HOSEA 13 - PATHIEN LEKHABU THIENGTHO (BSI)

Israel te chunga Thutanna Tawpna

¹ Ephraim in thu a gen tieng leh mite chuh a kithing u a, amah chuh Israel chunga chawihsân a um ahi. Himahleh, Baal ho a thil gilo a bawl ziekun a thih lawh tai.

² Tichun, tuhin gitlohna a bawl beh beh nalai u a, milim pathiente a kisun kawm u a; a dangkaguo teu chuh khutthiemte chun milim in a sung u a, a bawnin khutthiemte nasep vek ahi a; “Amah kawm ahin kithawi un,” a tiu a. Mite chun bâwngno lim chuh a châwp u a.

³ Zieziekchun, amau haw chuh zingkala tuimei tawbang hiu intin, kin taka bei kit dâitui tawbang hi’n au. Phuol a buhsi chinpei in a mût mang bang leh, meikhu lâwng a meikhu tawbang mai hi hi’n au.

⁴ Kei hi Lalpa na Pathien uh, Aigupta gama pata hun puidawkpa chuh ka hi. Kei tihloh chuh Pathien dang na nei puou ui. Kei chauh hi a hun hukdampa chuh ka hi.

⁵ Thalek gamgaw nasa tak muna hun kitawnpihpa kha ka hi.

⁶ Himahleh, gam phatak chuh na lut phet un, ne vah in na lungkim mah mah tau a; tichun na hung chapo tau a, nei hengilh tau hi.

⁷ Zieziekchun, amau a dingin sakeibaknei bang ka hi a, keite bangin lamkal ah hun chânggu ding ka hi.

⁸ Savawm a no cha’n guolin hun suol ing ka ting, hun luoi zak ing ka. Zie nung chu leh, sakeibaknei bangin a mun ah hun ne zo ing ka ting, gamsa guolin luoi tel dik dek ing ka.

⁹ “Aw Israel, nang haw hun sumangthai ding ka hi. kuo a hun panpih ta ding?

¹⁰ Na khawpi haw chenga hukbit thei ding na lengpa chuh tuhin khawia um ahi? Leng leh puitu ding na ngên u a; himahleh bangti’n a namte a hukdawk ding uh?

¹¹ Lungkim lo kawmin leng ka hun pie a, lungna takin ka hun lâksak kit ta ahi.

¹² “Ephraim gitlohna leh manlohnate chuh khawlkhawm ahi a, gitlohna chuh seh khawm ahi.

¹³ Israel chun hinna ding hunlemchang tak a nei a, himahleh nausen, a nu sûl apat a hung pawt ding ut lo a um guolin a ngawl a, a pawm nuom lo ahi.

¹⁴ Zie mite hi thihna khawvel apat in ka hukdawk dinga ahim? Thihna apat in amau chuh ka hukdawk dinga ahim? Aw thihna na gute chuh khawia um ahi ta’m? Aw Sheol, na sietna chuh khawia um ahi ta’m? Zie mite hi lungsiet lo hiel ding ka hi, lunghei leu le, bengkhawn puo’ng ka.

¹⁵ A suohpihte laka lamzang pên himahleh, thalek apat in suohlam huihlum sawl ing ka ting, a tuinak teu chuh kang intin, a tuikul teu chuh gaw zo vek in a. Um-le-bel pha chengcheng, a go chuh hih sie vek ina.

¹⁶ Samari chuh ka chunga a kiphin ziekin gawt in um in a. A mite chuh gâla thah in um untin, nausente chuh tuol khetna a mat in um untin; a numei nauvawplaite chuh phil zak in um un au,” ti’n.