HEBRAI 7 - PATHIEN LEKHABU THIENGTHO (BSI)

Melkisedek Thiempu

¹ Melkisedek chuh, Salem lengpa, Chungnung pên Pathien Thiempu ahi. Abraham chuh leng lite that zo a, a hung vaihkit lai chun, Melkisedek chun ana lamtuoh in, a na vangsak hi.

² Tichun, Abraham chun a gâllâk thilte lak apat chun sawma-khat chuh a pie ta a. (Melkisedek min umzie masapen chuh, “Diktatna Leng,” a hi a, chun, Salem leng a hih ziekin, “Chamna Leng,” le a kitii.)

³ Melkisedek pa ahim, a nu ahim, a hihloh leh a suonte chanchin zikna him a um puoh a, amah chuh pa neilo, um pat ni neilo ahi a; Pathien Chapa banga siem ahi a; kumlekhuo’n thiempu’n a um zing hi.

⁴ Khutichun, Abraham, ei uh ei suonpa lopitak mai pan, a gâllâk thil laka a phapen pente a piekna pa chuh, zie mi lopi zie ding chuh ngaihtuoh tiem u!

⁵ Levi suonte laka thiempu. taphawtte chun, Israel mipite laka pat, sawma-khat lâkkhâwm ding chuh Dan thupiek a hi ngêi a, zie chuh amau haw gama mite lak ngêi apat ahi a, a gam u a mite chuh Abraham khalbe a pawt himahleu le.

⁶ Melkisedek chuh Levi suon a mi ahi puoh a, himahleh, Abraham apat in sawma-khat chuh a la a, tichun, Pathien thutiem chang pa chuh a vangsak ta a.

⁷ Zieziekchun, niel guol loh in, vangsakna piepa chuh vangsaka umpa sang chun a lien zaw ngâla.

⁸ Thiempute chungchâng thu achun, thithei mihiemte chun sawma-khat chuh a lakhawm sek uh a, himahleh, Melkisedek chungchâng thu vang achun, Pathien lehkha thu gen guolin, a hing zing hi ti a gena umpa chun a lakhawm sek ahi.

⁹ Chun, Levi sawma-khat la sek pa hin bawn, Abraham khut akhan sawma-khat a pie tai tih theih ahi;

¹⁰ Melkisedek in ana muok lai khan a pa khalbe ah ana um nalai ngâla.

¹¹ Levi te thiempu hihna pansan a, Dan thu chuh Israel chate kawma piek a hi ngâl a. Tuhin, Levi te nasepna chuh buting kei a hih tâk chun, thiempu chi chuom dang khat, Aron tihloh in, Melkisedek umdan banga thiempu dang hung um ngai diek ta puo’n a.

¹² Zieziekchun, thiempu hihna chuh a hung danglam tâk ziekin, Dan thu chuh sukdanglam a hung ngai him ahi.

¹³ I Lalpau, zie a a chanchin a genpau hi phung chuom ahi a, zie a mi himhim chuh kuomah in thiempu na a sem ngêi puou hi.

¹⁴ I Lalpau chuh Juda phung apat a hung pieng a hii tih a kichien ngâl a, zieziekchun, Mosi’n thiempu haw chanchin a gen lai khan ziehi a gen kha.

Thiempu Dangte

¹⁵ Zie thu chuh a hung kichet zawk deuh na’n, Melkisedek banga thiempu dang a hung um kit ta a,

¹⁶ Mihing dân leh thupiek banga siem hilo in, himahleh, hin tâwp neilo thilhih theihna a siem zawk chuh.

¹⁷ Pathien Lehkha thu chun, “Nang vang, Melkisedek umdan banga, kumsawt a thiempu na hi ie!” ti’n a gen ngâl a.

¹⁸ Thupiek um masa chuh a hât loh ziek leh a sawt loh ziekin paih in a um ta a,

¹⁹ Mosi Dan chun bangmah sukbukim theih him a nei puoh ngâl a. Tuhin vang chuh Pathien I naih zawk theihna dingun, kinepna phazaw chuh piek in I um tau hi.

²⁰ Zie ban achun, Pathien kitiemna le a um nalai hi. Zie tawbanga kihâksielna thu chuh mi dangte thiempu a siem a a um lai u khan a um khalo ahi.

²¹ Himahlele, Isu chuh, Pathien ngêi in zie tawbang kihâksielna thu hi a kawma gen in thiempu a siem a hi ngâl a: “Nang vang kumsawt a thiempu hi ding in, Lalpa’n a kihâksiel ta a; A lungthim hêi kit ngei ta puo’n a,” ti’n.

²² Zie tawbanga kibat lohna khat mah chuh, Isu chuh thugawlh phazaw sukdetpih pa a hung hihna hi ahi tai.

²³ Chun, thiempu a pang midang le tamtak a na um ngêi u a, himahleh, amau haw chuh a na thiu a, a nasep u chuh a sunzawm thei lo uh ahi

²⁴ Himahleh, Isu chuh kumlekhuo a a hin zing ziekin, a thiempu hihna nasep chuh san theih loh in a neih zing zawk ahi tai.

²⁵ Zieziekchun, amah zieka Pathien kawma hungte chuh a tâwp chanin a hukdam thei a, amau haw sik gensak dinga kumkhuo a a hin zing ziekin.

²⁶ Khutichun, Thiempu Lienpen, mi thiengtho, zumlezuol tuoh lo, nin beklo, mi gilote apat a kikawih chuom; vante haw chunglama um, I mamawhteu cheng ei hihsakpa chuh ahi.

²⁷ Amah chuh, Thiempu Lienpen, ni chenga amah gitloh thawihna ding lân masa a, a zawh a mipite gitloh thawihna ding lân sekte tawbang chuh a hi puoi. Amah mawng kipie’n, khatvei a dingin kithawihna a subuting ta ngâl a.

²⁸ Mosi Dan thu chun, mihiem bukimlo takte chuh Thiempu Lienpen dinga guot in a um sek a, himahleh, kihâksiel a Pathien in a thutiem, Dan nunga hung um chun, Chapa, kumsawt a dinga sukbukim sapa chuh a guot zawk ahi.