HEBRAI 11 - PATHIEN LEKHABU THIENGTHO (BSI)

Taksanna Chuh

¹ Chun, taksanna hi kinepna thil haw hetchienna, muh loh thil a um mawng hi tih phawtchienna a hii.

² Zie thu haw ahin malaia mite khan Pathien pahchak a na lawh sek ui.

³ Taksanna’n vannuoi haw hi Pathien thu a suktuoh sa diem ahi tai tih I heu a, khutichun, thil muh theih haw hi, thil muh theih loh haw apat a siem ahi.

⁴ Taksanna ziekin Abel chun Kain sangin kithawihna phazaw Pathien kawmah a lân a, zieziekchun mi diktat ahii tih hetpihna a lawh a, Pathien in a thilpiek haw chuh a hetpih a, chun, zie taksanna ziek chun amah chun a thih nung in le thu a gen zing ahi.

⁵ Taksanna ziekin Enok kha thihna tep lo dinga lâkmang in a um a; Pathien kawma lak toh in a um a, tichun, kuoma’n a mu thei ta puoi, Pathien in a lâkmang tâk ziekin. Pathien lehkha thu’n, Enok chuh laktoha a um ma’n Pathien lungtuok mi tak ahi ti’n a gen hi.

⁶ Himahlele, taksanna lo in Pathien lungtuok mi hih guol ei puoi; Pathien kawma hung ta chun, amah chuh a um hi tih leh, taima taka amah hawlte kawma kipahman pie nuom mi ahii tih, ginchak ding ahi.

⁷ Taksanna ziekin Noa’n muh nailoh thil hungtung ding thu ah, Pathien hilh a a na um in, Pathien a gingcha a, a inkawte hukdamna dingin, kuong In nei khat a tu a; zie chun khawvel chuh mawh a chan sak a, chun, Noah chun Pathien apat a diktatna chuh taksanna vangin a mu tai.

⁸ Taksanna ziekin Abraham chuh sapa a um lai khan, Pathien in luoh dinga a tiemna gama chieh dinga a sapna chuh a zawp ta a. Tichun, a chiehna ding nasan le he lo in a chiehdawk ta a.

⁹ Taksanna ziekin Pathien in piek a tiemna gam akhan, mi gama châm bang mai in a na châm zing ta a, Pathien apat a thutiem kibang a muh pih, Isak leh Jakob bangin, puon-In haw ah a cheng uh a.

¹⁰ Abraham chun khawpi, Pathien guonggalh leh tundawk, suongphum dettak nei khawpi chuh a ngak zing a.

¹¹ Taksanna ziekin Sara’n le, a tiempa chuh taksanum a a seh ziekin, a têk kei nung in nau vawp theihna a mu tai.

¹² Khutichun, Abraham chuh a thisa tawbang mai himahleh, zie mi khat apat hin, a suonte van a aksi banga tam, tuisuohgiet panga pîlnel guola simsenloh a hung pawt tau hi.

¹³ Ziete haw chengcheng chuh taksanna nei in a thi tau a, Pathien thil tiem haw chuh chang lo in; himahlele, ziehaw chuh gamla tak apana mu’n, a na lawp tau a, leia hin malzin leh khuolzin viel mai a hih uh a kigendawk tau a.

¹⁴ Khutibang thugente chun amau gam ding hawl a hih uh a sulang ngâl uh a.

¹⁵ Chun, a pawtsanna gam u chuh a ngaihtuoh kit ta puou ui; lunggulh kit hi leu chuh, vaihkitna hun khan mu ngêi ding ahiu hi.

¹⁶ Himahleh, tu’n vang, gam phazaw sem ut a na hiu a, zie chuh van a um a hi; khutichun, Pathien chun, a Pathien uh tih a um chuh a zakcha puoi; amau dingin khawpi khat guotsa a kawih sak tâk ziekin.

¹⁷ Taksanna ziekin Abraham chuh, patep a a um khan, Isak chuh a vak lân zieng a, a hii, kipâk taka thutiem haw chang pa, “Isak ahin na suonte ti’n au,” a tihpau mawng khan,

¹⁸ Pathien in mithi lak apat le kaitho thei a ngaiin,

¹⁹ A chapa changkhat neihsun chun a ho a; tak apat chuh Isak chuh thihna apat chuh a mu kit ta a.

²⁰ Taksanna ziekin Isak chun tunung a thil hungtung ding haw thu ah, Jakob leh Esau chuh vang a pie a.

²¹ Taksanna ziekin Jakob chun, a thih ding kuon khan, Joseph chate chuh vang a pie gêl gêl a; a tiengkhut mawng a kingai in, Pathien a ho a.

²² Taksanna ziekin Joseph chun, a thih ding a hung naih khan, Israel suonte pawt ding thu a gen a; a luong chung thu a thilhih ding dân cheng le a gen a.

²³ Taksanna ziekin Mosi a pien lai khan, nausen melhawih tak ahi, a tih ziekun, tha thum sung a nulepa selguk in a um a; leng thupiek le a lau puou hi.

²⁴ Taksanna ziekin Mosi chu, a hung kikhantit nung khan, Pharaoh chanu chapa ti a kiminvawh ding a nuom puoh a,

²⁵ chawmkhat sunga gitloh nuomsakna lawppih sang chun, Pathien mite tawh sukgimtheih thuok khawm chuh a tel zaw ta a.

²⁶ Aigupta gam go haw sang chun Krista a gensietnau chuh lopi zaw a seh in, kipahman piek ding chuh a thil zing hi.

²⁷ Taksanna ziekin leng lungnat chuh lau lo in, Aigupta gam a taihsan a, muhtheihlohpa chuh a muh ziekin a thuok tuntun a.

²⁸ Taksanna ziekin, Chiehkân Kut leh kawtbienga thisan theh khah a siem a, ti a chuh, thihna vânsâwlchâk chun, Israel chate nautil haw chuh a thah lohna dingin.

²⁹ Taksanna ziekin, tuol nam a chieh bangin, Tuisuohgiet San akhan a chieh kai uh a; Aigupta te’n le zie chuh hih a guou a, himahleh, tui chun amau haw chuh a chup mang suok ta a.

³⁰ Taksanna ziekin, Jerikoh khuo kulh kha ni sagih a ûmkimvel nung un a chim ta a.

³¹ Taksanna ziekin, Rahab nawhchizuoknu khan, enthate khah phatak a a na lawp ziekin, thu a nung lo haw lak ah a mangthai ta puoi.

³² Chun, banga ka gen naklai ding leh? Gideon thu le, Samson thu le, Jeptha thu haw leh, David thu le, Samuel thu le, thiemgau haw thu le gen leng, hun in ei daih lo ding a hi ngâl a.

³³ Ziete haw chun Taksanna ziekin gam bang a lau a. diktat takin thil a hih uh a, thutiem haw chuh a chang u a, sakeibaknei kha haw le a sukchih sak uh a.

³⁴ Mei thilhih theihna haw a sumit uh a, chemzâm hiem apat a suokchau a, hatlohna apat in, hât taka siem in a um u a; kidona achun gâlhât khawkheng a hung hiu a; gamdang mi, a gâlteu chuh a nawh zam u a.

³⁵ Taksanna ziekin numeite chun, a inkawteu thisa thokit te a muu a. Khenkhatte chuh sawisak in a um uh a, thawhkitna phazaw a chan theihna dingun, hukdawk a um a nuom puou hi.

³⁶ Khenkhatte chun chiemnuih a bawlna leh zêpna a thuok uh a, ahi, zielo chun le, thikkawl buh sak leh, suongkul lutna haw le a tuok sek uh a.

³⁷ Suong a seh in a um uh a, thing-âtna a ât bawtin a um uh a, belam vun leh kelvun silh in a vak vai hawn uh a, gimthei tak leh dahum taka sukgimtheih in a um uh a.

³⁸ Ziete haw ding chun khawvel hi umna hâwi a hi puoi! Gâltai bang mai in, thalek leh tânghaw achun a vak viel viel u a; kawlpûk haw leh kawkhuk haw achun a cheng sek uh a.

³⁹ Khutichun, ziehaw chengcheng chun, a taksanna ziekuh a pahchak na lawh in, Pathien in a tiem chuh a na chang diek puou ui!

⁴⁰ Eihaw chuh amau haw tawh sukbukim a I um khawm theihna dingun, Pathien in eihaw dingin thil phazaw ei guot sak zawk a hih ziekin.