ISAI 15 - PATHIEN LEKHABU THIENGTHO (BSI)

Moab Sukmangthaina ding

¹ Zan khat thu’n Moab gama Ar khuo chuh suksiet in a um a, bangmahlo a siem in a um ta a, zan khat thu’n Moab gama Kir-khuo chuh suksiet in a um a, bangmahlo a siem in a um tai.

² Bajith leh Dibon a mite chuh a mun sang hawu a chuh kap dingin a chieh to tau a. Moab te chun Nebo leh Medaba chuh a kah khum u a, lungkham ziekin a luchang cheng teu leh, a khabemul cheng le a met vek tau hi.

³ A khawlai hawu achun kawlladip puon a silh u a, a In chunghawu leh, khawpi ning tin achun mitin chuh nasa taka kap in a kiko vuohvuoh u a.

⁴ Heshbon te leh, Elealeh te le a kiko dawk u a, Jahaz khuo tieng nasan in a na zau a. Zieziekchun, sepaihte nasan a kithing tau a, a hansannau a bei tai.

⁵ Moab te ziekin ka lungthim chuh a kiko a, a mi phateu chuh Zoar khuo leh Eglath Selisjah ah a tai u a. Khenkhat chuh Luhith lamto achun kap kawmin a chieh u a. Khenkhat chuh, Hoironaim lampi achun lungkham a kiko in a tai lut tau a.

⁶ Nimrim tuite chuh a kangtan zo ta a, hampa chuh a vuoi zo ta a, hampa dâwng thak chuh a gawp zo a, thil hing mawng mawng chuh a um ta puoh ngâl a,

⁷ Zieziekchun, a sum neihsun hawu leh, a kawih phatteu chuh luigal a kaih pih tau hi.

⁸ Kiko husa chuh Moab gamgi vel haw achun a kiza pha ngâl a, pêng luoi luoi a a kiko git teu chuh Eglaim khuo leh Beer-elim khuo chanin a kizai.

⁹ Dibon khawpi a tuite chuh thisan tawh a kihel zo vek ta a, Dibon chunga chun thil huoisie zawsem tunsak ding ka hi ngâl a, Moab te lak apat taidawkte chunga leh, zie gama a na umsunte chung a chun, thisan suoh a kithahna nasatak um ding ahi ngâla.