ISAI 19 - PATHIEN LEKHABU THIENGTHO (BSI)

Aigupta Gawtna ding

¹ Aigupta gam puokgik chuh! Ngaitiem u, Lalpa chuh meipi hattak chunga chuong in, Aigupta gam a hungtung tai; Aigupta te milim pathien chuh a masang achun kithing lun lun untin, Aigupta mite lunggil chuh a sung u ah tuimang zo ina.

² Chun, Aigupta mite chuh, Aigupta mite mah do dingin chawktho ing ka ting, tichun, mitin in amah suohpih do in, mitin in amah invengte do in, kikâp un au; khuo leh khuo kido untin, gam leh gam kido un au.

³ Tichun, Aigupta te lemguot chuh susie’ng ka ting, a lunggilteu chuh hih buoi ing ka. Tichun, milimte leh, mitvaidawi thiemte leh thitha phunsân thiem zawlte leh dawithiemte chuh dawng un au.

⁴ Aigupta mite chuh lawiupa gilo tak khut ah pie’ng ka ting, tichun, leng lauh-um takin a chungu ah vaihawm ta’n a. Sepaihte Lalpa’n a tii.

⁵ Tichun, Nile luipi tuite chuh tawm intin, luite chuh awl awlin hung kang ina.

⁶ Lui tui haw le hung namsie’n tin, Aigupta gama tui luongte chuh hung kang deuh deuh intin, hung kangtan ina, tichun, phailuongte leh tui hampahaw chuh hung vuoi zo ina.

⁷ Nile lui panga gan tatna phulte leh, Nile lui panga thai chînte chuh hung gaw zo intin, tawh mang in um intin, bei mang ina.

⁸ Nga mante chule kap untin, Nile luipi a ngakuoi khâi sek cheng chengte chun a âwm-uh kichup untin, a ngakuoiteu leh tuia lenvai zak sek te chuh pannabei hung hi ta’n a.

⁹ Zielo chun, patngatpuon khawih mite leh puon vam gat mite chuh hung beidawng untin;

¹⁰ puongan mite leh nasem mi khutthiemte chuh lungkham in kêk gawp un au.

¹¹ Zoan khuo a miliente chuh ngawl lawh hiel untin Aigupta miching pên te lemguotna chule, gamsa lemguot bang phet hung hi ta’n a. Leng kawmah, “Miching chapa, malai lengte chapa ka hi, bangti dana ti ngam ahiu em?”

¹² Na miching te chuh khawitaka um ahiu em? Amau haw chun tuhin hun hilh zieng u hen, Aigupta gam chunga thil tung ding, Sepaihte Lalpa lemguot chuh he hen.

¹³ Zoan khuo a miliente chuh mingawl a hung hitau a, Noph khuo a miliente chuh thep in a um tau hi! Aigupta namte puitu ding hi leu kilawm a, himahlele mite a puimang zawu a!

¹⁴ Lalpa chun Aigupta te lak ah lochal na a umsak a, tichun, zukham mi chuh amah luok chunga a lawn duoi duoi bangin, Aigupta te chuh a nasep tin cheng u ah, a chieh kawisak ta a.

¹⁵ Aigupta mite ding chun mi hausa ahim, chagah ahim, mi pawimawhte ahim, pawimawh lo ahim in, sepsak theih him a um diek ta puoi.

Aigupta te’n Lalpa Ho un au

¹⁶ Zie ni chuleh, Aigupta te chuh, numei tawbanga dawilawk hiu un tin, Sepaihte Lalpa khut chuh amau haw gawt dinga, a chung u a a tun ziekin, lau in kilîng un au.

¹⁷ Lalpa’n Judate dinga a thil guonggalh chuh a het tieng u leh, Aigupta mite chuh suklauh in um un au.

¹⁸ A hun, a hungtun phat chuleh, Aigupta gama khawpi nga achun Hebrai pau kimang ina. Zie a mite chun, Sepaihte Lalpa min in kitiemna nei un tin, khawpite laka khat chuh, “Sietna Khawpi” ti a het hi’n a.

¹⁹ Zie ni chun, Aigupta gam lailung lai tak ah Lalpa dingin maichâm um intin, a gamgi achun Lalpa dingin suongphuh um ina.

²⁰ Zie chuh Aigupta gam achun, sepaihte Lalpa ding chun, a umna mun melchikna leh hetna hi’n tin. Mi sugimtheite zieka Lalpa a hun sap tieng u leh, ama’n hukdampa leh vengbitpa sawl intin, amah chun amau haw chuh hukdawk ina.

²¹ Tichun, Lalpa chuh Aigupta te kawmah kiphuong intin, Aigupta te chun zie ni chun Lalpa chuh he ta’n au. Kithawihna leh thilpiek in chibai bûk un tin Lalpa kawm achun thu tiem untin, a thutiem u chuh hih têi un au.

²² Lalpa chun Aigupta te chuh zêp intin, himahleh, zie hun chuleh sudam ina. Tichun, Lalpa kawmah vaikit untin, amah chun amau haw ngetna chuh za’n tin, amau haw chuh sudam ina.

²³ Zie ni chun Aigupta gam apat in Asuria gam tiengin lamlien um intin, tichun, Asuria mite chuh Aigupta gam ah chieh untin, Aigupta mite chule Asuria gam ah chieh un au. Aigupta mite chun, Asuria mite tawh Pathien ho khawm ta’n au.

²⁴ Zie ni chuleh, Israel te chuh Aigupta te leh Asuria te tawh kibang hiu untin, zie nam thum te chuh khawvel a dingin vangsakna hi’nau.

²⁵ Sepaihte Lalpa chun, “Ka mi, Aigupta te haw leh, ka khutsuok Asuria te haw leh ka gochan Israel te haw chuh vangsak in um u hen,” ti’n a vangsak ta ngâla.