HOSEA 6 - PATHIEN LEKHABU THIENGTHO (BSI)

Kisik dinga Sapna

¹ “Hung tiem u, Lalpa lam ah vaikit hitiu: ama’n ei bawttel ta mahleh ei sudam kit ding ahi ngâla. Ei na suliem ta mah leh ei tuom kit ding ahi ngâl a.

² Ni nih nung leh ei suhing intin; ni thum ni’n ei kaitho intin, tichun, a masang ah um tai tiu.

³ Lalpa hetna chuh delh zel hitiu, hêi tingun,Lalpa chuh het guo tai tiu. Zingkal a khuo hung vak zel tawbang leh, guoh tui in lei a chapchêk bang hin matheilo in I kawm u ah hung in a.”

⁴ Himahleh Lalpa chun, “Aw Ephraim, bang ka hun lawh die? Aw Juda, bang ka hun lawh ta die? Nei lungsietnau chuh zingkala tuimei leh dâitui mang pai zieng sek bang hi a hi ngâl a.

⁵ Zieziekchun thiemgaute mang in amau chuh ka theuh ngim a, ka kama thu’n ka sulum a, ka vaihawmna chuh vak tawbanga a chiehdawk ahi.

⁶ Kithawihna deihlo in lungsietna ka deih ngâla; hâlmang thillat haw sang chun Pathien hetna ka deih zawi.

⁷ “Himahleh, Adam guolin amau haw tawh ka thugawlh chuh a bawhsieu a, zie taka chun gukhah takin ka chungah ahih u a.

⁸ Gilead chuh gitloh na hih te khawpi ahi a, thisan a bek neuno hi.

⁹ Suomhat te’n lampi a mi suom gu dinga chan sek bangun thiempu lawite chun Sekem lampi ah mi a that sek u a, ahi, thil gilo ahih tau hi.

¹⁰ Israel gam achun thil tizat-um tak mai ka mu a; Ephraim achun nawhchizawkna a um a, Israel chuh a buok ahi.

¹¹ “Aw nanguh Juda mite haw, buh ât hun ding chuh guotsa ahi tai; Ka mipite ka tun din kitna ding chuh!