilhih theihna lopina apat taihmang guo’n, suongpi hawm haw leh kâwl suongpi khi kal haw a chun lut un au.

²² A nak a hu a neih ziek chauh a hing, mihing, thi zieng theite ginchak hi haihsan tau un; bang lam ah ahim ginchak tâk a hihnau chuh?