HOSEA 5 - PATHIEN LEKHABU THIENGTHO (BSI)

Israel Ginum lohna zieka Gawtna

¹ “Aw nanguh thiempute haw, ziehi ngaithau inla, nang haw Israel inkawte haw, na bil uh dawh un. Aw nanguh leng insung mite na bil u dawh un. Vaihawmna chuh nang uh a ding ahi ngâla. Mizpah a dinga thang leh Tabor tânga lên kizak na hi ngâl u a.

² Shittim khawpi a dingin kawkhuk thuk tak na hi ta a, himahleh, ken na bawn uh a hun gawt ding ka hi.

³ Ephraim chuh bang tawbang a hih ka he a, Israel chuh kei apat sel ahi puoi. Tuhin, aw Ephraim, nawhchizawk na chîn ziekin, Israel chuh suk buok ahi tai,” ti’n.

Hosea’n Milim Hote a Vauna

⁴ A thil gilo hihteu chun, a Pathien kawmuh a a vaihkitna dinguh a dal a. Nawhchizuok lungthim a pu zing uh a, Lalpa chuh a he puou ui.

⁵ Israel mipite chapona chu a maikawk ngêi u ah hetsak in a um u a. Ephraim chuh a gitlohna chun a kipalpaih sak a, a puk uh a, tichun, Juda chule amau haw tawh a pukkhawm tau hi.

⁶ A belam hawnteu leh a bâwngguolteu chuh Lalpa kawma kithawihna dingin kai un tin, himahleh, bangmah phatchuomna um ta puo’n a. Amau haw apat a a kikiengkawih tâk ziekin a mu thei ta puou hi!

⁷ Lalpa a dingin a ginum ta puou a, a chateu chule amah a ahi ta puoi. Zieziekchun, amau haw leh a gam u chuh sukmangthai in um un au.

Juda leh Israel te Kidona

⁸ Gibeah khuo achun kidona pengkun mût unla, Ramah khuo achun kigalginna chuh mût un: Bethel achun lauhna aw suoh unla. Kidona achun lut in aw Benjamin te haw!

⁹ Ephraim chuh gawtna ni achun suk hawm hi’n tin, Israel chuh suksiet in um ina. Israel mipite haw, ziehi hung tung ngêi ding a hi!

¹⁰ Juda mi lopite chuh gamgi chawn tawbang ahiu a, a chung u a ka lungnat na chuh tui guolin sung buo ding ka hi.

¹¹ Ephraim chun tawhden a chîng a, dikna a palzut a; bangmahlo a delh a.

¹² Zieziekchun, Ephraim chunga chun manthaina tunsak ing ka ting, Judate chung achun sietna tunsak ing ka.

¹³ Ephraim in a damlohnate mu a, Juda chun a liemnate a muhdawk tieng chu leh, Ephraim chuh Asuria gam vaipawpa kawmah panpihna ngên in chieh intin, himahleh a natna ahim, a liemna ahim chuh sudam thei diek puo’n a.

¹⁴ Ephraim a ding chun sakeibaknei tawbang, Juda a ding chun sakeibaknei vanglai tawbang hiding ka hi ngâla; keimah, keimah ngêi in bawtthêk ing ka ting, chieh ing ka ting, chiehmang pih ing ka ting, kuoma’n hukdawk puo’n a.

¹⁵ “Ka mite chun a gitlohna ziek u a a thuok khawp kei u a, kei lam a hun hawl kit macheng un, limsak lo in um ing ka. A thuok gimnau ziekin ei hun hawl kit vak ding ahiu hi,” ti’n.