ISAI 16 - PATHIEN LEKHABU THIENGTHO (BSI)

Moab Dinmun Siet dân

¹ Thalek gama Sela khawpi apat chun, Moab gama mite chun, Zion chanu a ding chun belamno a thâk u a.

² Tichun, Moab chanute chuh, vacha a bu apat a leng dawk, leng viel viel tawbang in, Arnon luipi pang haw achun um ding ahiu hi.

³ Lem ei guot sak in la, diktakin vai ei hawm sak in, nisat laia thinglîm vawt tak guolin ei veng inla, na lîm a chun châwl ung kau. Gâltai ka hiu a, kuomah ei muh loh dingin ei selin.

⁴ Na gam ah ei umsak inla, ei sumangthai dingte apat chun ei hukbit in, a tiu a. Kihawl vielna leh kisuksietna chuh hung tâwp intin, gam susiete le hung hai un au.

⁵ Zie tieng chuleh David suonte khat chuh leng in hung pang intin, a mite chuh ginum tak leh, lungsietna’n vai hun hawmsak ina. Thil dik chuh kintakin hih intin, diktatna hih a a um leh um loh chuh, phatak in entup ina.

⁶ Moab te chapona thu, a chapo mah mah ui tih ka na heu a; a pau hâmdâwk zieu leh a chapo zieu leh, a lungnat zieu thu chuh; a suohpih teu chuh bangmah ahi puou hi.

⁷ Zieziekchun, Moab te chuh a thawkna ziekun kiko vawk vawk un tin, Kir-hares a an lim tak a nek sekteu chuh a hetdawk tieng u leh, kap un au.

⁸ Heshbon lo haw chuh a hung chul zo ta ngâl a. Sibmah grep guihaw chule a chul zo tai; namtin lengte’n a dâwn kham sekteu ngêi chuh. Jazer khuo tiengin a guite chuh a zam u a, gamthip ah a zam lut u a, a bâkteu chuh a kika dawk sieusuou a; Tuipi Thi chuh a zam kai ta a.

⁹ Zieziekchun, Sibmah grep gui chuh Jazer a grep guite kah in kap ing ka ting: Aw Heshbon leh Elealeh, ka mit tui in hun buokkhum ing ka, na nipi theigahte chunga leh, na buh lak chung achun kido thawm chuh a kie ta ngâl a.

¹⁰ Kipahna chuh lâksak in a um tai, lo phate chung achun kuomah a kipâk ta puoh a, grep huon haw achun lasak mawng mawng um ta puo’n tin, thawm kipah-um mawng mawng le um diek ta puo’n a, grep thawkna khuk a chun uain chil pût hita puo’n tin, grep lâk laia kipahna thawm chuh a dai ta ngâl a.

¹¹ Zieziekchun, ka gilzang haw hi Moab lungsietna ziekin kingkang guolin a gi a; Kir-heres ziekin ka lungkham tai.

¹² Moab mite chuh tânga pathien ho ding leh, Ho-In a, paucham dinga chiehna’n a kisuchawl u a, himahlele, amau haw dingin phatchuomna bangmah um diek puo’n a.

¹³ Zie chuh Moab chungchâng thu Lalpa’n tuma lama a gen sek kha ahi.

¹⁴ Tuhin chuh vang Lalpa’n “Kithalak kum sim dana sima, kum thum sungin Moab lopina chuh a mipi nasatakte pum in, muhsit-um takin umsak intin, a na umsun chule, tawmcha mai gen kham loh hi’nau,” ti’n a gen tai.