ISAI 1 - PATHIEN LEKHABU THIENGTHO (BSI)

Juda chungthu a Lalpa Thugen

¹ Amoz chapa Isai in Juda leng Uzziah, Jotham, Ahaz leh Hezekia te vaihawm laia, Judate leh Jerusalem chungchâng thu a kilâkna a muh chuh:

Pathien in a Mipite a Gaihna

² “Aw vante, ngaithau un la, aw leichung na bil dawh in! Lalpa chun thu a gen hi. Chate chuh ka vaka, ka seilet saka, himahleh ka chungah a kiphin tau ui.

³ Bâwngchal in a pu a he a, sabiltung inle a pu an piekna a he a; himahleh, Israel te hin vang chuh a he puou a, ka mite hin chuh a helo himhim uh ahi,” a ti a.

⁴ E! nam gilo, manlohna a dim, thil phalo tak hih sek leh, migilo na hi! Na gitlohna chun a hun hihniem a Lalpa Israel Pathien thiengtho chuh na deih puoh a, amah chuh na kiheimangsan uh a, na nungchawn tau hi.

⁵ Bang zieka zêpa um a, kiphin nalai ding na him? Luchang chuh a pum in a na a, lunggil chule a pum in a chau zo tai.

⁶ Kengtaw apat in lusip tiengin damna mawng mawng a um puoh a; liem na mate, zêp thidupna te, meima nai khuot ngen ahi. Ziehaw chuh a mêk dawk puou a, tuom le a tuom puou a, thau le a nuh diek puou hi.

⁷ Na gam u chuh a hawm zo ta a; na khawpiteu chuh mei in a katum zo a, na mit muh ngêi un na gam u chuh gamdang mite’n a la zo u a, a hihsie zo tau hi.

⁸ Zion chanu chuh grep huon a venbuk bang leh, changmai huon a bûk bang leh khawpi huol kimvel bang mai in nutsieh in a um tai.

⁹ Sepaihte Lalpa chun sukmangthai mâwk tawmcha a na nutsieh sak lo hile chuh, Sodom guolin ana um tai ting un, Gomorra tawbang khah hita ding I hiu hi.

Diktaka Lunghei dinga Sapna

¹⁰ Sodom vaihawmte haw, Lalpa thu ngaithau inla; Gomorra mite haw I Pathien uh dân thu ahin bil dawh un.

¹¹ Lalpa chun hiti hin a tii, “Na kithawih na zozai u hi kei dingin banga a phatchuomna um? Hâlmang kithawihna belamchal te leh gan vak thaute chule ka ningkitel ta a.” Bâwngchalte thisan ahim leh belam leh kelchalte thisan chule ka chim tai.

¹² Ka masanga na hung kilat ding u leh ziehaw hi hun chawi dinga kuo a hun ngek? Ka Ho-In huongsung hung tawh kit ta kiu!

¹³ “Na thilpiek hun chawih teu leh na thil gimlim chuh kei dingin kihdak-um ahi. Tha thakte, sabbath te, gilo kawma khawmpi guntak neih a kisapkhawm haw maimai chuh ka thuok thei ta puoi.

¹⁴ Na tha thak kutteu leh na Kutpi teu chuh ka hinna’n a haw a, kei dingin thil nawksak mai ahi ta a; ka chimchâk mah mah zieng tai.

¹⁵ “Tichun, paucham a na khutteu na zak tiengu lele hun kiheimang san ing ka ting. Tamtak vei na paucham tiengu lele hun ngaitha puo’ng ka; na khutteu chuh thisan in adim ngâl a.

¹⁶ Kisil unla, kisuthieng un ka mitmuh phâk loh ah na thilhih gitlohteu hi kawihmang unla, na gitlohna hih u hi haihsan tau un;

¹⁷ thilpha hih kisin tau inla, vaihawmna dik hawl un la, sukgimtheih thuokte chuh panpih unla, pa neilote chuh sikgen unla, meithaite chuh genpih un,” a ti ahi.

¹⁸ Lalpa chun, “Hung tiem u, ngaihtuoh khawm hitiu; na gitloh nau chuh sandup bangin san mahleh, vuk bang in hung vam in tin; san au bangin san ta mahleh belam mul guol in hung vam ina.

¹⁹ Thu-awi tak leh gen ngai taka na um u chun, na gam u a thilpha haw hi ne ding na hiu hi.

²⁰ Himahlele, na nawp loh uh a, na kiphin u chun, chemzâm in hun that zo un au; kei Lalpa chun zie chuh ka gen ahi tai,” a ti a.

Khawpi Gilo chuh

²¹ Bangti dana khawpi ginum tak chuh nawchizuok hung suok ahi ta die aw! Thudik a vaihawm sek, diktatna a dim ahih maizen tawh, tuhin vang chuh tuolthatte a chêng tau hi.

²² Na dangkaguo teu kha a tui-êk zo ta a, na uain u chuh tuisik tawh a kihel zo tai.

²³ Na miliente chuh mi kiphin nuom, guchate guolpha ahiu a; mi chengin gawlhgukna sum leh thilpiekte a lau a. Pa neilote a panpih sek puou a, meithaite thugente le a ngaihthak sak puou ui.

²⁴ Zieziekchun, Bangkim hihthei Lalpa Israel Mihat thugen hi ngaithau in: “Nang, ka melma pa chunga hin phuba la’ng ka ting, ei subuoi kit ta puo’n la.

²⁵ Chun, na chungah ka khut nga kit ing ka ting, na tui-êk na haw chuh thieng takin thiek ngim ing ka ting, nang hun tuom thik chengcheng chuh la mang ing ka.

²⁶ Chun, na sunga vaihawmte chuh a tûnga a um bang u khan umsak kit ing ka ting, na sunga lemguotte chule a masapen a a um bang u khan umsak kit ing ka ting, zie zawh chuleh Jerusalem chuh, ‘Dikna khawpi, khawpi ginum’ tih hung hi kit ina.”

²⁷ Zion chuh vaihawmna dik in hukdawk in um intin, chuleh, a sunga gitlohna haihsan a lungheite chuh dikna a hukdawk in um un au.

²⁸ Himahleh, migilo leh thil hihkhielte chuh suksiet khawm in um untin; Lalpa ngaihsak lote chuh sukchimit in um un au.

²⁹ Na kipahpih mah mah uh gangpi thing ziek chun muolpho ta’n lau, chun, na huon deihchuom teu ziek chun zakcha taka um ding na hiu hi.

³⁰ Gangpi thing nah vuoi leh, huon tui mulo bang mai hung hi ding na hi ngâl u a.

³¹ Chun, mihat tak chule buhpawl bang hita’n tin, a nasep chuh meisi tawbang hi’n a; tichun kâng khawm un tin, a phelh mit ding kuomah um puo’n au.