HEBRAI 9 - PATHIEN LEKHABU THIENGTHO (BSI)

Pathien Hodan Nih te

¹ Chun, thugawlh masa khan le, Pathien ho dân leh, Pathien hona dinga leia mun thiengtho chuh a um ngêi a.

² Puon-In a siem uh a, a tuohtil chuh Mun Thiengtho a kiti a. Zie tak achun thaumei tunna leh, Pathien kawma chângthâk lat kawihna dawhkhâng chuh a um a.

³ Chun, puonzak nihna dân sung achun Puon-In, Mun Thiengtho pên a tih uh chuh a um hi.

⁴ Zie tak achun gimlim hâlna sana maichâm leh, Thugawlh kawihna Thingkuong, sanati a kiluonkhum leh sana bel. Manna umna leh, Aron tiengkhut hung seldawk leh, suongpek nih, a chunga Thugawlh kizik chuh a um a.

⁵ Thingkuong chunga chun, Zahngaihna chutphah chuh a thau zak khum in, Cherub lopitak nih a um u a. Himahlele, zie thu haw chuh tuhin, a kip a kâwi in gen thei puoi tiu.

⁶ Zie thil haw kiguonggalh dân chuh khutibang chuh a hung hi ta a. Thiempute chuh ni cheng leh, Puon-In tuoh tîl achun, zenvielna nasem dingin a lut sek uh a.

⁷ Himahleh, puonzak nihna dân sung achun, Thiempu Lienpen chuh, kum cheng leh khatvei chauh, amah gitlohna leh mipite gitloh thawihna ding a lat ding thisan chawi in amah chauh a lut sek hi.

⁸ Zie thil haw kiguon dân chuh, Puon-In tuohtil a nasepna chuh a din lai chengin, Mun Thiengthopen lampi chuh a kilang tadih puoi, tih Thagau Thiengtho in kichien takin a gen a.

⁹ Zie chuh tulai huna thil um dingte etsakna ahi. Zie chun, thillat te leh gancha a kithawihna, Pathien kawma piekte chun a hopa sielephahetna chuh a subukim thei tak tak puoi.

¹⁰ Ziehaw chuh nek leh dâwn leh kithiensakna dân chuom chuom hihdan mai a hih ziekin. Ziehaw chuh pawlam thila hihdan mai ahi a, zie chuh Pathien in dân thak a hun tundin masanga mat dinga guot ahi.

¹¹ Himahlele, Krista chuh tunung a hung um ding thilpha, Thiempu Lienpen a hungpang ta’n, Puon-In, zie khawvel thilsiemte laka hilo leh, mihingte khuta siem le hi diek lo achun nasep lopi leh bukim zaw chuh a hung sem ta a.

¹² Kel leh bâwng note thisan hilo in, himahleh, amah thisan ngêi in ei u dingin kumsawt tatna mu’n, set den dingin khatvei thu’n Mun Thiengtho pen ah a lut tai.

¹³ Kel leh bâwngchalte haw thisan leh, bâwngla kihalvam vutte, mi thanghuoite chunga thehkhum in bawn sakhuo dana a thien lohnau thieng khawpa a sukthien ngâl chun,

¹⁴ Krista, kumsawt a Thagau zâla melhemlo a Pathien kawma kithawihna thisan chun, Pathien hing zenviel dingin, na sielephahetnau chuh thilhih thite lak achun a hah hihthien na mai zên ding e!

¹⁵ Zieziekchun, Krista chuh Thugawlh Thak palai a hii, thugawlh masa nuoia sukkhelhna haw laka pat tatna’n, mi a hung thih tâk ziekin, sap a umte chun kumsawt goluoh ding thutiem chuh chang thei un au.

¹⁶ Thuvaithak umna tak ah, a vaithakpa thihna le um lo thei ahi puoh ngâl a.

¹⁷ Mi a thih nung leh thuvaithak in thu a nei chauh sek a, a vaithakte dam pet in chuh a nei puoi.

¹⁸ Khutichun, thugawlh masa khale, thisan lo in a det puoi.

¹⁹ Dan thu dungzuia thupiek chengcheng chuh Mosi’n mi chengcheng a hilh nung in,

²⁰ “Ziehi, Pathien in na kawmuh a a hun piek thugawlh thisan a hi hi,” ti’n, bâwngno haw leh kelhaw thisan chuh, tui tawh, pat san tawh husop tawh a la a, Dan lehkhabu leh mi chengcheng chuh a thehkhum ta a.

²¹ Zielo chun le, Puon-In leh, zenvielna a matchâk ûmlebel chengcheng chuh khutibang mah chun, thisan chun a thehkhum suok kêi ta a.

²² Tichun, Dan thu vangin, thil chengcheng chuh thisana sukthien in a um sek a, thisan mang lo in, gitloh ngaihdamna himhim a um puoh ngâl a.

Krista Kithawihna Phazaw

²³ Khutibang chun, van a thil um haw tawbang mawng chun, zie tawbanga chuh sukthiena um ding him a hii. Himahleh, van thil tak takte chun vang, ziehaw sanga kithawihna phazaw a sukthien chuh a mamawh hi.

²⁴ Krista chuh khuta sak, Mun Thiengtho, a tak kibatpih achun a lut puoh ngâl a; Pathien ma ah, I sik uh a ding dingin van ngêi ah a lut zaw ta a.

²⁵ Judate Thiempu Lienpen chuh, gan thisante chawiin, kum cheng leh Mun Thiengtho pên achun a lut sek a. Himahlele, Krista chuh amah kilân dingin tamtak vei a lut puoi;

²⁶ Khuti hi kileh, khawvel kisiem a thak, vel tamtak a thuok ding ziekin. Himahlele, tulai hun tâwp ahin, gitloh lâkmangna dingin amah mawng kithawihna dinga hung kipie’n, khatvei a hung kilak a hi tai.

²⁷ Chun, mihiem a dingin khatvei thih guot ahi a, zie nung chuleh vaihawm na um ding ahi.

²⁸ Zie guol mah chun, Krista chu le, mi tamtak gitloh lâkmangna dingin, khatvei kithawihna’n a kipie ta ngâl a. Zieziekchun, a nih veina achun, gitloh thu ngaihtuoh ding hilo in, amah a na ngakte hukdam dingin a nih veina ah hung kilak kit ina.