HOSEA 7 - PATHIEN LEKHABU THIENGTHO (BSI)

Israel te Gitlohna leh Kiphinna

¹ “Israel sukdam ka guot lai in Ephraim sietna a hung lang a. Samari nunsietna thilhih tawh, diklo takin thil ahih u a; a sung ah gucha a lut a, pawlam ah suommang te’n ana suom ngâl u a.

² A gitloh nau chengcheng ka hezing hi tih a lungthim un a ngaihtuoh puou: Tuhin chuh a thilhih teu ngêi in a ûmkimvel ta a, ka maikawk ngêi ah a kilang tai.”

Leng In a Phielgukna

³ “A nunsietna teu chun a lengteu a sukipak a, mipite chun thil gilo suongtuoh in, a milienteu chuh a thêm u a.

⁴ A bawn un zawlsai ahiu a, chângthâk siempa’n thuk a suklum, changbuong a mêk thuok a a thawh ma a mei tik a, chawlhsan tawbang hi ahi.

⁵ Leng in guolvakna a siem ni chun leng leh a miliente chuh uain chîk takin a kisukham u a; amah chun musitte tawh kituok in khut a zaka.

⁶ A thil gilo suongtuohnau chun thukkhuk a mei bangin a ka hut hut a. A lungnatnau chuh zan khuovak in a âm a, zingkal leh a hung kuong dawk ta sek hi.

⁷ “Thukkhuk bang mai in a sa vek u a, a lungnat tâwp khawk un a vaihawmteu a that u a. A lengteu chuh a bawn un a that u a, himahleh, kuomah cha’n ka kawmah panpihna a ngên diek puou ui,” ti’n.

Israel te leh Namte

⁸ Ephraim chule nam dangte lak ah a kizêp mang a; Ephraim chuh chângthâk kikang lehviel loh ahi.

⁹ Gamdang mite chunga a kinepnau chun a hâtnau a lâksak ahi tai tih a he puou ui.

¹⁰ Israel mite chapona chun amau mah a do a. Himahleh, khutisa chun le Kei, Lalpa a Pathien uh lam hi a hun nga diek puou a, amah chuh a hawl diek puou hi.

¹¹ Ephraim chuh vakhu lungmawl, hetthiemna neilo tawbang ahi a, a mite chuh Aigupta kawmah panpihna ngên in a chieh u a, a zawhin Asuria te kawmah a tai kit u a.

¹² Himahleh, a chieh lai u chun, len a vacha khuh guolin a chung u ah lên zak in man ing ka ting. Chuleh, thil gilo a hihteu chengcheng ziekin gawt ding ka hi.

¹³ “A chunguh a gik hi! ka kawm apat in a chiehmang ta ngâl u a; manthaina a chung u ah a tung hi! Ka chungah a hel ta ngâl u a, ken chuh ka hukdam nuom a, amau chun lah zuou ei gen khum u a.

¹⁴ Ka kawmah tihtakzet in a paucham puou a, zâlkhun chungah a mawk phun mul mul sek ui. Buh leh uain ngên a a paucham tieng u leh, milim hote hih bangin amau leh amau a ki-âtkeh sek uh a. Ka chungah a hel ngâl u a.

¹⁵ Ken chuh ka puidawk a, ka hihhat a, mahleh ka chungah thil phalo a lunggel u a.

¹⁶ A kilehhei kit u a, Chungnung pên pa kawmah hilo in, Thalpi kâwi banga mattakloh ahiu a, a vaihawm teu chuh huoisie taka thah in um untin, a muh u a heksietna ziekin a lengteu chuh chemzâm a thah in un tin; Aigupta te chun nuihsan un au,” tin.