HEBRAI 13 - PATHIEN LEKHABU THIENGTHO (BSI)

Pathien Sukkipak dân Ding

¹ Suohpih kihehpihna hi um zing hen.

² Malzin bawlphat ding hengilh kiu in. Khutibang phatna apat chun, a bangin, hetloh hielin vânsâwlchâk tunsak a na hi kha thei sek uh ahi.

³ Suongkul tângte chuh, nang haw tawh tâng khawm bangin ngai zingun la; sukgimtheih thuokte chuh, nang haw le, sapum a um na hih ziekun geldawk zing un.

⁴ Mi cheng cheng lak ah kichênna hi limbawl in um hen la, zâlkhun le sukbuok loh in um hen. Kideihchak chîng leh zawlsaite chuh, Pathien in ngaihtuoh ding ahi ngâl a.

⁵ Na lungput uh chuh, dangka ngaihlul na tello hi hen; na thil neih hawu chung achun lungkim un; amah chun, “Bangtik chan inle hun kangbawl hiel puo’ng ka ting, thah le hun thahthawt puo’ng ka,” a ti ngâl a.

⁶ Khutichun, hangsan takin, “Lalpa chuh ei panpihpa ahi a, lau puo’ng ka; Mihiem in banga ei lawh theih dinguh?” I ti sek ui.

⁷ Na lawiupau, Pathien thu hun hilh sekte chuh hezing un la, a nunchan uh a thil a thawhdawk teu chuh ngaihtuoh in, a taksan zawh danteu chuh entawn un.

⁸ Isu Krista chuh thangni, tuni leh kumkhuotuong in a ngêi ngêi ahi zing ngâl a.

⁹ Thugin chuom chuom leh, sinsakna lamdang tak takte a puih mang in um kiu in! Pathien hehpihna apat a sunggil lam hatna muh chuh a pha ngâl a, neklechâk thu a dân guola phuh det hilo in, zie tawbang dân zuite chun bangmah phatchuomna a mu puoh ngâl u a.

¹⁰ Thiempu, Judate Pathien hona muna zenviel nasemte chun, eihaw maichâm a kithawihna kilânhaw chuh a nek dinguh ahi puoi.

¹¹ Thiempu Liente chun, gitloh thawihna dingin gan thisan chuh Mun Thiengtho pên achun a la lut sek uh a; himahleh, a sa chuh giehbuk pawlama a hâl sek uh ahi.

¹² Khutibang mah chun, Isu’n le, amah thisan mâwnga mite chuh a gitlohnau apat a sukthien theihna dingin, khawpi pawlam achun a hung thi ta a.

¹³ Zieziekchun, eihaw le, amah a muhsitnau chuh kipuok in, khawpi pawlama a kawm lam achun chieh hitiu.

¹⁴ Zie khawvel ahin khuo mun det I nei puoh ngâl uh a, khuo hung um ding chuh I thîl zawk uh ahi.

¹⁵ Tichun, amah zal chun kithawihna chuh Pathien kawmah lân zing hi tiu; zie chuh, amah chuh “Lalpa ahi,” tih, mûk a phuondawk a I lat uh chuh ahi ngâl a.

¹⁶ Himahlele, thilpha hih leh, kipanpih tuoh ding hi hengilh kiu in, zie chuh Pathien kipahlam, kithawihna chuh ahi ngâl a.

¹⁷ Na chunguh a lawiupate thu’n nung un la, a thu thuu in um un. na chungthuu gen ding a hih ziekun, chawllo in, na thagau uh a hun ven sak uh ahi ngâl a. A thuu na zawp uh chun vang, kipâk kawmin na sem un tin; khutilo a, lungkham tak kawma a gen u chun chuh, nang haw dingin khawk ding ahi ngâla.

¹⁸ Nei paucham sak zingun. Hun tina thil diktak hih I nawp sek ziekuh hin, sielephahetna thieng tak I nei ui tih, I he ngâl uh a.

¹⁹ Chun, kin deuh a na kawmuh a ei sawl kit pai zieng theihna dinga, tihtakzet a paucham dingin ka hun nget na hiu hi.

Thu tawpna

²⁰ Chun, Chamna Pathien, I Lalpau Isu Krista mithi lak apat kaithopa, kumsawt thugawlhna thisan zâla belam Chingpa Lien chun,

²¹ Isu Krista zâla a mitmuh a a deihlam taphawt hih dingin thilpha tin chengah nanguh hun subukim hen. Amah kawm achun kumkhawtuong in lopina um hen. Amen.

²² Himahlele, suohpihte, zie kitilna thu hi ngaitha hâm hâm dingin ka hun ngên hi. Na kawmuh a thu tawmcha cha ka hun zik ahi.

²³ I suohpihpau Timothe kha a thahdawk tau hi tih, na hetuh ka nuom hi. A hung vaka a hih chun, amah tawh hung kitawn in, nang haw hung mu na’ng kau.

²⁴ Na lawiupateu chengcheng leh, mi thiengthote chengcheng khah ka chibai nei hun piek sak un. Itali gama suohpihte hin a hun chibai ui.

²⁵ Na bawnchau a kawmah Pathien lungsietna um ta hen, Amen.