HOSEA 1 - PATHIEN LEKHABU THIENGTHO (BSI)

¹ Juda leng Uzziah te, Jotham te, Ahaz te leh Hezekia te, Jehoash chapa Jeroboam Israel te chunga leng ahih laia Beeri chapa Hosea kawma Lalpa thu hungtung chuh ziehi ahi.

Hosea zi leh a Chate

² Hosea manga Lalpa’n thu a gen pat chun hiti hin Hosea kawmah thu a gen a, “Chieh inla, nawhchizuok zi’n va nei in la; nawhchizuok apat chun cha hing in, hitibang hin ka mite’n ei nungsawn un, zawl ei saih san tau hi,” ti’n.

³ Tichun a chieh a, Diblaim chanu Gomer chuh zi’n a nei ta a; tichun, nau a hun vawp a, chapa ahun hing ta a.

⁴ Chun, Lalpa’n a kawmah, “A min dingin Jezreel sah; Israel te leng haw chuh amau haw suonpa Jehu’n Jezreel a a tuolthahna phuba chuh lapai ding ka hi ngâl a. Jehu vaihawmna chuh sutawp pai ding ka hi.

⁵ Chun, zie ni chun hiti hi hi’n tin, Jezreel guoma Israel te thalpo chuh hih bawng ding ka hi ngâl a,” ti’n.

⁶ Chun, nau a vawp kit a, chanu a hing a, Lalpa chun a kawmah, “Amin ‘Loruhamah’ na sak ding ahi; a ziek chuh, Israel inkawte chuh lungsiet ta puo’ng ka ting, chun, ngaidam ta lo hiel ding ka hi ngâl a.

⁷ Himahleh, Juda inkawte chuh vang lungsiet ka ting, thalpi ahim chemzâm ahim, kidona ahim, sakawl ahim sakawl chung chuong mi ahim a amau haw hukdawk lo in, kei Lalpa a Pathien u hin hukdawk ing ka,” a ti a.

⁸ Chun, Loruhamah chuh nawichep a haihsak a, tichun nau a vawp kit a, chapa a hing kit a.

⁹ Chun, Lalpa’n hiti hin a ti a: “A min dingin ‘Lo-ami’ na sak ding ahi: a ziek chuh, nang haw hi ka mite na hi puou a, Kei le na Pathien uh hi diek puo’ng ka,” ti’n.

Israel Tundin kitna ding

¹⁰ Himahlele, Israel chate chuh tuisuohgiet pîlnel banga tamin simsenloh leh teh theih loh a tam hung hin au. Tichun, Pathien in a kawm u ah, “Ka mite na hi puou hi,” a tihna mun ngêi a chun “Pathien hing chate na hiu ui tih ni hungtung in a,” ti’n.

¹¹ Tichun Juda mite leh Israel mipite chuh hung kizawm khawm kit untin; khatvei chuh a gam uh ahin hung paklun kit ding ahiu ui. Ahi, Jezreel ni chuh lopi ding ahi ngâl a.