ISAI 11 - PATHIEN LEKHABU THIENGTHO (BSI)

David Lalgam Tundawkna

¹ Jessai bulsum chuh hung seldawk in tin, a zung apat in a bâk khat hung seldawk ina.

² Chun, Lalpa Thagau, chitna leh hetthiemna thagau, lemguotna leh hatna thagau, hetna leh Lalpa kihchakna thagau a chungah chu’n a.

³ A thu zawp a chun kipahna nei intin, Mit a muh leh bil a zak mai in vaihawm puo’n tin

⁴ Mi chagahte phatak in vaihawm sak intin, leia mi thunuoigawlh te a ding chun khenchuom neilo in hilhgaih ina; a kama khetbuk in lei hi khên intin, a mûk a hu pawt in minunsie chuh that ina.

⁵ Chun, diktatna hi a kâwnggak hi’n tin, ginumna’n le kivan ina.

⁶ Chun, ngei te chuh belamno te tawh takhawm tau untin, keite chule kelnote tawh an ne khawm tau intin, bâwngno leh sakeibaknei vanglai leh gan vak thau te chuh takhawm tau un tin, naupang neucha’n le amau haw chuh pui ina.

⁷ Chun, bâwng leh savawm takhawm un tin, a noteu chuh bawkkhawm dim diem ta’n au; chun, sakeibaknei chun bâwngchal guolin buhpawl ne ta’n a.

⁸ Chun, nausen nawichep laite chuh gûl gu nei kawmah kichiem un tin, suknat in um diek puo’n au.

⁹ Ka tâng thiengtho achun kisuknatna himhim um ta puo’n tin; kisuksiet le um ta puo’n a; tui haw hin tuisuohgiet a khuh zing bang hin, leichung hi Lalpa hetna chun dim suok vek ding ahi.

Juda leh Israel Saltâng Vaihkitna

¹⁰ Chun, zie ni chuleh hiti hi hung hi’n tin, Jessai zung, mitin tiemtehna dinga ding chuh, amah ngêi chuh namtin in dawp tau intin; a chawlhna mun chuh lopi ina.

¹¹ Zie ni a hungtun tieng chuleh, Lalpa’n a mite sukmangthai loh a na umsunte Asuria gam apat te, Aigupta gam apat te, Pathros gam apat te, Kush gam apat te, Elam gam apat te, Shinar gam apat te, Hamath khuo apat te, Tuisuohgiet tuikuol apat te chuh la kit dingin, a thilhih theihna khut hun zak kit ina.

¹² Chun, nam tina dingin melchikna tâk dawk intin, Israel nawhdawka um haw chuh puikhawm intin; Juda tai zakte chule kâwlmawng li apat chun puikhawm ina.

¹³ Tichun, Ephraim te itthîkna chuh bei ta’n tin, Judate subuoi haw chuh sukmangthai in um ta’n au, Ephraim in Judate itthik ta puou un tin, Judate’n le Ephraim subuoi diek ta puo’n au.

¹⁴ Tichun, amau nih chun, thanglam a Philistia te do khawm un tin, suohlam mite chuh buluh khawm un au. Edom leh Moab te chunga chun a khut uh thau untin, Amon suonte chun a thuu zawp ta’n au.

¹⁵ Tichun, Lalpa chun Aigupta Tuisuohgiet ningkawite chuh hihsie vek intin; Euphrates luipi chule a huih lum peppup chun hih kang ina. Luicha sagih suoh theih khawp in zêp intin, mite chuh kêngpêk le chek lo in chieh kaih sak ina.

¹⁶ Tichun, Aigupta gam apat a a chieh toh niu a, Israel te dinga lamlien a na um bang khan, a mite a suokcha sunte ding chun, Asuria gam apat in lamlien hung um ina.