ISAI 13 - PATHIEN LEKHABU THIENGTHO (BSI)

Babulon chunga Gawtna ding

¹ Babulon khuo puokgik, Amoz chapa Isai in a muh chuh:

² Miliente kawtkhak haw a chuh a lut theihna dingun, tâng kawlh vel vul achun melchikna takdawk unla, ngeih tak in amau haw chuh sam unla, khut in hui un.

³ Lalpa ngêi chun a mi suon-um leh a sepaih ginchak takte chuh kidona thiengtho do ding leh, a chunga lungnate gawt dingin a sam dawk tai.

⁴ Ngaiin tânga mipi thawm, mipi nasatak thawm bang mai chuh namtin, lalgam a umkhawm haw sa vengvung thawm chuh Sepaih haw Lalpa chun galdo dingin sepaihhawn a pun khawm ahi tai.

⁵ Amau haw, Lalpa leh a lunghihlohna hiemmatte chuh, gam gamla tak, kâwlmawng tâwp apat a hung ahiu ui. Lalpa’n a lungnatna zieka, gam cheng cheng hihsie dinga hung ahi.

⁶ Mau vungvung un, Lalpa ni chuh a nai ta ngâl a! Bangkim hihthei apat a hih sietna hungtung ding ahi.

⁷ Zieziekchun, khut chengcheng hung zawi tha’n tin, mihing lunggil cheng le hung tui ina.

⁸ Tichun, amau chuh beidawng un tin, natna leh lungkhamna chun numei nauhanat bang mai in man in tin, beidawng takin amau leh amau ki-entuoh un tin; a maiteu chuh zahchâkna’n mei guolin sa hut hut ina.

⁹ Ngaitie, gam hih mangthai ding leh, zie migilote chuh a sung apat a hih mangthai dingin, Lalpa ni chuh lungnatna leh thangtawmna nasatak tawh hungtung ding ahi.

¹⁰ Van aksite leh sihzuchote chun a vakuh suoh puou untin, nisa chuh a suokna ah sukthim in um intin, thapi’n le a vak chuh suoh diek puo’n a.

¹¹ Tichun, khawvel hi a gitlohnau ziekin gawt ing ka ting minunsiete chuh a manlohnau ziekin gawt ing ka; mi chapote pau uong chuh suhai ing ka ting, mi lauh-um uonna chule hihniem ing ka.

¹² A suokcha sunte chuh sana thieng sanga muh haksa zaw’n siem ing ka ting, mihingte chuh ophir sana thieng sanga le haksa zaw’n siem ing ka.

¹³ Khutichun, van khu sulîng ing ka ting, Kei, sepaihte Lalpa lungnat ziekin, ka lungnat etsakna ding chun, lei hile a umna mun chawn hiel khawpa suklîng in um ina.

¹⁴ “Babulon a gamdang mi chêngte chuh, sakhi a delh pa apat a suokcha bang leh, belam chingpa bei guolin, mi tin amau chipihte lam chiet ngau intin, mitin chuh amau haw gam lam chiet ah taimang un au.

¹⁵ Kuole, a muh takphawt uh sunlum untin, kuole, a mat takphawt uh chuh chemzâma satlup in um un au.

¹⁶ A nausenteu le a mitmuh un nêl hiela lei khetna a mat in um un tin, a Inteu chuh luh in um intin, a ziteu chule pawngsuol in um un au.

¹⁷ Ngaitie, Median te chuh Babulon do dingin chawktho ing ka ting, amau haw chun dangka ngaihsak puou untin, sana le kipahpih diek puo’n au.

¹⁸ A thalpiteu chun a tangvalteu chuh kap un tin, a chasen hawu chuh lungsietna mawng mawng nei puou in tin, a mit hawu achun naupangte lungsietna um puo’n a.

¹⁹ Chun, Babulon chuh khawpi laka hawihpen leh, a mipite kisuonpih ahi a, himahleh, Kei, Lalpa hin, Sodom leh Gomorra ka sukmangthai bang khan, sumangthai ding ka hi.

²⁰ Bangtik inle tak achun mi chêng ta puou untin, suon umsung cheng chun a sunga um le um puo’n tin, Arab mite’n zie tak achun a puon-In uh zak diek ta puou untin, belam chingte’n le zie tak achun a belam hawn teu chuh bawhsak diek ta puo’n au.

²¹ Zie tak achun gam sa haw chuh bawk untin, simbute chun bu sieh untin, vacha ngawngsaute tak achun cheng untin, sakelte tak achun kichiem zaw ta’n au.

²² A insangteu leh leng In teu sung chuh si-âl leh ngei hâm chun thawng gi zung zung ina. Babulon gawtna hun a hungtung ta a, A nite chuh a tâwp ding kuon ahi ta ngâl a”.