ISAI 14 - PATHIEN LEKHABU THIENGTHO (BSI)

Israel te Tundawk kitna leh Limbawlna

¹ Lalpa chun Jakob chuh lungsiet intin, Israel chuh tel in amau haw gam ngêi ah umsak ding ahi ngâl a. Amau haw gam ngêi ah chênsak kit intin, gamdang mite chuh a kawm u ah hung un tin, chêng khawm ta’n au.

² Chun, namtin chun amau haw panpih untin, a mun ding u chuh tun un au; tichun, Israel inkawte chun Lalpa piekna gam achun namtin chuh suokpate leh suoknute’n hun nei un au. Amau haw suok a neite chuh suok in hun man un tin, amau haw bawlsiete chung achun vai hun hawm un au.

Thihna khawvel a Babulon Leng chuh

³ Chun, na lungkhamna haw apat leh na buoina haw apatte, nasep haksa tak ahun sepsak nau haw apat chuh Lalpa’n a hun chawlhsak ni chuleh hiti hi hi’n tin;

⁴ Zie ênghona thu hi Babulon leng kiko khum in hun gen un tin, “Bangti dana leng gilo chuh a puk ta a! Bangti dân ahi, sana khawpi chuh a dai kei ta na e!

⁵ Lalpa chun minunsie mawlh chuh a hih bawng tai; vaihawmte lengmawlh ngêi chuh;

⁶ Mitin, lungna kawma khen sek a, a mi matte châwl lo a sugimthei sek pa chuh.

⁷ Lei chung pumpi tuhin a chawla a thip dîl del, la a sa dawk tau a.

⁸ A pukna thu ziekin châk thingte leh, Lebanon tânga sidar thingte chuh kipâk in a lawp u a, a sat pai ding mawng mawng a um takloh ziekin, tuhin a bei tai.

Gawtmun a Sahang chuh

⁹ “Nuoi lam apat Sheol chuh Babulon leng muok dingin a kisazo ta a. Lei chunga thagau thilhih thei mah mah te chuh a chawktho a. Namtin lalte thagau chuh a lalchutphah uh apat in a kaitho tai.

¹⁰ Ziehaw chengcheng chun nang hun ho in, na kawmah hiti hin gen un au, ‘Nang le, keihaw banga hatlo na hi ta’m? Keimauhaw um bangin na um ta maw?

¹¹ Na lopi na chuh thihna khawvel a puih thâk ahi tai, na pekgit gi bulbulte tawh tangtel chuh na nuoi ah a kiphah u a, thil nget puon chun a hun khuh ta ahi’” ti’n.

¹² Aw Lucifer, Zinglam chapa, Zingsawl Aksi, bangti dana van apat a kie tha na hi ta! Namtin supukpa bangti dana leia sat thak a um na hi ta’m?

¹³ Na lunggil chun la, van ah kalto ing ka ting, Pathien aksite chunglam akhun ka lalchutphah dawmsang ing ka ting kikhawpna tâng, mâl tawp pena um achun chu’ng ka ting;

¹⁴ meipi haw sanga sangzaw’n kalto ing ka ting, Chungnung pên pa bangin um ing ka, na tih siet kha tawh.

¹⁵ Himahlele, thihna khawvel ah, kawkhuk mawngbei achun nawhthak in na um ta a.

¹⁶ “A hun mu taphawt in hun en nuom untin, Zie pa hi maw, lei hihling a gam tin hihlîng a,

¹⁷ khawvel thalek banga siem a, a khuo umte hih mangthai a, a salmatte a In lam u a chieh kit dinga thahdawk khalo chuh,” ti’n na chanchin hun sut un au.

¹⁸ Nam tin leng chengcheng chuh amau haw thân chietah lopi takin a kuol chiet u a.

¹⁹ Nang vang chuh thân neilo in, kihdak-um tak leh, gâl thah, chemzâma sutlet pai, kawkhuka vuiha silhlechen muot bangin gamla taka paih dawkin na um zaw ta a; thiluong tawhden bang mai in.

²⁰ Na gam na hihsiet a, na khuoletuite na thah ziekin, leng dangte vuih guola vuih in um puo’n la na suonte chuh kumlekhuo’n hing puo’n au.

²¹ “A kisak u a, lei chunga a suonteu in vai a hawm lohna dingun, a puteu gitlohna ziekin, a chateu thih lawh un au,” tin.

²² “Babulon do dingin tho ing ka ting, Babulon apat a mi leh a na umsunte leh a chapateu-chate chuh sumangthai ing ka,” Sepaihte Lalpa chun a tii.

²³ “Sakuhte chênna dingin siem ka ting, tui kitin khawmna dingin siem ing ka, sukmangthaina munphieh in phiet ing ka,” Sepaihte Lalpa chun a tii.

Pathien in Asuria Susie’n a

²⁴ Sepaihte Lalpa chun hitibang a hi gen in, a kipautiem a: “Thawnlo in, ka ngaihtuoh bang tak hin hungtung intin, ka guot bang tak hinle hungtung ina,

²⁵ Ka gama chun Asuria mite chuh hihsie’ng ka ting, ka tânghaw achun chil diek ing ka. Zie nung chuleh, Asuria te namkawl chuh amau haw apat bei ta’n tin, a puokgik puok sak u chuh amau haw apat chuh bei ta’n a.

²⁶ Zie chuh ahi, lei chung chengchenga dinga ka guot chuh, namte gawt dingin ka khut ka zak ta ngâl a,” ti’n.

²⁷ Sepaihte Lalpa chun a guot ta ngâl a, a khut chuh zak in a um ta a, kuoma’n a nung zukkik sak thei puoi.

Philistia te Sukmangthaina ding

²⁸ Leng Ahaz thih kum khan zie thu hi phuon ahi ta a.

²⁹ Aw Philistia gam pumpi, nangmah zêpna mawlh a bawt tâk ziekin, kipâk ki’n; gûl gu nei khat a thih chun, a phalo zawsem hung um kit ding ahi ngâl a. A tûi apat chuh gûl leng thei hung pieng ding ahi ngâl a.

³⁰ Lalpa chuh a mi chagah takte chingpa hi’n tin, amau haw chuh bit takin umsak ina. Himahlele, aw Philistia, na chunga chun kiel tizat-um tak hun sawl intin, na lak uh a khatchale hing puo’n lau.

³¹ Aw kawtkhak, pêng luoi luoi in, aw khawpi, kiko in, aw Philistia mite, na bawn un tuimang zo un; mâllam apat in meikhu a hung pawt ngâl a, a hun guotsau achun vaigei tih a um puoi.

³² Philistia nam palaite chuh, bangti’n I dâwng ta ding u? “Lalpa’n Zion chuh a dindawk a, a mite laka gimtheite chun, amah achun bitna mu’n au,” ti’n hilh hitiu.