HAGGAI 2 - PATHIEN LEKHABU THIENGTHO (BSI)

Ho-In Thak Lopina chuh

¹ Chun, tha sagihna, zie tha ni sawmnih leh ni khatna achun thiemgau Haggai kawmah Lalpa thu a hung tunga:

² “Shealtiel chapa, Juda gam pawpa Zerubabel kawma leh Jehozadak chapa thiempu lienpen Joshua kawm leh saltâng vaikit te kawma chun hiti hin gen in,” a ti a.

³ “Zie In hi masanga a lopi lai mu kha na lak u ah kuo a um? Tuhin bangti’n na ngai u? Tuhin chuh na mitmuh un bangmahlo mai bang hi talo ahim?

⁴ Aw Jerubabel, tuhin chuh hangsan takin um in, Lalpa’n a tii. Aw Joshua, nang Jehozadak chapa, thiempu lienpen, nangle hattak in um in. Chun, nang haw zie gama mi cheng cheng te haw, hattak in um unla, sem un, na kawm u ah ka um ngâla, tih hi Sepaihte Lalpa kamsuok ahi.

⁵ Aigupta apat a na hung pawt lai u khan le, na kawm u a um zel ding ka hi tin ka hun thutiem sa bang khan na lak uh ah ka thagau a cheng zing hi, lau kiu in.

⁶ “Khatvei chuh, hun chawmchakhat sung, vante, leite leh gam leh tuipite chu hun sulîng ding ka hi, Sepaihte Lalpa chun a tii.

⁷ Namtin te chuh paih tha’ng ka ting, a hauhsakna teu chuh zie tak a hin puok lut in um intin, tichun, zie In hi lopi na’n su dim ing ka, Sepaih hawnte Lalpa chun a tii.

⁸ Dangkaguo hi keia ahi a, sanate hi keia ahi, Lalpa’n a tii.

⁹ Zie In lopi nunung zaw hi a masa sang khan lopi zawn tin, zie tak achun chamna leh thamuonna pie’ng ka” Lalpa’n a tii.

Thiemgau in Thiempute a Hopihna

¹⁰ Chuleh Darius lal kum nihna, tha kuona, ni sawmnih leh ni lina chun Lalpa thu chuh thiemgau Haggai kawmah a hung tunga.

¹¹ “Sepaihte Lalpa chun hiti hin a ti a: thiempute chuh hiti hin dân chuh dawng tie:

¹² Kuo ahim khatin kithawihna apat in sa thiengtho chuh a na puodawk hen la, a puon thep kal ah a na chun dawk hen la, tichun a puon chun chângthâk ahim, an huon min sa ahim, uain ahim, thau ahim, a hih loh leh bang hitaleh nek ding chi himhim ana sukha ta leh a thiengtho zieng dem?” ti’n. Zie chuh a dawt phat chun thiempute chun, “Thieng zieng lo,” ti’n a dâwng u a.

¹³ Ziephet chun Haggai chun, “Mi thiluong sukkhak zieka buokte chun ziehaw thil a khawipen ahim hi ana sukha ta leh a buok die leh?” a ti a. Thiempute chun, “Buok in a,” ti’n a dâwng u a.

¹⁴ Ziephet chun Haggai chun, “Lalpa chun, zie thil haw chuh zie namte chunga hi mat ding ahi a, a khutsuokteu leh maichâm a kithawihna a hun latteu taphawt hi a thienglo ahi a tii,” ti’n.

Lalpa Vangsakna Thutiem

¹⁵ Lalpa chun a gen a, “Tuni apat hin ngaihtuoh tiem u” Ho-In na sakphat masang u khan

¹⁶ Buh dân sawmnih ting dinga na kinep u kha dân sawm chauh ahi ta a. Uain thawkna muna bûk sawmnga thaldawk na kinep u kha bûk sawmnih chauh a pha sek hi.

¹⁷ Nasep dawk cheng chenguh susie dingin khawkhalte, muotnate, chun gielte ka hun sawl a, himahlele, kei lam na hung nga diek puou hi, Lalpa’n a tii.

¹⁸ Tuni hi Ho-In suongphuh kiphuh zawhna, a tha kuona, ni sawmnih leh ni li ni, tuni apat hin tunung tiengin, tuma lam kha ngaihtuoh un la, Lalpa Ho-In suongphuh ni apat khan ngaihtuoh tiem u!

¹⁹ Buh In ah buhchi a um nalai em? ahi, grep guite, theipi kungte, vaimimtheite leh olive thingte um ta lo in, gahsuoh talo mah leu, tu apat ahi nanguh hun vangsak ding ka hi,” ti’n.

Zerubabel kawma Pathien Thutiem

²⁰ Lalpa thu chuh zie tha ni sawmnih leh ni li ni mah chun, Haggai kawmah a hungtung kit a;

²¹ Juda chunga vaihawmpa Zerubabel kawma chun hiti bang hin gen ah: “Lei leh van sulîng ding ka hi a; lalgam te, lalchutphahte chuh paih tha’ng ka ting, namte thilhih theihna chuh sumangthai ding ka hi.

²² Kangtalaite leh a chunga chute chuh paih tha vek ing ka ting; sakawl leh a chunga chuongte chuh a mau leh amau kithattuoh un au.

²³ Zie ni chu leh aw Zerubabel, ka suokpa, Shealtiel chapa khut in hun panpih ing ka ting, min namna zungbuh guolin hun siem ing ka, Lalpa chun a tii. Nang hi ka hun tel ta ngâla, Lalpa chun a tii,” ti’n.