HOSEA 12 - PATHIEN LEKHABU THIENGTHO (BSI)

¹ “Ephraim chun huih kivâk na’n a manga, suohlam huih chuh a zui seka: zuou thu leh kipumbawlna thu ahih pung hiei hiei a, Asuria tawh thu a thun u a, Aigupta lam ah thau a paw lut hi.”

² Lalpa chun Juda chungah ngawh ding a nei a, Jakob chuh a umdan bang zelin gawt intin; a thilhih dân bang zelin dinthuk in a.

³ Sûl a khan le a suohpihpa khawtalzum a hun tuzui a, a hung pitin phetin Pathien a hun suol a.

⁴ Ahi, Vânsâwlchâk tawh a kibuon u a, a zo ta a: a kap a, a deihsakna a ngên a, tichun. Bethel muna chun amah a mu ta a. Zie tak achun Pathien in a kawmah thu a gen ta a.

⁵ Lalpa ngêi, Bangakai hihthei Pathien chuh Lalpa tih chuh a tiemtehna ahi.

⁶ Khutichun nanguh Jakob suonte haw, na Pathien lam nga kit unla; ginum tak leh, thudik takin um un. Thuokhat takin na Pathien chuh ngak zing un.

Thutanna hung um beh ding Thu

⁷ “Kanaan te bangin Israel chun bûkna diklo a manga: tehna diklo manga a thil chawteu thep chuh a nawp lam tak uh ahi.

⁸ Ephraim chun, ‘Ka hausa tai! keia dingin neihzawhna ka kisiem tai. Kuoma’n diklo taka hausa na hi tin ei ngawh thei diek puo’n au,’ a ti a.

⁹ Himahleh, Kei hi, Lalpa na Pathien uh, Aigupta gam apat a hun puidawkpa kha ka hi. Gamthip a na kawm u a ka hung laia na um guol u khan puon-in ah hun chen sak kit ing ka.

¹⁰ “Thiemgaute kawm ale thu ka gen sek a, kilâkna tamtak le ka muh sak sek a. Thiemgaute mang in ka mite vaulawkna ka nei sek ahi.

¹¹ Himahleh, Gilead a chun milim ho a hi zing a, a hote chuh thi tei ding ahi ngâl u a. Gilgal achun bâwngchalte a lân u a, himahleh, a maichâmteu chuh gamtalai laka suong sieh vum bang chauh hung hi ding ahi.”

¹² Ei suonpau Jakob chuh Mesopotamia gam ah a taimang a, Israel chun zi man ding a sep a ngai ta a, zi man ding chun belam a ching hi.

¹³ Thiemgau mang in Israel chuh Aigupta gam apat in Lalpa’n a puidawk a, thiemgau mah mang in Lalpa’n a hukbit hi.

¹⁴ Ephraim chun la a hah suklungnat mah mah a; zieziekchun, a thisan suoh chuh amah chungah a chu a, a gensietna chuh Lalpa’n amah chungah kiek sak in a.