HOSEA 9 - PATHIEN LEKHABU THIENGTHO (BSI)

Hosea’n Israel Gawtna ding a Phuonna

¹ Aw Israel, Pathien helote guola na kipahna siem chuh haihsan in. Na Pathien apat in na kiheimang a, amah a dinga ginum ta lo na hi. Gam sung pumpi a chun nawhchizuok guolin Baal pathien kawmah nangmah na kizuok viel a, buhte chuh lawh dinga a hun piek hi a na ngaih ziekin na deih mah mah a!

² Himahlele, buh leh olive thaute chuh hung kitasam pai in na tin, uain thak ding lawhsam ina.

³ Israel mipite chuh Lalpa gam ah cheng den puou untin, Aigupta lam ah vaikit untin; Asuria gama chun an thienglo ne’n au.

⁴ Zie a gamdang mite gama chun Lalpa kawmah dâwn ding thillat te lân thei puou untin, kithawihna le a kawmah siem thei diek puo’n au. Mi thi vuihna a an nek guolin, a nek taphawtteu chun amau haw subuok intin, a gilkiel uh sukvahna chauh a mat hi’n tin, khatchale Lalpa In a thillat guola chawih theih hi puo’n a.

⁵ Khutichun, guntaka kikhawppi ni leh Lalpa limbawlna dinga guolvakna hunbi a hungtun tieng chu leh bang na hih ta ding u?

⁶ Sietna a tun a, mipite a taih zak tieng u leh, Aigupta gam ah tai khawm untin, zie tak a chun Memphis khuo a vuiha um dinga tai khawm chauh hi’n au! A hauhsaknau, dangkaguote leh a In mun teu chuh hamlingnei in khuh khum in a.

⁷ Gawtna ni a hungtung ta a, mipite chun ditthukna chuh mun au. Zie chuh a hungtun tieng leh Israel te chun he ta’n au. “Zie thiemgau pa hi a ngawl ahi; thagau hatkhum a um mi hi a ngawl ahi!” na tiu a. Na gitlohnau chuh a nasat bêk ziekin nei haw zawu ahi.

⁸ Pathien in a mi Israel te hilhlawk dingin thiemgau in ei sawl a. Himahleh, ka chiehna lam chengah vacha guolin nei mat guou a. Pathien gamsung ngeia le mipite chuh thiemgaute melma’n a pang tau ahi.

⁹ Gibeah a um lai guol un a thilhih teu a chun nasa takin a gilo u a. Zie chuh Pathien in hezing intin, a gitlohna teu ziek chun gawt tei ding ahi ngâl a.

Israel Gitlohna leh a Gah

¹⁰ Lalpa chun, Israel te ka muhdawk pat ni chun, gamgaw a grep bang mai ahiu a. Nang haw hun suonte chuh theipi gah min masa bang phet ahiu ui. Himahleh, Baal-Peor tângah a hung u a, zahchâk um takin a masang achun a kisuthiengtho u a, tichun, a pathien hoteu banga kihdak-um a hung hi tau hi.

¹¹ Ephraim chuh a lopina chuh vacha bangin lengmang intin: Nausen pieng thak leh, numei nauvawp leh naupang pieng himhim um beh ta puo’n a.

¹² A chateu khanlet sak mahleu le, khatchale hin hawih lo in lâkmang sak vek ing ka. Zie mipite hi ka taihsan tieng chu leh, a chunguh a gik na ding e! ti’n.

¹³ Tura ka muh bang takin Ephraim chuh mun nuom tak ah kawih in a um a; himahleh, Ephraim chun a chate chuh mi thatte kawmah hun puidawk ina.

¹⁴ Aw Lalpa neihsak in, banga na neihsak ding chuh? A numei teu chuh sûl hatlo leh nawitui bei in siem in.

Israel te chunga Lalpa Thutanna

¹⁵ A nunsiet nau chengcheng chuh Gilgal ah a bawl pan u a, zie tak achun amau chu ka haw ngâla: a thilhih uh gilote ziek chun ka In apat nawhdawk ing ka: amau haw chuh lungsiet ta puo’ng ka; a lawiupa teu chengcheng chuh helchîng ahi ngâl u a.

¹⁶ Ephraim chuh zêp in a um a, a zung chuh a gaw zo ta a; gahsuoh puo’n au: Ahi, suoh mahlele a sûl gah deihum tak u chuh that tho tho ing ka.

Thiemgau in Israel Chungchâng a Genna

¹⁷ Ka Pathien chun a mite chuh nawlh intin; amah a bengkhawn loh ziekun. Tichun, amau haw chuh nam dangte laka chun vakchavai un au.