HOSEA 8 - PATHIEN LEKHABU THIENGTHO (BSI)

Israel Mawh Chansakna

¹ Kigalginna pengkun chuh mût in, Melmate chuh meipi bangin ka gam chungah a chu tai. Ka mite chun a kawm uh a ka thugawlh chuh a bawhsie tau a.

² Ka Pathien uh, kei uh Israel te hin chuh ka hun heu hi, ti’n ka kawmah kiko un au.

³ Israel te chun thilpha a nawlh u a, zieziekchun, a melmateu in delh zui ina.

⁴ “Kei guot sak hilo in, amau in leng a kisiem uh a. Pha ka sakpih loh in lawiupa ding a kisiem uh a. A manthaina dingun, dangkaguote leh a sanateu in milim a kisiem u a.

⁵ Aw Samari! na sana bâwngno lim ho chuh ka haw a; a chungu ah ka lungna mah mah hi. Bangtik taphet leh a thiengtho kit ta dei mawh?

⁶ Israel mi, khutthiemte chun milimte a siem uh a, himahleh, zie chuh Pathien a hi hiel puoh ngâl a. Samari khawpi a bâwngno limte chuh tuol a khetnel in um un au!

⁷ Huih a chîng uh a, chinpei ât ding a hi ngâl uh a. Lo a buh ding laite chun vui suoh puo’n tin, nek ding sepdawk diek puo’n a. A gah sepdawk mahlele, gamdang mite’n ne zo tho un au.

⁸ Israel te chuh valh zawh a um ahiu hi; bel, a sunga kipahna umlo bangin tuhin nam dang lak ah a um ui.

⁹ Gam sabiltung genhak tak guolin Asuria gam ah a chieh to ngâl u a; Ephraim chun a deihchakte a guoi hi.

¹⁰ Ahi, namte laka sepaihte thalak mahleu le, chawmlo kâl in amau chuh puikhawm ding ka hi a; hun chawmkhat sung chuh thau nuh ding leng leh lawiupa neilo a um ding ahiu hi!

¹¹ “Ephraim chun gitlohna dingin maichâmte a hihpung a, amau haw dingin maichâmte chuh gitlohna chauh ahi.

¹² Ka dante chuh sang sawm hiel zik mahleng, het khâk loh guol mai in a ngai ui!

¹³ Gancha’n kithawi u henla, a sa ne mahleu, ziehaw chuh ka kipahpih puoh ngâl a. A manlohnau ka hezing a, gawt ing ka ting, Aigupta lam ah vaikit un au.

¹⁴ “Israel chun a Siempa a hengilh a, tichun, leng In haw a kisak a, chun, Juda chun khawpi kulh nei tampi a sa a; himahleh, a khawpite chung achun mei sawl ing ka ting, a leng inteu chuh mei in katum zo ina”. ti’n.