HOSEA 10 - PATHIEN LEKHABU THIENGTHO (BSI)

¹ Israel chuh grep bawk phatak, gahsuoh tak tawbang ahi a, himahleh, a gah suoh dungzui in maichâmte a supung zel ta a. A gam gahsuoh dungzui zelin, dawikhuom suongte a hihpung zel u a.

² A lunggil teu a hung dik ta puoh a, tuhin chuh a gitlohnateu ziekin thuok ding ahiu ui. Lalpa’n a maichâmteu chuh suchim intin, a dawikhuomteu chuh susie ding ahi ngâla.

³ “Leng tak tak ka nei puou hi, Lalpa chuh ka kihcha ngâl puou a: a hin la leng chun le banga ei hih sak chuom ding?” hun ti pai un au.

⁴ Thugawlh a siemnau ah lepchieh a kipautiem in, thu a gen maimai u a, zieziekchun, lei kilet chuop a hampa gu nei a keh dim bangin vaihawmna a pung ahi.

⁵ Samari khawpi a chêngte chuh lau untin, Bethel a bâwngno lim um tâk loh ziek chun nasa takin lungkham un au. Amau haw leh thiempu, milim nasemte chuh kap un au. A sanateu, a lopinateu chuh paihthaka a um tieng chu leh lungkham in mau un au.

⁶ Amah ngêi chule lengpa Jareb kawma piek dingin Asuria gama chiehmang pih hi’n a: Ephraim chuh sukzahchak hi’n tin, Israel chun amah thu pun ngêi chuh zahpih ina.

⁷ Samari gam chula tui chunga thing hal kilap bang mai hi’n tin, a lengpa chuh sukmangthai hi’n a.

⁸ Israel ten milim a honau, Aven tângsipa umte chuh sukmangthai hiu untin; a maichâm chungteu achun ling leh khauguite kek dim in a. Zie tieng chu leh mihaw chun tâng kawmah, “Ei sel in” tiu untin, muol kawmah, “Ei delh khum in” ti’n au.

Israel te chunga Thutanna ding

⁹ Lalpa chun, “Israel chate hin, gitlohna Gibeah a a hih guol u khan, ka chunga a gitlohnau hi a haihsan diek puou ui. Zieziekchun, Gibeah a chun kidona’n tun khum ding ahi.

¹⁰ Zie mi gilote hi do ing ka ting, gawt ding ka hi. Namte chuh amau haw do dingin kipunkhawm untin, a gitlohnau tamtak ziek chun gawt un au.

¹¹ “Ephraim chuh bâwngla buhchil dinga kisazo tawbang, sinsak thiem sa ahi a: Himahleh, tuhin ken a ngâwng hawih tak chunga chun namkawl bât ing ka ting, Jakob chun a leitangte chuh sunel in a.

¹² Nanguh a dingin diktatna kit uh unla, lungsietna diktak chuh ât un: na lei sit u chuh let unla, Lalpa hawl hun ahi ngâla, tichun, hung intin na chung u a hukdamna hun sungtha ding ahi.

¹³ Himahleh, manlohna lei na let u a, diklohna na ât u a, lepchieh gah na nêk uh ahi.

¹⁴ Zieziekchun na mite lak ah kidona hung pawt intin, leng Shalman in kido ni a Betharbel a suksiet bang khan, na kulhpiteu cheng chuh suksiet in um intin; nute leh a chateu chuh khetlup khawm in um un au.

¹⁵ Nanguh Bethel mite haw, na nunsiet nau huoisie tak zieka chuh na chung u a zie tawbang thil chuh hungtung ding ahi. Israel leng chuh phalvak ma’n beimang ina.”