HOSEA 4 - PATHIEN LEKHABU THIENGTHO (BSI)

Lalpa ’n Israel Mawh a chansakna

¹ Israel mite haw, Lalpa thu hi ngaitha tiem u: gamsung ahin thutak leh lungsietna leh Pathien hetna a um loh ziekin, Lalpa chun zie gam luohte hi thiemmawh hun chansak ding ahi.

² Thu a tiem u a, a bawhsie zel u a, lepchieh a gen u a; tuol a that u a, a guchau a, zawl a sai tau ahi. Gitlohna a pung a, thisan suoh a kiphamat zing ahi.

³ Zieziekchun, gam sungin a su’na: a sunga cheng te cheng le a lungkham zo tau hi. Gamsate, chung leng vachate leh tuisuohgiet a ngate chanin lak mang hi’n au.

Lalpa ’n Thiempute Mawh a Channa

⁴ Ahih ziekin, kuoma’n mipite chuh ngawh kiu henla, gaih le kigai diek kiu hen; Aw thiempute, nang u chung ahin a puo ka lung-awihloh chuh!

⁵ Sun lai takin kisuipai in na tin, nang ngêi le thiempute tawh zan leh kipuk khawm unlau. Na nu Israel chu le sumangthai ding ka hi.

⁶ Ka mite chuh hetna tâksap zieka sukmangthai ahiu a, hetna na deih loh ziekin ken le ka thiempu nasem dingin ka hun deih ta puoi. Na Pathien dân na hengilh viela, ken le na chate hengilh ing ka.

⁷ “A pun phawt u leh, ka chungah a gilo deuh deuh u a, a lopinau chuh zahchâkna suoh sak ing ka.

⁸ Ka mite thil diklo hih apat chun na kisuhausau a, a gitlohnau a chun a lungthim uh a kawih zinga.

⁹ Zieziekchun, mipite tawh kibanga gawt hi ding na hiu hi. A um danteu ziek chun amau chuh gawt ing ka ting, a thilhih teu chuh ditthuk ding ka hi.

¹⁰ Ne mahleu le, a tai dek puou a, Nawhchizuok chîng mahleu le pung diek puo’n au, Lalpa khawksakna na neih loh ziekun,” ti’n.

Israel Milim Hona

¹¹ “Nawhchizawkte, Uain te, uain thakte chun lunggil a lamang sek hi.

¹² Ka mite chun thing milimte apat in kilâkna a hawl sek u a, a phunsân na mawlhteu chun le thu hilh zel dân in a ngai u a; nawhchizawkna lungthim chun a puimang a, a Pathien uh apat chun a puimang sek hi.

¹³ Tangsip haw achun a kithawi u a, muol vum a thing sangte leh thing nuoi lim muntin haw achun kithawi in gimlimte a hâl u a, a limte chuh anawp bêk ziekin! “Zieziekchun, na chanuteu chun nawhchizuok a sin u a, na moteu chun le zawl a saih lawh tau hi.

¹⁴ Na chanuteu in nawhchi a zuok u a, na moteu in zawl a saih un le gawt diek puo’ng ka. Nang haw ngêi le amau haw tawh nawhchizuok in na kipieu a, kithawihnate na lân khawm ngâl u a. Zieziekchun, ‘Hetna nei lote chuh mangthai ngêi ngêi ding ahiu hi.’

¹⁵ “Israel, nang chun nawhchizuok chîng mah leh chin, Juda vang chuh gilo kihen; Gilgal ah Pathien ho ki’n la, Bethel ale va chieh to diek kiu unla, ‘Lalpa a hin zing bang hin,’ ti’n le kipautiem diek kiu in.

¹⁶ Israel mipite chuh sabiltung genhak tawbang in a genhak u a, bangti’n a belamno hampa phatna muna um tawbanga ka vak theih ding?

¹⁷ Ephraim chun milimte a kizawppih ta a, a um um in um hen.

¹⁸ A zu dâwn u chuh a kikhen u a, nawhchizuok in a kisiem u a; a lopinau sangin thil zahchâk um chuh a ngaina zawu a.

¹⁹ Zieziekchun, huih mût mang guola tawhmang in um untin, tichun milim maichâm a kithawihna teu chuh zahchâkpih ta’n au.