HEBRAI 8 - PATHIEN LEKHABU THIENGTHO (BSI)

Isu Thiempu Lien

¹ Chun, I thugen hawu lak ahin, a thupi pên chuh ziehi ahi: Khutibang Thiempu Lienpen, Vana Pathien lopipen Lalchutphah changlama va chu pa chuh I nei ui, tih hi.

² Amah chun, Mun Thiengtho pên, mihiem sak hilo, Lalpa sak ngêi hobuk tak tak achun Thiempu Lienpen nasep chuh a sem ahi.

³ Thiempu Lien ta cheng chuh thilpiek leh kithawihna gante Pathien kawma lân dinga guot ahiu a, khutichun, ei uh Thiempu Lienpen hin le, bang ahim lat ding a ngai hi.

⁴ Leia hi ana um hile chuh, Thiempu hilo hiel ding ahi, Dan dungzuia thilpiek lânte a na umsa a um ziekun.

⁵ Ziete haw chun van a um haw lim leh a tawbang maimai chuh a sem sek uh ahi. Mosi’n hobuk a sak ding kuon vela Pathien in a kawm a, “Tanga etkalpih ding etsak a na um bang khan, bangakai siem dingin chingthei ah,” a tih bang khan.

⁶ Tu’n vang, Isu chuh thugawlh phazaw sem palai a hih dungzui zelin, nasep phazaw a hung chang tai, zie thugawlh chuh thutiem phazaw chunga hih a hih ziekin.

⁷ Zie thugawlh masa chuh demna beiin na um le chuh, a nihna ding chun mun hawl lo ding a hi a,

⁸ Himahleh, amau chuh dem in ziehaw hi a gen ta ngâl a: “Ngaitie, a nikhuo haw hungtung ding a hii, Lalpa’n a tii, Zie nikhuo haw achun Israel inkawte leh, Juda inkawte kawm achun thugawlh thak siem ing ka.

⁹ A pulepateu Aigupta gam apat a puidawk dinga a khut uh a ka tuk ni a, A kawmuh a ka thugawlh bang kha hilo in; Ka thugawlh achun a um zawm puoh ngâl uh a, Tichun, amau haw chuh ka dâwn takloh a hii, Lalpa’n a tii;

¹⁰ Zie nikhuo haw nung achun Israel inkawte kawmah, Ka thugawlh ding chuh ziehaw hi a hii, Lalpa’n a tii; A lunggil u ah ka dân thupiek haw kawih ka ting, A lunggil u ah le zik ing ka ting; Chun, amau dingin a Pathien uh hi’ng ka ting, Keia dingin le amau haw chuh ka mite hi’nau, Lalpa’n a tii.

¹¹ Chun, mitin in, ‘Lalpa chuh heu he’n,’ ti’n, Amah tuolsung khatpihte leh, Amah suohpihte ngêi le sinsak diek ta puo’n au. A neupen apat in a lienpen tiengin, A bawn u a ei he chiet ta ding ahi ngâl u a.

¹² A gitlohnateu chengcheng ngaidam ing ka ting; A sukkhelhnau haw le hezing zing diek ta puo’ng ka,” ti’n.

¹³ Thugawlh thak chanchin gen in, Pathien in a masa chuh a sului ta a, tichun, thil a luisa ta cheng leh, chulsa ta cheng chuh hung mangthai pai ding a hi ngâl a.